ورتالىق كوممۋنيكاتسيالار قىزمەتىندەگى ءباسپاسوز ماسليحاتىندا دەنساۋلىق ساقتاۋ ءمينيسترى الەكسەي تسوي ۆاكتسينالاۋعا قاتىستى مەملەكەت باسشىسىنىڭ تاپسىرمالارى ورىندالاتىنىن مالىمدەدى, دەپ حابارلايدى Egemen.kz
ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا جۋرناليست الەكسەي تسويعا «پرەزيدەنت قاسىم-جومارت توقاەۆ ءسىز باسقارىپ وتىرعان ۆەدومستۆونىڭ جۇمىسىن سىنعا الدى. وسى ورايدا قانداي كەمشىلىكتەر بولعانىن اتاپ وتە الاسىز با؟» دەگەن سۇراق قويدى. بۇل سۇراققا دەنساۋلىق ءمينيسترى ىركىلمەستەن, مەملەكەت باسشىسى نەگىزگى ەكپىندى ۆاكتسينالاۋ مەرزىمىنە قاتىستى قويعانىن ايتتى.
«ارينە, ەل ىشىنە ۆاكتسينانى جەتكىزۋ ءۇشىن بارىنشا كۇش-جىگەرىمىزدى سالىپ وتىرمىز. وسى ورايدا نارىقتا بارشا ۆاكتسينا قولجەتىمسىز بولىپ تۇرعانىن تاعى ءبىر مارتە اتاپ وتكىم كەلەدى. قازىر وسى ۆاكتسينالار ەركىن ساۋداعا شىعارىلماعان. ءبىزدىڭ ماقساتىمىز – بۇل ۆاكتسينالاردىڭ جەتكىزىلۋىن بارىنشا جىلدامداتۋ ءۇشىن كەز كەلگەن رەسۋرستاردى تابۋ. بۇل جەتكىزىمدەر بويىنشا پروبلەمالار بار, الايدا اقپان ايىنان باستاپ قازاقستاندا بار كولەممەن ۆاكتسينالاۋدى باستادىق», دەدى مينيستر.
وعان قوسا, الەكسەي تسوي ۆاكتسينا سالدىرۋدىڭ نۇسقاۋلىقتارى وتە دۇرىس جاسالعانىن, ياعني قاجەتتى جۇمىستار كەزەڭ-كەزەڭمەن اتقارىلىپ جاتقانىن العا تارتادى.
«قازىر حالىقتىڭ سەنىمى ارتىپ, ەكپە جاساتۋعا نيەتتى ادامدار كوبەيدى. ارينە, ۆاكتسينانىڭ نارىققا ەركىن شىعارىلماۋى تەك قازاقستان ءۇشىن عانا ەمەس, سونىمەن قاتار ءبىزدىڭ كورشىلەس ەلدەر ءۇشىن دە پروبلەما بولىپ تۇر. ءبىز بارىنشا جىلدامداتىپ, مەملەكەت باسشىسىنىڭ تاپسىرمالارىن ورىندايتىن بولامىز», دەدى ا.تسوي.
ەسكە سالا كەتەيىك, ىندەتكە قارسى ءىس-قيمىل جونىندەگى جيىن بارىسىندا پرەزيدەنت قاسىم-جومارت توقاەۆ دەنساۋلىق ساقتاۋ ءمينيسترى الەكسەي تسويدىڭ جۇمىسىنا كوڭىلى تولمايتىندىعىن اشىق جەتكىزگەن ەدى.