كىم قانشا ۆاكتسينا الادى؟

پاندەميامەن كۇرەستە ۆاكتسينا كومەگىنە جۇگىنۋگە الەمدەگى ەلدەردىڭ بارلىعىنىڭ بىردەي شاماسى كەلمەي جاتقانى ايان. ونىڭ ىشىندە الەۋەتى وسال كەدەي مەملەكەتتەرگە ءتىپتى قيىن ءتيىپ جاتىر.  ال ەو-عا مۇشە ەلدەر مەن اقش-تىڭ شالىمىنىڭ قانشالىقتى ەكەنى بۇل رەتتە دە ايقىندالعان. ساۋىرگە دەيىن AstraZeneca ەندى Vaxzevria دەگەن اتاۋ العان ۆاكتسينا 2,4 ميلليارد دوزامەن كوشتىڭ باسىندا تۇرسا, 1,5 ميلليارد دوزامەن Pfizer ەكىنشى ورىنعا شىققان. قىتايدىڭ Sinovac ەكپەسى 480 ميلليون, ال ءبىزدىڭ ەلدە دە ۆاكتسيناتسيالاۋ ءجۇرىپ جاتقان «سپۋتنيك V»-ءدىڭ تارالىمى 303 ميلليون دوزادان اسىپتى. عالىمداردىڭ پايىمىنشا بيىل دۇنيەجۇزىندەگى ۆاكتسينا شىعارۋدى 12 ميلليارد دوزا كولەمىندە جۇزەگە اسىرۋعا بولاتىنداي.

باي, قۋاتتى مەملەكەتتەر قازىرگى كۇنى 4 جارىم ميلليارد دوزانى الۋعا تاپسىرىسىن جاساپ, ۆاكتسينا اتاۋلىنىڭ 53 پايىزىن الامىز دەسە, تابىسى ورتاشا جانە ورتاشادان تومەن ەلدەر 16-17 پايىز توڭىرەگىندە عانا سۇرانىس بىلدىرگەن. ولاردىڭ ەندىگى ءۇمىتى بۇۇ-نىڭ جالپىعا بىردەي قولجەتىمدىلىكتى قولدايتىن COVAX باعدارلاماسىنا قاراپ تۇر.

جەكەلەگەن مەملەكەتتەردىڭ تاپسىرىسىن سارالاي كەلسەك, وندا ەۋروكوميسسيا 27 ەلدىڭ اتىنان 1,8 ميلليارد دوزاعا, اقش–1,2 ميلليارد دوزاعا, افريكا وداعى 680 ميلليون ۆاكتسيناعا شارت جاساپتى.