ءىىم نۇر-سۇلتان قالاسىنىڭ, باتىس قازاقستان جانە قاراعاندى وبلىستارىنىڭ اۋماقتىق پوليتسيا دەپارتامەنتتەرىمەن كيىكتەردى زاڭسىز اۋلاۋمەن جانە ولاردىڭ مۇيىزدەرىن وندىرۋمەن اينالىساتىن قىلمىستىق توپتاردىڭ جولىن كەسۋ بويىنشا كەڭ اۋقىمدى ارنايى وپەراتسيا جۇرگىزدى. وسىلايشا, 8 جانە 9 ساۋىردە ءۇش ايماقتا كريمينالدىق پوليتسيا قىزمەتكەرلەرى ءبىر ۋاقىتتا 11 ادامدى انىقتاپ, ۇستادى, ولاردان مىڭنان استام اقبوكەن مۇيىزدەرى تابىلىپ, تاركىلەندى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
مەملەكەتكە الدىن الا كەلتىرىلگەن زالال سوماسى شامامەن 2 ميلليارد تەڭگەنى قۇرادى.
قر قك 339-بابى «سيرەك كەزدەسەتىن جانە قۇرىپ كەتۋ قاۋپى تونگەن, سونداي-اق پايدالانۋعا تىيىم سالىنعان وسىمدىكتەر مەن جانۋارلار تۇرلەرىن, ولاردىڭ بولىكتەرى مەن دەريۆاتتارىن زاڭسىز پايدالانۋ» بويىنشا قىلمىستىق ىستەر قوزعالدى. ءتيىستى ساراپتامالار تاعايىندالدى, سونىڭ ناتيجەسى بويىنشا قورشاعان ورتاعا كەلتىرىلگەن ەكولوگيالىق زالال بەلگىلەنەدى.
قىلمىسكەرلەردىڭ باسقا سەرىكتەستەرىن, سونداي-اق مۇيىزدەردى ساتۋ ارنالارىن انىقتاۋعا باعىتتالعان جەدەل-تەرگەۋ شارالارى ودان ءارى جۇرگىزىلۋدە.
ءىىم كيىكتەردى, سونداي-اق ولاردىڭ مۇيىزدەرىن زاڭسىز اۋلاعانى, ساتىپ العانى, ساقتاعانى, وتكىزگەنى, تاسىمالداعانى نەمەسە جويعانى ءۇشىن 3 جىلدان 12 جىلعا دەيىن باس بوستاندىعىنان ايىرۋ قىلمىستىق جاۋاپتىلىعى كوزدەلەتىنىن حابارلايدى.