مەملەكەت باسشىسى قاسىم-جومارت توقاەۆ اسا كورنەكتى ساۋلەتشى, عالىم ءارى قوعام قايراتكەرى, قالامگەر شوت-امان ىدىرىس ۇلى ءۋاليحانوۆتىڭ دۇنيەدەن وتۋىنە بايلانىستى كوڭىل ايتىپ, جەدەلحات جولدادى, دەپ حابارلايدى Egemen.kz اقورداعا سىلتەمە جاساپ.
«شوت-امان ىدىرىس ۇلى ەلىمىزدە ساۋلەت ونەرىنىڭ قارقىندى دامىپ, جاڭا بەلەسكە كوتەرىلۋى جولىندا كوپ ەڭبەك ءسىڭىردى. كوپتەگەن ەڭسەلى عيماراتتار مەن كورىكتى ەسكەرتكىشتەردىڭ اۆتورى اتاندى. حالقىمىز ونى مەملەكەتتىك ەلتاڭبا اۆتورلارىنىڭ ءبىرى رەتىندە جاقسى بىلەدى. عۇمىرىن شىعارماشىلىق ىزدەنىستەر مەن عىلىمي زەرتتەۋلەرگە ارناپ, قالامگەرلىك جولدا دا جەمىستى جۇمىس جاسادى. رۋحانيات بايلىعىن دامىتۋعا ەداۋىر اتسالىستى. سوڭىنا وشپەس ءىز, سارقىلماس مۇرا قالدىرعان شوت-امان ىدىرىس ۇلىنىڭ جارقىن بەينەسى ۇمىتىلمايدى. حالقىمىز ەسىمىن ءاردايىم ارداق تۇتادى», دەلىنگەن جەدەلحاتتا.