يندۋستريا جانە ينفراقۇرىلىمدىق دامۋ ءبىرىنشى ۆيتسە-ءمينيسترى قايىربەك وسكەنباەۆ باسپانا كەزەگىن رەتتەۋ ىسىندە اشىقتىق قالاي قامتاماسىز ەتىلەتىنىن ءمالىم ەتتى, دەپ حابارلايدى Egemen.kz
«بۇگىنگى تاڭدا تۇرعىن ءۇي قۇرىلىس جيناق بانكى «وتباسى بانكى» بولىپ قايتا قۇرىلدى جانە ونىڭ بازاسىندا «تۇرعىن ۇيمەن قامتاماسىز ەتۋ ورتالىعى» جاساقتالدى. وسى ورتالىق, تۇرعىن ۇيگە مۇقتاجداردىڭ ەسەبىن جۇرگىزۋدى, سونداي-اق تۇرعىن ءۇيدى ءبولۋدى تۇرعىن ءۇيدىڭ قولجەتىمدىلىك ساتىسىنا سايكەس, تىزىمگە ەنگىزىلگەن كۇنى بويىنشا كەزەكتە تۇرعاندار اراسىندا ءبىر ورتالىقتان جۇزەگە اسىرىلاتىن بولادى», دەدى ءمينيستردىڭ ءبىرىنشى ورىنباسارى.
ۆيتسە-ءمينيستردىڭ سوزىنە قاراعاندا «تۇرعىن ۇيمەن قامتاماسىز ەتۋ ورتالىعى» جەكە تۇلعالاردىڭ مەملەكەتتىك دەرەكقورلارىن ءبىر ورتاعا توعىستىرۋ ارقىلى «بارماق باستى, كوز قىستى» ارەكەتتەردىڭ جولىن كەسەتىن بولادى.
«بازاعا قايتا ەنگىزۋگە جول بەرىلمەيدى. ازاماتتار مەملەكەتتىك باعدارلامالارعا ءبىر رەت قانا قاتىسا الادى», دەدى قايىربەك وسكەنباەۆ.
بۇعان دەيىن حابارلاعانىمىزداي, «نۇرلى جەر» باعدارلاماسى بويىنشا سالىناتىن پاتەر سانى كوبەيەتىن بولدى.
ۆيتسە-ءمينيستردىڭ ايتۋىنشا, تاۋەلسىزدىك جىلدارىندا 1,6 ميلليوننان استام قازاقستاندىق جاڭا باسپاناعا يە بولعان.