اسكەري-تەڭىز كۇشتەرى كاسپي تەڭىزىنىڭ قازاقستاندىق سەكتورىندا ەلدىڭ اسكەري قاۋىپسىزدىگىن, اۋماقتىق تۇتاستىعىن, ەگەمەندىگىن, ەكونوميكالىق مۇددەلەرىن قامتاماسىز ەتۋگە ارنالعان. اسكەردىڭ بۇل ءتۇرى ەل پرەزيدەنتىنىڭ جارلىعىمەن 1993 جىلى قۇرىلعان. بۇگىندە بولىمدەر مەن قۇرامالار وزدەرىنىڭ جاۋىنگەرلىك ماشىقتارىن جەتىلدىرىپ, مەملەكەتىمىزدىڭ قاۋىپسىزدىگىن قامتاماسىز ەتۋ جونىندەگى مىندەتتەردى تابىستى ورىنداي وتىرىپ, ەلدىڭ مۇددەلەرىن قورعاۋعا ماڭىزدى ۇلەس قوسادى.
اسكەري تەڭىزشىلەر وزدەرىنە جۇكتەلگەن مىندەتتەردى ورىنداي وتىرىپ, جىلىنا 240 كۇننەن استام ۋاقىتقا تەڭىزگە شىعادى جانە وسى ۋاقىتتا 3600 كەمە جاتتىعۋى, ساباقتار مەن جاتتىعۋلار وتەدى. ولار مەملەكەتتىك ورگاندارعا تابيعاتتى قورعاۋدا كومەك كورسەتەدى, ەكولوگيالىق اپاتتاردىڭ سالدارىن جويۋعا جانە باسقا دا ءىس-شارالارعا قاتىسادى.
– قازىرگى ۋاقىتتا قازاقستان رەسپۋبليكاسى قارۋلى كۇشتەرىنىڭ اسكەري-تەڭىز كۇشتەرى اۋقىمدى مىندەتتەردى شەشۋگە قابىلەتتى جۇمىس جاساي الاتىن جانە جاۋىنگەرلىك الەۋەتى بار اسكەر ءتۇرى. ونىڭ قۇرامىنا مينا-تارتقىش جانە زىمىران-ارتيللەريالىق كەمەلەر, سونداي-اق قوسالقى كەمەلەر, جاۋىنگەرلىك جانە ماتەريالدىق-تەحنيكالىق قامتاماسىز ەتۋ بولىمشەلەرى, ءتۇرلى كەمەلەر كىرەدى, - دەدى اسكەري-تەڭىز كۇشتەرىنىڭ باس قولباسشىسى كونتر-ادميرال ساكەن بەكجانوۆ.
اسكەري-تەڭىز كۇشتەرىنىڭ وفيتسەرلەرى رەسەيدىڭ, تۇركيانىڭ, گەرمانيانىڭ, قىتايدىڭ, وڭتۇستىك كورەيانىڭ, اقش-تىڭ جەتەكشى اسكەري وقۋ ورىندارىندا ءبىلىم الادى. اسكەري-تەڭىز كۇشتەرىندە وقۋ-جاتتىعۋ ورتالىعى قۇرىلدى. اقتاۋ جانە ورال قالالارىنىڭ ۋنيۆەرسيتەتتەرىندە اسكەري كافەدرالار جۇمىس ىستەيدى. وندا كەلىسىمشارت بويىنشا اسكەري قىزمەتشىلەردى دايىندايدى.
اسكەري-تەڭىز كۇشتەرىنىڭ جۇزۋگە شەبەر جاۋىنگەرلەرىن ەرەكشەلەيتىنى – جوعارى كاسىبيلىك. ولار تىكۇشاقتار مەن قايىقتاردان دەسانت رەتىندە سۋعا تۇسىرىلەدى, قارسىلاستىڭ كەمەگە جاساعان شابۋىلىنا تويتارىس بەرە الادى, سۋ استى مينالارىن جانە مينانىڭ بەلسەندىلىگىن جويۋدى ورىنداي الادى.
جەدەل دايارلىق اياسىندا اسكەري تەڭىزشىلەر باسقا اسكەر تۇرلەرى مەن تەكتەرىنىڭ قۇرامىنان جەدەل توپتارىمەن جەدەل-تاكتيكالىق جيىندارعا, كوماندالىق-شتابتىق جاتتىعۋلارعا, تاكتيكالىق-ارنايى وقۋ-جاتتىعۋلارعا قاتىسادى.
جاۋىنگەرلىك دايارلىق بارىسىندا اسكەري كەمەلەردىڭ ەكيپاجدارى ارميا حالىقارالىق ويىندارىنىڭ «تەڭىز كۋبوگى» كونكۋرسىنا دايارلىق شەڭبەرىندە كۋرستىق مىندەتتەر مەن تەڭىز بياتلونىنىڭ ەلەمەنتتەرىن پىسىقتايدى. اتالعان اسكەرلەر جارىسىندا قازاقستاندىق تەڭىزشىلەر جۇلدەلى ورىندار الدى.
قارۋ-جاراق پەن اسكەري تەحنيكانى, ونىڭ ىشىندە جاۋىنگەرلىك روبوتتاردى پايدالانا وتىرىپ قارۋ-جاراق پەن اسكەري تەحنيكانى قولدانۋ داعدىلارىن, بولىمشەلەردىڭ, كەمەلەردىڭ ۇيلەسىمدىلىگىنە جانە ولاردىڭ جاراقتاندىرىلۋىنا ەرەكشە نازار اۋدارىلادى.
2 ساۋىردە قازاقستان اسكەري-تەڭىز كۇشتەرىنىڭ قۇرىلعانىنا 28 جىل تولۋىن اتاپ وتەدى.