الماتى قالاسىنىڭ اۋداندارىنىڭ بىرىندە اۋىز سۋ ماسەلەسىن ءوز كۇشتەرىمەن شەشپەك بولعان تۇرعىندار قۇبىر ورناتۋ ءۇشىن جۇمىسشى جالداعان. قالا تۇرعىندارىنىڭ ايتۋىنشا, قۇبىر جالعاۋ كەزىندە جۇمىسشى قازا تاپقان, دەپ حابارلايدى Egemen.kz tengrinews.kz سايتىنا سىلتەمە جاساپ.
اپات تۋرالى Facebook-تەگى «قالالىق كەزەكشى» توبىندا جازىلعان.
«ناۋرىزباي اۋدانىنىڭ اكىمدىگى اۋىز سۋ ماسەلەسى جايلى ۇنەمى بوس ۋادە بەرىپ كەلدى. اقىرى اۋدان تۇرعىندارى بۇل ماسەلەنى ءوز كۇشتەرىمەن رەتتەۋگە كىرىستى. ءبىز ارنايى تەحنيكا جالدادىق. ەڭ وكىنىشتىسى, جۇمىس بارىسىندا قايعىلى وقيعا بولىپ, 20 ساۋىردە قۇبىر تارتىپ جاتقان جۇمىسشى قايتىس بولدى. وسىلايشا, جۇرتتى سۋمەن قامتىماق بولعان ماماننان ايىرىلىپ قالدىق. ەندى ادام ولىمىنە كىم جاۋاپ بەرەدى؟ اكىمدىكتىڭ اتقارۋى كەرەك جۇمىستى ورىنداۋ كەزىندە اكەسى قايتىس بولعانىن بالالارىنا قالاي تۇسىندىرۋگە بولادى؟», دەپ جازدى Facebook-تە الماتىلىق تۇرعىن.
بۇل وقيعاعا بايلانىستى الماتى پوليتسيا دەپارتامەنتى تۇسىنىكتەمە بەردى.
«ادام ءولىمى فاكتىسىن ناۋرىزباي اۋداندىق پوليتسيا باسقارماسى سوتقا دەيىنگى تەرگەۋدىڭ بىرىڭعاي تىزىمىنە تىركەدى. سوت-مەديتسينالىق ساراپتاما تاعايىندالدى. وقيعانىڭ باسقا دا ءمان-جايى انىقتالۋدا», دەدى پوليتسيا دەپارتامەنتىنىڭ وكىلى.