قازاقستاندىق تەننيسشى الەكساندر بۋبليك اقش-تىڭ مايامي قالاسىندا ءوتىپ جاتقان «ماستەرس» ءتۋرنيرىنىڭ جارتىلاي فينالىنا شىعا المادى, دەپ حابارلايدى Egemen.kz.
جۇلدە قورى 3 343 785 دوللاردى قۇرايتىن جارىستىڭ باستاپقى باسەكەلەرىندە جەرلەسىمىز سەربيالىق لاسلو دجەرە, اۋستراليالىق دجەسسي داكۆورت جانە امەريكالىق تەيلور ءفريتتستى جولىنان ىعىستىرعان ەدى. شيرەك فينالدا ونىڭ جولى يتاليالىق ياننيك سيننەرمەن قيىستى. 19 جاستاعى اپەننين تۇبەگىنىڭ وكىلى بىلتىر رولان گارروستا ۇزدىك سەگىز ويىنشىنىڭ قاتارىنان كورىنىپ, كوپشىلىك نازارىنا ىلىككەن بولاتىن. بۇل كۇندەرى الەمدىك رەيتينگتە 31 ورىندا تۇرعان سيننەر ودان بولەك اتر تۋرنيرلەرىندە ەكى رەت توپ جاردى. ال ماياميدەگى دودادا ول يۋگو گاستون (فرانتسيا), كارەن حاچانوۆ (رەسەي) جانە ەميل رۋسۋۆۋوريدەن (فينليانديا) باسىم ءتۇسىپ, جارتىلاي فينالدىڭ جولداماسى ءۇشىن تارتىستا ءبىزدىڭ الەكساندر بۋبليكپەن كەزدەستى.
ايتۋلى قوس تەننيسشى اراسىنداعى سايىس 1 ساعات 42 مينۋتقا سوزىلىپ, 7:5, 6:4 ەسەبىمەن ياننيك سيننەردىڭ پايداسىنا شەشىلدى. ەندى يتاليانىڭ ورەنى يسپانيالىق روبەرتو باۋتيستا-اگۋتپەن شەبەرلىك بايقاسادى.