الدىڭعى تاۋلىكتە شىعىس قازاقستان وبلىسىندا COVID-19 ىندەتى 105 ادامنان انىقتالدى. ءبىر تاۋلىك ءۇشىن از كورسەتكىش ەمەس. جالپى وڭىردەگى ەپيدەميالىق جاعدايدى باعالاۋ ماتريتساسىنا سايكەس شىعىس قازاقستان وبلىسى «سارى ايماققا» اۋىسقاندىقتان, قوسىمشا شەكتەۋ شارالارى ەنگىزىلدى. دەمەك, جايباراقات جۇرۋگە بولمايدى.
15 ساۋىردە وبلىستىڭ باس مەملەكەتتىك سانيتارلىق دارىگەرى ءوڭىر حالقى اراسىندا COVID-19 كوروناۆيرۋستىق ينفەكتسياسىمەن سىرقاتتانۋشىلىقتىڭ الدىن الۋ جونىندەگى شارالاردى كۇشەيتۋ تۋرالى №5 قاۋلىعا قول قويدى. قاۋلى 19 ساۋىردەن باستاپ كۇشىنە ەنەدى. اتالعان قاۋلىدا ەڭ باستىسى, الماتى, قاراعاندى وبلىستارى تاراپىنان شىعىس قازاقستان وبلىسىنىڭ سىرتقى شەكارالارىنا كىرۋدى/شىعۋدى باقىلاۋ ءۇشىن سانيتارلىق بەكەتتەردىڭ جۇمىسى جالعاساتىن بولادى. بيليارد, بالالار ويىن-ساۋىق ورتالىقتارىنىڭ, بانكەت زالدارىنىڭ جۇمىس ىستەۋىنە جانە ەسكە الۋ راسىمدەرىن وتكىزۋگە تىيىم سالىنادى. ال ءبىلىم بەرۋ جانە تاربيەلەۋ وبەكتىلەرىنىڭ جۇمىس ءتارتىبى ايقىندالعان COVID-19 كوروناۆيرۋستىق ينفەكتسياسىنىڭ ءبىر-ەكى جاعدايى تىركەلسە, توپ كارانتينگە جابىلادى. ال قىزمەتكەرلەر قاشىقتان جۇمىس ىستەۋگە كوشەدى. كەيبىر جاعدايدا جاقىن بايلانىستا بولعان ازاماتتار دا ونلاين رەجىمدە قىزمەتتەرىن جالعاستىرادى.
ايماقتاعى احۋال كۇردەلەنىپ بارا جاتقان ساتتە جاپپاي سانيتارلىق تالاپتاردى ۇستانعان ءجون-اۋ. الايدا ەرەجەگە قۇلاق اسپايتىندار دا بار. وتكەن اپتادان باستاپ وسكەمەن جانە سەمەي اۆتوبۋس ايالدامالارىندا پوليتسيا قىزمەتكەرلەرى جۇمىس ىستەي باستادى. ءبىر اپتا ىشىندە ولار ازاماتتاردان سىپايى تۇردە بەتپەردە كيۋدى سۇرايتىن بولادى. سونىمەن قاتار وسكەمەننىڭ ايالدامالارىنا ىشكى كەستەلەرىنە ساي مۇعالىمدەر دە شىقتى. ولار بەتپەردە تاقپاعان وقۋشىلارعا ءتۇسىندىرۋ جۇمىستارىن جۇرگىزەتىن كورىنەدى.
وڭىردە باس سانيتارلىق دارىگەردىڭ قاۋلىسى اياسىندا قويىلاتىن ءتيىستى تالاپتاردىڭ ساقتالۋىنا مونيتورينگ جاسالىپ, قۇزىرلى ورگاندارعا باياندالىپ وتىرماق. ايتپەسە, حالىقتى قاراپايىم ەرەجەلەرگە باعىندىرۋ قيىندىپ بارا جاتقان سەكىلدى. وكىنىشكە قاراي, سوڭعى ەكى اپتادا اياگوز اۋدانىندا ينفەكتسيا جۇقتىرۋ جاعدايىنىڭ ءوسۋى بايقالادى. انىقتالعانداي, 14 كۇن ىشىندە تىركەلگەن 43 جاعدايدىڭ 39-ى سىرتتان اكەلىنگەن. ياعني «KAZ Minerals اقتوعاي» جشس-نە جۇمىسقا كەلگەن باسقا ءوڭىر تۇرعىندارىنان انىقتالعان. وسىعان بايلانىستى, كاسىپورىن باسشىلىعىنا جاعداي تۇراقتالعانعا دەيىن بىرقاتار وبلىستاردان ادامداردى اكەلۋدى توقتاتۋ قاجەتتىلىگى تۋرالى حات جولدانادى.
ەسكە سالا كەتسەك, باس سانيتارلىق دارىگەردىڭ قاۋلىسىنا سايكەس ەرەجە ەسكەرىلمەگەن جاعدايدا, زاڭ اياسىندا شارا قولدانىلادى. ول ءۇشىن مونيتورينگتىك توپتىڭ جۇمىسى جالعاسا بەرمەك.
شىعىس قازاقستان وبلىسى