شىمكەنت قالالىق پوليتسيا دەپارتامەنتىنىڭ الدىندا جۋرناليستەر بەيبىت اكتسيا وتكىزىپ, سوڭعى كەزدە ورىن العان ەكى وقيعاعا قاتىستى نارازىلىقتارىن ءبىلدىردى.
جالپى ءجۋرناليستىڭ جۇمىسىنا كەدەرگى كەلتىرۋ, وپەراتوردىڭ كامەراسىن سىندىرۋ, پوليتسيا بولىمشەسىنە اپارىپ, تۇسىنىكتەمە جازدىرۋ, زاڭسىز ۇستاۋ, وكىنىشكە قاراي ەلىمىزدە بولىپ تۇراتىن كەلەڭسىز جاعداي. مۇنىڭ ءبارى دە ءبىزدىڭ قۇقىق قورعاۋ ورگاندارىندا جۋرناليستپەن جۇمىس ىستەۋ مادەنيەتىنىڭ قالىپتاسپاعانىن كورسەتەدى. وكىنىشكە قاراي, «ۇر دا جىق پوليتسەي» ءبىز ءۇشىن جاڭالىق بولماي قالدى. جۋرناليستەردىڭ پوليتسيا دەپارتامەنتى الدىنا جينالۋىنا نە سەبەپ؟ قىسقاشا بايانداپ وتەلىك.
وسىدان ءبىر اي بۇرىن قالاداعى «تۇلپار» بازارىندا ورىن العان ءورت وقيعاسىن ءتۇسىرۋ ءۇشىن بارعان «استانا» تەلەارناسىنىڭ مەنشىكتى ءتىلشىسى باحرام تاليبجانوۆ پەن «31 ارنا» تەلەارناسىنىڭ ءتىلشىسى باحرام ابدۋللاەۆقا ءتارتىپ ساقشىلارى كۇش قولدانعان. ول بويىنشا تەرگەۋ امالدارىنىڭ باستالعانى بەلگىلى. مىنە, وسىنداي كەلەڭسىزدىك تاعى دا قايتالانىپ وتىر. قوس ءجۋرناليستىڭ جانە «پوليتسەيلەردىڭ ەرتەڭ ءوزىن ءولتىرىپ كەتەتىنىن كۇتىپ وتىرا بەرمەي» قارسىلىعىن ءبىلدىرىپ, دەپارتامەنتتىڭ الدىنا پلاكات كوتەرىپ كەلگەن «كتك» تەلەارناسىنىڭ ءتىلشىسى بەك ابيەۆتىڭ ايتۋىنشا, ولار سەنبى كۇنى التىنتوبە ەلدى مەكەنىنە تۇرعىنداردىڭ نارازىلىعىن ءتۇسىرۋ ءۇشىن بارعان. پوليتسەيلەر ولاردان وقيعانى تۇسىرمەۋدى تالاپ ەتكەن. ءتارتىپ ساقشىلارىنىڭ ءبىرى باحرام ابدۋللاەۆقا تاپ بەرىپ, جاڭبىردان قورعاۋ ءۇشىن كامەرانىڭ ۇستىنە ۇستاپ تۇرعان قولشاتىرىن سىندىرىپ, قولىنا جەڭىل جاراقات سالادى. پوليتسەيلەردىڭ سول جەردە جۇرگەن «ازاتتىقتىڭ» ءتىلشىسى ديليارا يسانى جۇلقىلاپ, ۇيالى تەلەفونىن تارتىپ الماق بولعانىن, ال باحرام ابدۋللاەۆقا ءبىر ءتارتىپ ساقشىسىنىڭ جاقىن كەلىپ, ء«ولتىرىپ جىبەرەمىن» دەپ قورقىتقانىن زاڭدىق تۇرعىدان بىلاي تۇرسىن, ادامگەرشىلىك تۇرعىدان اقتاۋعا بولا ما؟ ء تارتىپ ساقشىلارى وسى وقيعا كەزىندە «وتىرار» تەلەارناسىنىڭ وپەراتورىن دا ۇرعان.
جۋرناليست توتەنشە جاعداي بولعان جەردى بىلاي قويعاندا وت پەن وقتىڭ ورتاسىندا, سوعىس جاعدايىندا ءجۇرىپ تە حابار تاراتىپ, اقپارات جينايدى. سەبەبى ول ونىڭ كاسىبي مىندەتى. جۋرناليستەردىڭ جۇمىسىنا پوليتسيا قىزمەتكەرلەرىنىڭ كەدەرگى كەلتىرۋى قاي تۇرعىدان الساق تا دۇرىس ەمەس. ال سوققىعا جىعۋى تىم شەكتەن شىققاندىق. ءجۋرناليستى كىم كورىنگەن ۇرىپ-سوعىپ كەتە بەرەتىن بولسا, بۇل كاسىپتە قانداي بەدەل, قانداي قادىر-قاسيەت قالادى؟! ەلدەگى دەموكراتيانىڭ, ءسوز بوستاندىعىنىڭ بەدەل-دەڭگەيى جۋرناليست جۇمىسىمەن دە باعالاناتىنىن ەسكەرگەن ءجون. «بۇقارالىق اقپارات قۇرالدارى» تۋرالى زاڭدا جازىلعان ءجۋرناليستىڭ قۇقىعىن بىلاي قويعاندا قىلمىستىق كودەكستە «جۋرناليستiڭ زاڭدى كاسىبي قىزمەتiنە كەدەرگi جاساۋ» دەپ اتالاتىن (158-باپ) باپ بار. بۇل باپ بويىنشا ءجۋرناليستىڭ زاڭدى كاسىپتىك قىزمەتىن ورىنداۋىنا كەدەرگى جاساعان ادام ايىپپۇل سالۋدان 45 تاۋلىككە دەيىن قاماققا الۋعا دەيىن جازالانادى. ال ەگەر بۇل ارەكەت قىزمەت بابىن پايدالانا وتىرىپ جاسالسا, 2 جىلعا دەيىن باس بوستاندىعىنان ايىرىلادى. سوندىقتان وزدەرىنىڭ قۇزىرەتتەرىن پايدالانا وتىرىپ ءجۋرناليستى سوققىعا جىققان, ونىڭ زاڭدى كاسىبىنە كەدەرگى كەلتىرگەن پوليتسەيلەر زاڭ الدىندا ءادىل جازالانۋى ءتيىس.
شىمكەنت قالاسى پوليتسيا دەپارتامەنتىنىڭ باستىعى, گەنەرال ەرالى جۇماحانبەتوۆ دەپارتامەنتتىڭ الدىنا جينالعان جۋرناليستەرگە بارىپ, ولاردى ىشكە كىرگىزىپ, ەمىن-ەركىن سويلەستى. گەنەرالدىڭ بۇل قادامىن قاراپايىمدىلىققا باعالادىق. الايدا وسى كەلەڭسىزدىكتىڭ ءبىر ۇشى باسشىلىققا بارىپ تىرەلەتىن سياقتى. وسى كەزدەسۋدە گەنەرالدىڭ تالاپ ەتۋىمەن وزىندىك قاۋىپسىزدىك باسقارماسىنىڭ تەرگەۋشىسى 2 ناۋرىزدا تاليبجانوۆ پەن ابدۋللاەۆتىڭ ارىزى بويىنشا قوزعالعان قىلمىستىق ىسپەن تانىستىردى. تەرگەۋشى «تەرگەۋ امالدارى جۇرگىزىلىپ جاتىر» دەگەننەن باسقا ەشتەڭە ايتقان جوق. ءتىپتى بۇل ءىس بويىنشا كۇدىكتىنىڭ بار-جوعىن ايتۋدان باس تارتتى. ءبىر اي بويى بۇل باعىتتا ەشقانداي دا جۇمىس جۇرگىزىلمەگەن سياقتى. جابىرلەنگەن جۋرناليست گەنەرالعا ء«ولتىرىپ جىبەرەمىن» دەگەن پوليتسەيدىڭ سۋرەتىن دە كورسەتتى. سول جەردە ونىڭ كىم ەكەندىگى, قازىرگى ۋاقىتتا دەنساۋلىعىنا بايلانىستى دەمالىسقا شىعىپ كەتكەنى بەلگىلى بولدى. كەيىنگى ءىستىڭ دە الدىڭعىسى سياقتى ءبىر ورىننان جىلجىماي, اقىر اياعىندا جىلى جابىلىپ قالا ما دەگەن كۇدىك باسىمداۋ.
گەنەرال ەرالى جۇماحانبەتوۆتىڭ سول جەردە سوققىعا جىعىلعان جۋرناليستەردەن قىزمەتكەرلەرى ءۇشىن كەشىرىم سۇراپ, «وسىمەنەن بولدى ما؟» دەگەنى دە تۇسىنىكسىز. وسىلايشا باس پوليتسەي ءجۋرناليستى سوققىعا جىعۋدىڭ جازاسى ءبىر كەشىرىممەن جابىلادى دەگەندى اڭعارتقىسى كەلدى مە؟ ماسەلە كەشىرىم سۇراۋدا ەمەس, ماسەلە زاڭنىڭ ساقتالۋىندا عوي. وسى وقيعاعا قاتىستى جۋرناليستەر قاۋىمى ءوز پىكىرلەرىن الەۋمەتتىك جەلىلەر ارقىلى دا بىلدىرۋدە. «مەنىڭ جۋرناليستيكادا جۇرگەنىمە تۋرا 55 جىل بولىپتى. كىزمەت بابىمەن ىشكى ىستەر ءمينيسترىن دە, گەنەرالداردى دا سىنادىق. قىزمەتىن. بىراق ءدال مىناداي جاعداي بولعان ەمەس. قايدا بارا جاتىرمىز؟ جۋرناليسكە انانى جازا عوي, مىنانى كورسەتپەي-اق قوي دەيتىندەي, پوليتسەيلەر كىم ەدى؟! اركىم ءوز ورنىن ءبىلۋى كەرەك. گەنەرال كەشىرىم سۇراماسىن. ول كىنالى قىزمەتكەرلەردىڭ پوگونىن ج ۇلىپ, ولاردى سوتتاتسىن. سوندا دۇرىس بولادى. قۇقىقتىق مەملەكەتتە سولاي بولۋى كەرەك. زاڭدى بۇزدى ما, جاۋاپ بەرسىن. بۇل ءبىر دەيىك. ەكىنشىدەن, قىلمىستىق ءىستى قوزعاعان كەزدە كۇدىك كەلتىرىلگەن باپ دۇرىس قويىلۋى ءتيىس. ايىپ تاعىپ, ءىستى سوتقا جەتكىزۋ ماسەلەسىن قاداعالاۋ ماڭىزدى», دەيدى ارداگەر جۋرناليست قۋاندىق ورازبەك ۇلى.
وسىنداي جاعدايدىڭ ەرتەڭ تاعى دا قايتالانبايتىندىعىنا كىم كەپىلدىك بەرە الادى؟ جۋرناليستەر بۇل وقيعا بويىنشا قۇقىق قورعاۋ ورىندارىنىڭ ءادىل شەشىم قابىلداۋىن, زاڭ تالاپتارىن بۇزۋشىلاردىڭ ءتيىستى جازاسىن العانىن قالايدى.