باسكەتبولدان تاياۋدا عانا اياقتالعان جوعارى ليگا كوماندالارى اراسىنداعى قازاقستاننىڭ XXIX چەمپيوناتىندا قاراعاندى وبلىسىنىڭ «قاراعاندى» كلۋبى جۇلدەلى ءۇشىنشى ورىندى جەڭىپ الدى. مۇنداي دەڭگەيدەگى دوداعا تۇڭعىش رەت ءتۇسىپ وتىرعان ۇجىم ءۇشىن بۇل – ۇلكەن جەتىستىك.
تاياۋدا اتالعان كاسىبي كلۋبتى ءوزى قۇرىپ, قازىرگى ۋاقىتتا ونىڭ باسشىسى بولىپ قىزمەت ەتەتىن داستان اياپبەككە جولىعىپ, ءوزىمىزدى قىزىقتىرعان بىرنەشە سۇراققا جاۋاپ العان ەدىك.
– داستان ەرىك ۇلى, جاقىندا عانا اياقتالعان چەمپيونات تۋرالى پىكىرىڭىزدى بىلسەك. ءسىز باسقاراتىن كلۋبتىڭ نەگىزگى قارسىلاستارى كىمدەر بولدى؟
– چەمپيونات وتە تارتىستى ءوتتى. بىزگە قارسى ويناعان جەتى كوماندانىڭ ءبارى دە شەبەرلىكتەرىنە قۇرمەتپەن قاراۋعا تۇرارلىق قارسىلاس بولدى. تۋرنيردە توپ جارعان قىزىلجاردىڭ «بارس», كۇمىسپەن كۇپتەلگەن شىمكەنتتىڭ «قازىعۇرت» كوماندالارىمەن بولعان تەكەتىرەسكە تولى ويىنداردان وزىمىزگە پايدالى كوپ دۇنيە الدىق.
شىنىن ايتقاندا, تۋرنيرگە تۇڭعىش قاتىسىپ وتىرعاندىقتان, ويىندار بىزگە وڭايعا سوقپادى. تاجىريبەمىزدىڭ تولىسپاعانى دا راس ەدى. بيۋدجەتىمىز دە باسقالارعا قاراعاندا ازداۋ بولدى. بىراق وسىنىڭ بارىنە قاراماستان, ءتاۋىر ناتيجەگە قول جەتكىزدىك دەپ ويلايمىن. ءبىز ءۇشىن بۇل – تاريحي وقيعا.
– كوماندا قۇرامىنا قاراپ وتىرساق, نەگىزىنەن ءوزىمىزدىڭ ۇزىن بويلى ۇلاندارىمىز وينايدى ەكەن...
– ءبىزدىڭ كوماندانىڭ قۇرامى تۇگەلگە دەرلىك قاراعاندى وبلىسىنىڭ ويىنشىلارىنان تۇرادى. مىسالى, كلۋبتا قاراعاندى, جەزقازعان, تەمىرتاۋ, بالقاش, شاحتينسك قالالارىنان, كوكپەكتى اۋىلىنان باسكەتبولشىلار ونەر كورسەتەدى.
– كوماندا قۇرامىندا لەگيونەر ويىنشى بار ما؟
– قازىر ءبىزدىڭ كوماندادا نيكولاي مۋحا ەسىمدى ءبىر عانا لەگيونەر ويىنشى بار. وتە تالانتتى باسكەتبولشى. بيىلعى چەمپيوناتتىڭ قورىتىندىسى بويىنشا «ەڭ ۇزدىك ويىنشى» اتاعىنا يە بولدى. تولقۇجات بويىنشا ول – رەسەي ازاماتى. ەندى ءوزىنىڭ ايتۋىنشا, قازاقستاننىڭ ازاماتتىعىن العىسى كەلەدى.
– بولاشاققا دەگەن جوسپارلارىڭىزبەن بولىسسەڭىز. العا قويعان قانداي ماقسات بار؟
– بولاشاققا دەگەن جوسپارىمىز وتە زور. ماسەلەن, باسكەتبول ويىنىن دامىتۋ ىسىندە مەتسەناتتاردىڭ دا كومەگىنە جۇگىنسەك دەيمىز. قازىرگى ۋاقىتتا بىزگە يگور امالاتوۆ دەگەن كاسىپكەر كومەكتەسىپ تۇرادى. ءبىز ونىڭ يەلىگىندەگى زالدا جەڭىلدىكپەن جاتتىعامىز. بولاشاقتا وسى زالدىڭ جانىنداعى ەكى قاباتتى عيماراتتى ساتىپ الىپ, ونى باسكەتبولشىلار تۇراتىن زاماناۋي ۇلگىدەگى جاتاقحاناعا اينالدىرساق دەگەن جوبامىز بار. البەتتە, مۇنىڭ ءبارى بيۋدجەتكە بايلانىستى شەشىلەتىن شارۋالار.
جالپى, ءبىزدىڭ الدىمىزعا قويعان ماقساتىمىز – ەكى جىلدان كەيىن ۇلتتىق ليگاعا شىعىپ, ەلىمىزدىڭ ەڭ مىقتى كوماندالارىمەن كۇش سىناسۋ.
– كومانداداعى تالانتتى ويىنشىلاردى باسقا كلۋبتار جاقسى جالاقى ۇسىنىپ, وزدەرىنىڭ قاتارىنا قوسىپ الماي ما دەگەن قاۋىپ جوق پا؟
– بۇل تاقىرىپتا تالاي اڭگىمە بولعان. ءبىر قۋانارلىعى, جىگىتتەر ۇجىمدى تاستاپ كەتپەيمىز دەپ نىق ايتادى. كومانداداعى بەرەكە-بىرلىك, ىنتىماق, جالپى احۋال ولارعا ۇنايتىن بولسا كەرەك. جانە ولار قاراعاندى باسكەتبول مەكتەبىنىڭ الدىنداعى وزدەرىنىڭ تۇڭعىشتار رەتىندەگى تاريحي ميسسياسىن وتە جاقسى تۇسىنەدى. وسىنداي ازاماتتىق بەرىك ۇستانىمدارى ءۇشىن باسكەتبولشى جىگىتتەرىمىزگە ريزاشىلىعىمدى بىلدىرگىم كەلەدى.
– كوماندانىڭ جاتتىقتىرۋشىلار شتابى تۋرالى ايتا كەتسەڭىز.
– كوماندادا ءبىر عانا جاتتىقتىرۋشى بار, ول ماماننىڭ اتى-ءجونى – الەكساندر الەكساندروۆيچ تيۋتيۋنيك. ءوز ىسىنە بەرىلگەن, وتە تاجىريبەلى جانە بىلىكتى مامان. كەزىندە ول قازاقستان قۇراما كومانداسىنىڭ ساپىندا ونەر كورسەتكەن. جاستار اراسىنداعى الەم چەمپيوناتىنا نەگىزگى ويىنشى رەتىندە قاتىسقان.
– وبلىس سپورتىنىڭ باسشىلىعى تاراپىنان قولداۋ قانداي دەڭگەيدە دەپ ويلايسىز؟
– شىنىن ايتقاندا, كوماندانىڭ بولاشاعى بيۋدجەتىنە بايلانىستى عوي. ءبىر قۋانىشتىسى, جاعدايىمىز ۋاقىت وتكەن سايىن جاقسارىپ كەلەدى. البەتتە, وبلىستاعى باسشىلار تاراپىنان جان-جاقتى قولداۋ بولماسا, ءبىز مۇنداي ناتيجەگە قول جەتكىزبەس تە ەدىك. وسىنداي قامقور نيەت باردا بولاشاعىمىز جارقىن بولۋى ءتيىس دەگەن نىق سەنىمدەمىز.
اڭگىمەلەسكەن
قايرات ءابىلدا,
«Egemen Qazaqstan»
قاراعاندى