شىعىس قازاقستاندا تاسقىننىڭ الدىن الۋ ءۇشىن تىكۇشاقپەن مونيتورينگ جۇرگىزىلدى

وبلىستىق تجد دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, مونيتورينگ جۇرگىزۋ ماقساتىندا ءوڭىر اۋماعىنداعى سۋ تاسقىنى قاۋپى بار ۋچاسكەلەرگە باقىلاۋ جۇرگىزىلدى.

شاراعا شىعىس قازاقستان وبلىسى اكىمىنىڭ ورىنباسارى باقىتجان باياحمەتوۆ, شقو تجد, «قازسەلدەنقورعاۋ» شق فيليالى جانە «قازگيدرومەت»رمك ماماندارى قاتىسقان. اەروۆيزۋالدى باقىلاۋ «وسكەمەن-گلۋبوكوە اۋدانى-التاي اۋدانى-كاتونقاراعاي اۋدانى-وسكەمەن» باعىتى بويىنشا جۇرگىزىلدى.

«مونيتورينگ بارىسىندا بۇقتىرما, كراسنوياركا, گلۋبوچانكا وزەندەرىنىڭ ارنالارى قارالدى. اەروۆيزۋالدى زەرتتەۋلەر تۇراقتى گيدرولوگيالىق جاعدايدى كورسەتەدى. وزەندەردەگى سۋ دەڭگەيى قاۋىپتى شەكتەن تومەن», دەيدى شقو تجد توتەنشە جاعدايلاردىڭ الدىن الۋ باسقارماسىنىڭ باستىعى الەكسەي شتىكەل.

وبلىس اۋماعىندا قار ەريتىن كەزەڭ باستالدى. ءوڭىردىڭ قار باسقان اۋدانى سوڭعى 2 اپتادا 97%-دان 55%-عا دەيىن ازايدى. جەر توڭىنىڭ جوعارى قاباتىنىڭ ەرۋى بايقالادى. سونىمەن قاتار جەر توڭىنىڭ ءبىر مەتردەن استام قاتۋى وبلىستىڭ 6 اۋدانىندا: كۇرشىم, كاتونقاراعاي, بەسقاراعاي, زايسان, التاي جانە بورودۋليحا اۋداندارىندا ساقتالعان.

وبلىستىڭ جازىق اۋماعىنداعى قار جامىلعىسىنىڭ بيىكتىگى 50 سم-دەن اسپايدى, تەك التاي اۋدانىندا 75 سم. سۋ تاسقىنى بولعان جاعدايدا قالالار مەن اۋدانداردىڭ اكىمدىكتەرى 109,6 مىڭ دانا ىدىس-قاپ, 15,5 مىڭ توننا ينەرتتى ماتەريال, 532 توننا ججم دايىنداعان.