ماجارستاننىڭ سىرتقى ەكونوميكالىق بايلانىستار جانە سىرتقى ىستەر ءمينيسترى پەتەر سيارتو نۇر-سۇلتانعا رەسمي ساپارمەن كەلىپ, ونىڭ شەڭبەرىندە قازاقستان پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردىمەن ەكىجاقتى كەلىسسوزدەر ءوتتى, دەپ حابارلايدى Egemen.kz ەلىمىزدىڭ ءسىم ءباسپاسوز قىزمەتىنە سىلتەمە جاساپ.
تاراپتار ساياسي, ساۋدا-ەكونوميكالىق جانە مادەني-گۋمانيتارلىق سالالارداعى قازاقستان-ماجارستان ىنتىماقتاستىعىن ودان ءارى كەڭەيتۋ جولدارىن, سونداي-اق تۇركىتىلدەس مەملەكەتتەردىڭ ىنتىماقتاستىق كەڭەسى (تۇركى كەڭەسى) شەڭبەرىندەگى ءوزارا ءىس-قيمىلدى تالقىلادى. ءوزارا قىزىعۋشىلىق تۋدىراتىن حالىقارالىق سيپاتتاعى بىرقاتار ماسەلەلەر, سونىڭ ىشىندە قازاقستاندىقتار ءۇشىن ەۋرووداق ۆيزالىق رەجيمىن وڭايلاتۋعا قاتىستى ماسەلەلەر قارالدى.
كەلىسسوزدەر قورىتىندىسى بويىنشا كەلەسى قۇجاتتارعا قول قويىلدى: قازاقستان رەسپۋبليكاسى سىرتقى ىستەر مينيسترلىگى مەن ماجارستان سىرتقى ەكونوميكالىق بايلانىستار جانە سىرتقى ىستەر مينيسترلىگى اراسىنداعى دامۋعا رەسمي كومەك سالاسىنداعى ىنتىماقتاستىق جونىندەگى ءوزارا تۇسىنىستىك تۋرالى مەموراندۋم, قازاقستان سىرتقى ىستەر مينيسترلىگىنىڭ جانىنداعى سىرتقى ساياسي زەرتتەۋلەر ينستيتۋتى مەن ماجارستان سىرتقى ەكونوميكالىق بايلانىستار جانە سىرتقى ىستەر ينستيتۋتى اراسىنداعى ءوزارا تۇسىنىستىك تۋرالى مەموراندۋم, قر مادەنيەت جانە سپورت مينيسترلىگى مەن ماجارستان ادامي رەسۋرستار مينيسترلىگى اراسىنداعى 2021-2023 جىلدارعا ارنالعان مادەنيەت سالاسىنداعى ىنتىماقتاستىق تۋرالى باعدارلاما.
ساۋدا-ەكونوميكالىق بايلانىستاردى نىعايتۋ ماجار ءمينيسترىنىڭ ەكى ەلدىڭ 30-عا جۋىق ءىرى ىسكەر توپتار وكىلدەرىنىڭ قاتىسۋىمەن ديپلوماتيالىق بيزنەس-كلۋب مۇشەلەرىمەن كەزدەسۋىنىڭ باستى تاقىرىبى بولدى.
ساپار بارىسىندا پ.سيارتو قازاقستان رەسپۋبليكاسى پرەزيدەنتىنىڭ قابىلداۋىندا بولادى جانە ساۋدا جانە ينتەگراتسيا مينيسترىمەن كەزدەسۋ وتكىزەدى, سونداي-اق «استانا» حالىقارالىق قارجى ورتالىعى, تۇركى اكادەمياسى مەن ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنە بارادى.
گۋمانيتارلىق ىنتىماقتاستىق اياسىندا بۇگىندە ماجارستاندا 1000-عا جۋىق قازاقستاندىق ستۋدەنت ءبىلىم الىپ جاتقانىن اتاپ وتكەن ءجون. ماجارستان جىل سايىن قازاقستان ءۇشىن 250 ءبىلىم گرانتىن بولەدى.