الماتىدا اسا ءىرى كولەمدە التىن كونترابانداسىمەن اينالىسقان قىلمىستىق توپقا قاتىستى سوت ۇكىمى شىقتى, دەپ حابارلايدى Egemen.kz قارجىلىق مونيتورينگ اگەنتتىگىنە سىلتەمە جاساپ.
قىلمىستىق ارەكەتتى الماتى قالالىق ەكونوميكالىق تەرگەپ-تەكسەرۋ دەپارتامەنتى جانە الماتى قالالىق ۇقك دەپارتامەنتىنىڭ قىزمەتكەرلەرى بىرلەسىپ توقتاتتى.
«تەرگەۋ بارىسىندا زەرگەرلىك بۇيىمداردى ساتۋ سالاسىنداعى ەكى كاسىپكەردىڭ «الماتى-انتاليا» اۋە رەيسى ارقىلى قۇنى 68 ملن تەڭگە جالپى سالماعى 3,1 كەلى بىرنەشە التىن قۇيمانى تاسىمالداۋعا تىرىسقانى انىقتالدى. ەكونوميكالىق كونترابانداعا اۋە كومپانيالاردىڭ ءبىرىنىڭ ەكى قىزمەتكەرى كومەكتەسكەن», دەلىنگەن حابارلامادا.
سوت ۇكىمىمەن ايىپتالۋشىلار ەكونوميكالىق كونتراباندانى الدىن الا ءسوز بايلاسۋ ارقىلى اسا ءىرى كولەمدە جاساعانى ءۇشىن كىنالى دەپ تانىلدى. ەكى ۇيىمداستىرۋشىعا ارقايسىسىنا 3,3 ملن تەڭگە ايىپپۇل تۇرىندە, ەكى سىبايلاسقا – 100 ساعاتقا ءماجبۇرلى ەڭبەككە تارتا وتىرىپ, بوستاندىعىن 1 جىل مەرزىمگە شەكتەۋ تۇرىندە جازا تاعايىندالدى. تاركىلەنگەن التىن مەملەكەت كىرىسىنە اينالدىرىلدى.