ەلەكتروندىق ۇبت ناتيجەلەرىن وڭدەۋ بارىسىندا پاراقتاعى ءىشىنارا بويالعان جاۋاپتاردىڭ ەسەپتەلمەي قالۋى سياقتى تەحنيكالىق قاتەلەردىڭ بولۋى مۇمكىن ەمەس. تەستىلەۋدىڭ بۇل فورماتىندا وقۋشىلار جاۋاپ پاراعىن تولتىرۋعا ۋاقىت جۇمساماي, بۇل ۋاقىتتى تەست تاپسىرمالارىن ورىنداۋعا پايدالانا الادى. قر بعم ۇلتتىق تەستىلەۋ ورتالىعىنىڭ ديرەكتورى ديدار سماعۇلوۆ ورتالىق كوممۋنيكاتسيالار قىزمەتىندە وتكەن بريفينگتە تەستىلەۋ قورىتىندىسى بويىنشا جينالعان ۇپاي سانى ەكرانعا شىعارىلاتىنىن اتاپ ءوتتى. سونداي-اق ۇبت قاتىسۋشىسى قانداي سۇراقتارعا قاتە جاۋاپ بەرگەنىن بىردەن كورە الادى.
«ۇبت ەلەكتروندىق فورماتتا ء«بىر تەستىلەنۋشى – ءبىر كومپيۋتەر – ءبىر كامەرا» قاعيداتى بويىنشا ۇيىمداستىرىلادى. اۋديتوريادا نە بولىپ جاتقانىن كورسەتەتىن كامەرالاردان باسقا, تەستىلەنۋشى وتىراتىن ءار ۇستەلدىڭ ۇستىندە تاعى ءبىر كامەرا ورناتىلادى. پروكتورينگ پەن بەينەباقىلاۋدىڭ زاماناۋي جۇيەسى جانە ۇبت-دا بوگدە ادامداردى بولدىرماۋ ءۇشىن Face ID تسيفرلىق سايكەستەندىرۋ قۇرىلعىسى پايدالانىلادى», دەدى ۇيىمداستىرۋشى.
ەرەجەلەردىڭ ساقتالۋىن ارنايى كومپيۋتەرلىك باعدارلاما باقىلايدى, ول تىيىم سالىنعان زاتتاردى قولدانۋ فاكتىلەرىن اۆتوماتتى تۇردە انىقتايدى. ەگەر ۇبت تاپسىرۋ كەزىندە تالاپكەردىڭ سمارتفون, شپارگالكا جانە ت.ب. تىيىم سالىنعان زاتتاردى پايدالانعانى انىقتالسا, تەستىلەۋ اۆتوماتتى تۇردە توقتاتىلادى, تەستىلەنۋشىنىڭ ناتيجەلەرى جويىلادى. ال بۇزۋشىلىقتى بىردەن بايقاماسا, بەينەجازبالار تامىز ايىنىڭ سوڭىنا دەيىن تاعى دا قارالادى.
تەستىلەۋ پروتسەسىن قوسىمشا احۋالدىق ورتالىق باقىلايدى. سونداي-اق اشىقتىق پەن وبەكتيۆتىلىكتى قامتاماسىز ەتۋ ءۇشىن ۇبت-نى وتكىزۋ راسىمىنە سىبايلاس جەمقورلىققا قارسى ءىس-قيمىل اگەنتتىگىنىڭ ارنايى مونيتورينگتىك توبى مەن «ادالدىق الاڭى» جوبالىق كەڭسەسىنىڭ وكىلدەرى شاقىرىلادى.
سونىمەن قاتار ۇبت تاپسىرۋ كەزىندە اقپاراتتىق قاۋىپسىزدىكتى قامتاماسىز ەتۋگە ەرەكشە كوڭىل بولىنەدى. تەستىلەۋ پروتسەسى شيفرلاۋ ەلەمەنتتەرى بار ارنايى جابىق VPN جەلىسى ارقىلى جۇزەگە اسىرىلادى. وسىنىڭ بارلىعى اكادەميالىق ادالدىق قاعيداتتارىنىڭ ساقتالۋىن باقىلاۋدى كۇشەيتۋگە مۇمكىندىك بەرەدى.