شىمكەنت: سىبايلاس جەمقورلىققا قارسى ءىس-قيمىل ماسەلەلەرى جونىندەگى كوميسسيانىڭ وتىرىسى ءوتتى

مۇرات دۇيسەنبەك ۇلى مەملەكەت باسشىسىنىڭ وسى باعىتتاعى جۇمىستى كۇشەيتۋ جونىندەگى تاپسىرماسى اياسىندا سىبايلاس جەمقورلىققا قارسى كۇرەستىڭ باسىم باعىتتارىنا توقتالدى. بارلىق مەملەكەتتىك قىزمەتتەردى تسيفرلىق فورماتقا كوشىرۋ جانە ولاردى الۋ كەزىندە كەدەرگىلەردى, سونىمەن قاتار سىبايلاس جەمقورلىق تاۋەكەلدەرىن جويۋ قاجەتتىگىن اتاپ ءوتتى. بۇل ورايدا ىشكى تالداۋ ينستيتۋتىن قالىپتاستىرۋ, بارلىق سالادا اۆتوماتتاندىرۋ جۇيەلەرىن ەنگىزۋدىڭ ماڭىزى زور.

اگەنتتىك وكىلى جازيرا جىلقىشيەۆا سىبايلاس جەمقورلىققا قارسى ءىس-قيمىل بويىنشا قابىلدانىپ جاتقان شارالارعا جانە اگەنتتىكتىڭ ىسكە اسىرىلىپ جاتقان جوبالارىنا, زاڭنامالىق جاڭاشىلدىقتارعا نازار اۋداردى.

– بۇگىندە سىبايلاس جەمقورلىققا قارسى ءىس-قيمىل اياسىندا نەگىزگى باسىمدىق الدىن الۋعا باعىتتالىپ وتىر. سىبايلاس جەمقورلىقتىڭ سەبەپتەرىن جويۋدىڭ ءتيىمدى قۇرالدارى بار. بۇل – سىبايلاس جەمقورلىق تاۋەكەلدەرىن ىشكى تالداۋ ينستيتۋتى. ونى مەملەكەتتىك ورگاندار تۇراقتى نەگىزدە جۇرگىزۋى ءتيىس. 2021 جىلدىڭ 5 ساۋىرىنەن باستاپ اكىمشىلىك زاڭناماعا تۇزەتۋلەر كۇشىنە ەندى. شىمكەنتتە ازاماتتىق قوعام وكىلدەرى بەلسەندى. ىشكى تالداۋ جۇمىستارىنا قوعام وكىلدەرىن كوپتەپ قاتىستىرۋ كەرەك, – دەدى جازيرا جاقسىلىققىزى. جازۋشى, قوعام قايراتكەرى سادىبەك تۇگەل جەمقورلىقپەن كۇرەستە سانانى وزگەرتۋدىڭ ماڭىزدىلىعىن, بۇل باعىتتاعى جۇمىستارعا جۇدىرىقتاي جۇمىلا كۇرەسۋ كەرەكتىگىن ايتتى.

جيىندا قالالىق باسقارمالار تاراپىنان سىبايلاس جەمقورلىققا قارسى قابىلدانىپ جاتقان شارالار باياندالدى.

قالا اكىمى م. ايتەنوۆ اكىمدىكتىڭ بارلىق باسقارمالارىندا سىبايلاس جەمقورلىقتىڭ سەبەپتەرى مەن جاعدايلارىن جويۋ, سىبايلاس جەمقورلىق تاۋەكەلدەرىنە ىشكى تالداۋ جۇرگىزۋ جانە مەملەكەتتىك ورگانداردىڭ قىزمەتىندە اشىقتىقتى قامتاماسىز ەتۋ بويىنشا بىرقاتار ناقتى تاپسىرمالار بەردى.