ءساۋىردىڭ 9-ى مەن 11-ءى ارالىعىندا الماتىداعى بالۋان شولاق اتىنداعى سپورت سارايىندا كۇرەس تۇرلەرىنەن توكيودا جالاۋى جەلبىرەيتىن جازعى وليمپيا ويىندارىنا جولداما بەرەتىن ازيا ايماقتىق ىرىكتەۋ ءتۋرنيرى وتەدى. الاتاۋ باۋرايىندا ۇيىمداستىرىلاتىن بالۋاندار باسەكەسىندە كۇرەستەن جاپونياداعى ءدۇبىرلى باسەكەگە سوڭعى ليتسەنزيالار ساراپقا سالىنادى.
بىرەر كۇن بۇرىن قازاقستانىڭ گرەك-ريم كۇرەسى قۇراماسىنىڭ باس باپكەرى الماتىداعى ليتسەنزيالىق تۋرنيرگە قاتىساتىن بالۋانداردىڭ ءتىزىمىن جاريالادى. ءبىزدى قاتتى تاڭعالدىرعانى, «كلاسسيكتەردى» باپتايتىن باقتيار بايسەيىتوۆتىڭ تاڭداۋى 130 كيلو سالماقتاعى 33 جاستاعى نۇرماحان تىناليەۆكە ەمەس, ۇلكەن سپورتپەن قوشتاسىپ, بىرنەشە جىلدان بەرى باپكەرلىك ونەرگە بەت بۇرعان 40 جاستاعى ءاپايتوس بالۋان گەورگي تسۋرتسۋمياعا تۇسكەنى.
2004 جىلى افينا وليمپياداسىنىڭ كۇمىس, 2003 جىلعى الەم چەمپيوناتىنىڭ قولا جۇلدەگەرى اتانعان تسۋرتسۋميا وسىلايشا اراعا ون جىلعا جۋىق ۋاقىت سالىپ ۇلكەن سپورتقا قايتا ورالدى. باس باپكەر ب.بايسەيىتوۆ الماتىداعى ليتسەنزيالىق تۋرنيردە بەلدەسەتىن اۋىر سالماقتاعى سپورتشىلار اراسىنان نە ءۇشىن گەورگيدى تاڭداعانىن بىلاي ءتۇسىندىردى: «گەورگي تسۋرتسۋمياعا توقتالاتىن بولسام, ول بۇل باسەكەگە ءبىر جىل بويى تىنىمسىز دايىندالدى. وقۋ-جاتتىعۋ جيىنى كەزىندە باپكەرلەرگە دە كومەكتەسىپ, ءوزى دە جاتتىعۋدان قول ۇزگەن جوق. قازىر ول ناعىز بابىندا دەپ ايتا الامىن. الداعى جارىسقا قاتىسۋعا ساقاداي ساي بولعان سوڭ, وسى بالۋاندى تاڭدادىق. قازىرگى بابىمەن ول قۇرامادا جۇرگەن ءبىراز بالۋانعا باسەكەلەستىك تانىتا الادى. ءساۋىر ايى تارتىستى جەكپە-جەكتەرگە تولى بولماق. ءبىز ءوز كەزەگىمىزدە جانكۇيەرلەرگە ناعىز مەرەكە سىيلاۋعا تىرىسامىز», دەدى ول.
ال وسىدان ءبىراز ۋاقىت بۇرىن بەرگەن ءبىر سۇحباتىندا ول ەگەر نۇرماحان تىناليەۆ الماتىداعى جارىس الدىندا بابىندا بولسا, اسا اۋىر سالماقتا كۇرەسۋى مۇمكىن دەگەن ەدى. سوعان قاراعاندا, 2012 جانە 2016 جىلعى وليمپيا ويىندارىندا باق سىناعان تىناليەۆ بابىنا ەنىپ ۇلگەرمەگەن سياقتى.
گەورگي تسۋرتسۋميا الماتىداعى ىرىكتەۋ تۋرنيرىندە جاسىنداي جارقىلداپ, توكيو وليمپياداسىنا جولداما جەڭىپ الاتىن بولسا, اراعا 16 جىل سالىپ ليتسەنزيا العان قازاقستانداعى ساناۋلى سپورتشىنىڭ قاتارىنا كىرەدى. گرەك-ريم كۇرەسىنەن وليمپياداعا جولداما بەرەتىن قۇرلىقتىق ىرىكتەۋ جارىسىنا قازاقستان قۇراماسىنان مەيىرجان شەرماحانبەت (67 كيلو), نۇرسۇلتان تۇرسىنوۆ (87 كيلو) جانە ولجاس سىرلىباي (97 كيلو) قاتىسادى.
ۇلتتىق قۇرامانىڭ ۇزاق جىلدار بويى ۇزدىگى اتانىپ, ەكى وليمپياداعا قاتىسقان المات كەبىسپاەۆ ليتسەنزيالىق تۋرنيردەن سىرت قالدى. ول يتاليادا وتكەن رەيتينگتىك ءتۋرنيردىڭ فينالىندا مەيىرجان شەرماحانبەتتەن 0:9 ەسەبىمەن جەڭىلگەن-ءدى. وسىدان سوڭ باپكەرلەر مەيىرجانعا مۇمكىندىك بەرۋدى ءجون ساناعان. ال نۇرسۇلتان تۇرسىنوۆ پەن ولجاس سىرلىباي بيىل ەل چەمپيوناتىندا كوزگە ءتۇسىپ, يتالياداعى تۋرنيردە جۇلدەگەرلەر قاتارىنان كورىنگەن بولاتىن.