پاۆلودار وبلىسى اقتوعاي اۋدانىنا قاراستى اۋىلداردىڭ ءبىرىنىڭ قوقىس ۇيىندىسىندە ەلتاڭبا مەن پروكۋراتۋرا تاقتايشاسى جاتقانى تۋرالى جەلىدە جازبا پايدا بولدى, دەپ حابارلايدى Egemen.kz
جەلىدە جاريالانعان بەينەجازبادا اقتوعاي اۋدانىنىڭ پروكۋراتۋراسىنىڭ تاقتايشاسى جاتقانى كورسەتىلگەن. سونداي-اق ونىڭ جانىندا ەكى ەلتاڭبا جاتىر. ءبىرى سىنعان بولسا, ەكىنشىسى ءبۇتىن. اكىمدىكتىڭ دەرەگىنە سۇيەنسەك, قوقىس ءۇيىندىسى اقتوعاي ورتالىعىنان ەكى شاقىرىم جەردە ورنالاسقان. ەندى جەرگىلىكتى قۇزىرلى ورگاندار مەملەكەتتىك سيمۆول قوقىس ۇيىندىسىنە قالاي جەتكەنىن انىقتاپ جاتىر.
«وبلىستىق پروكۋراتۋرا قىزمەتتىك تەكسەرىس جۇرگىزىپ جاتىر. سونداي-اق اقپاراتتىڭ تارالۋ ارناسى ماتەريالى اياسىندا پوليتسيا تەكسەرۋدى باستادى. ءمان-جايلار انىقتالىپ جاتىر», دەدى وبلىستىق پروكۋراتۋرانىڭ وكىلى.