جۇمىسكەرلەر جالاقىسى 30 پايىزعا وسەدى

بۇل قۇجات ەكونوميكالىق تۇ­راقتى­لىقتى نىعايتۋعا, ەڭبەك قا­تىناستارىن, داۋلى ماسەلەلەردى رەتتەۋ, جۇمىسپەن قامتۋ جانە ەڭبەكاقى تولەۋدىڭ ءتيىمدى جاعدايلارىن جاساۋ­عا ءوز سەپتىگىن تيگىزەدى. مەموراندۋم شىعىس قازاق­ستان وبلىسى اكىمدىگى, وبلىستىق كاسىپ­وداقتار بىرلەستىك­تەرى مەن جۇمىس بەرۋ­شى­لەردىڭ ءوزارا ىن­تىماقتاستىعىنا نەگىز­دەلگەن. بۇ­گىندە 2018-2020 جىلدار ارا­لى­عىندا جاسالعان كەلىسىمشارتتىڭ مەر­زىمى اياقتالىپتى. وسىعان بايلانىس­تى, الەۋ­مەتتىك ارىپتەستىك تاراپتارى ال­دا­عى ۇشجىلدىق كەزەڭگە ارنالعان وب­لىس­تىق ۇشجاقتى كەلىسىمنىڭ جوباسىن قايتا دايىندادى.

وبلىس اكىمىنىڭ ورىنباسارى شا­كارىم بۇقتۇعۇتوۆتىڭ ايتۋىنشا, وت­كەن جىلدارى كەلىسىم اياسىندا وڭىر­دەگى نەگىزگى ەكونوميكالىق كورسەت­كىش­تەر ايتارلىقتاي دەڭگەيگە جەتتى. 2018 جىلدان بەرى كوميسسيانىڭ 21 وتى­رىسى وتكىزىلدى. وتىرىستاردا نەگىزى­نەن تۇراقتى جالاقى بويىنشا قىز­مەتكەرلەردىڭ الدىنداعى بەرە­شەكتى وتەۋ جانە بولدىرماۋ ماسە­لەسى تالقىلاناتىن. قابىلدانعان شارا­لاردىڭ ناتيجەسىندە 3 ملرد تەڭگەگە جۋىق بورىش وتەلىپ, وبلىستىڭ 760 كاسىپورنىندا 18 200 جۇمىسشىنىڭ قۇقىعى قورعالدى.

– بىرنەشە جىل بويى رەسپۋبليكادا «ەڭبەك» مەملەكەتتىك باعدارلاماسى, سونداي-اق «جۇمىسپەن قامتۋدىڭ جول كارتاسى» ىسكە  اسىرىلىپ كەلەدى. وبلىستا 140 مىڭعا جۋىق تۇرعىن «جۇمىسپەن قامتۋدىڭ جول كارتاسى» باعدارلاماسىنا قاتىستى. تەك 2020 جىلى وڭىردە 22 مىڭنان استام جۇمىس ورنى اشىلدى. بۇگىندە شىعىس قازاقستان وبلىسىندا جۇمىسسىزدىق دەڭگەيى 4,9 پايىزدى قۇراپ وتىر, – دەيدى ش.بۇقتۇعۇتوۆ.

ايتا كەتەيىك, ۇكىمەت 2021 جىلدىڭ 12 ناۋرىزىندا جۇمىس بەرۋشىلەردىڭ رەسپۋبليكالىق بىرلەستىكتەرى مەن كاسىپتىك وداقتار اراسىندا 2021-2023 جىلدارعا ارنالعان كەلىسىمشارتقا قول قويدى. وسىلايشا, وبلىستىق ۇش­جاقتى كەلىسىمنىڭ جوباسى ازىرلە­نىپ, ەڭبەكاقىنى, الەۋمەتتىك جانە زەي­نەتاقى اۋدارىمدارىن ۋاقتىلى تولەۋگە قوعامدىق باقىلاۋدى كۇشەي­تۋگە باسا نازار اۋدارىلدى.

«شقو كاسىپوداق ورتالىعى» اۋماق­تىق كاسىپوداقتار بىرلەستىگىنىڭ توراعا­سى تەمىربەك قاسىمجانوۆ اتالعان مەموراندۋم اياسىندا 2023 جىلدىڭ سوڭىنا قاراي وبلىس كاسىپورىندارى قىزمەتكەرلەرىنىڭ جالاقىسىن كەمىندە 30 پايىزعا ءوسىرۋ جوسپارلانعانىن ايتتى. سونىمەن قاتار ۇشجاقتى كو­ميس­سيانىڭ ودان ارعى جۇمىسى الەۋ­مەتتىك ارىپتەستىكتى نىعايتۋعا جانە الەۋمەتتىك-ەڭبەك قاتىناستارىن رەتتەۋگە باعىتتالاتىن بولادى.

– كەلىسىمشارت 8 ءبولىم, 120 تار­ماق­تان تۇرادى. جەڭىلدىكتەر دەڭگەيىنىڭ ءوسۋىن, اۋىلدىق ەلدى مەكەندەردە تۇرا­تىن دەنساۋلىق ساقتاۋ, ءبىلىم بەرۋ, الەۋمەتتىك قامسىزداندىرۋ, مادە­نيەت جانە سپورت سالالارىنىڭ, ۆەتەري­نارلىق قىزمەتتەردىڭ ماماندارىنا كومەك كورسەتۋدى كوزدەيدى. قاۋىپسىز ەڭبەك جاعدايلارىن قامتاماسىز ەتۋگە قوعامدىق باقىلاۋدى جۇزەگە اسىراتىن تەحنيكالىق ينسپەكتورلاردى ماتەريالدىق ىنتالاندىرۋ تەتىگى اي­قىندالدى, – دەدى ت.قاسىمجانوۆ.

سونداي-اق سەمەي يادرولىق سىناق پوليگونى سالدارىنان زارداپ شەككەن ازاماتتاردىڭ بىرقاتارى كۋالىكتەرى بار-جوعىنا قاراماستان, قوسىمشا اقشالاي وتەماقى الۋعا قۇقىعى بار. 

مەموراندۋمعا قول قويۋ راسىمىنە وبلىستىڭ اتقارۋشى بيلىك ورگاندارىنان وبلىس اكىمىنىڭ ورىنباسارى شاكارىم بۇقتۇعۇتوۆ, اۋماقتىق كاسىپ­وداقتار بىرلەستىگىنىڭ توراعاسى تەمىر­بەك قاسىمجانوۆ, «امانات» قازاق­­ستان كاسىپوداقتار دوستاستىعى» رەسپۋب­ليكالىق كاسىپوداقتار بىرلەس­تىگى اۋماقتىق كاسىپوداقتار بىرلەستى­گىنىڭ توراعاسى ميحايل ايزەنبەرگ, جۇ­مىس بەرۋشىلەر تاراپىنان شىعىس قازاق­ستان وبلىسى بويىنشا ور­مان, اعاش وڭدەۋ جانە جيھاز ونەركاسى­بى كاسىپ­ورىندارى وڭىرلىك قاۋىمداستى­عىنىڭ توراعاسى ۆيتالي چەرنەتسكي قاتىستى.

شىعىس قازاقستان وبلىسى