الەمدەگى سۋ كوزدەرىنىڭ لاستانۋى – وزەكتى ماسەلە. وسىنىڭ الدىن الۋ ءۇشىن سەمەيدەگى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ وقۋشىلارى تىڭ جوبا ويلاپ تاپتى. ولار قايتا وڭدەلگەن پلاستيكالىق بوتەلكەلەردەن تابيعي سۋ قويمالارىن قوقىستان تازالاۋعا ارنالعان روبوت ماكەتىن قۇراستىردى.
– سۋدىڭ لاستانۋى تۋرالى اقپاراتتاردى وقىعانىمدا ءوز كوزىمە ءوزىم سەنە المادىم. وسىنىڭ بارلىعى ادامنىڭ قولىمەن جاسالاتىنى وكىنىشتى. سونىڭ الدىن الۋ ماقساتىندا جوبا جاساپ, سايىستا جەڭىسكە جەتتىم. وعان كوپشىلىكتىڭ نازارى اۋدى. ءسويتىپ ماكەت جاسادىم, – دەيدى ونەرتاپقىش وقۋشى ارۋجان قايمولدينا.
وعان كومەكتەسكەن نۇربول ماقتاەۆ «WRO-2020» دۇنيەجۇزىلىك LEGO روبوتتار وليمپياداسىنىڭ جۇلدەگەرى, قۇلتەمىر جاساۋدىڭ شەبەرى. وقۋشىلاردىڭ ەندىگى ويى – سۋدىڭ بەتىندەگى, تۇبىندەگى قوقىستى جيناۋعا جانە سۋ قويماسىنىڭ ەكولوگيالىق جاعدايىن باقىلاۋعا ارنالعان روبوتتاندىرىلعان كەشەن قۇرۋ. شاعىن ماكەتتەگى روبوتتاندىرىلعان كەشەننىڭ ءوزى ەكى بولىككە ءبولىندى: اەروقايىق جانە جىلجىمالى قالقىمالى مەحانيزم. اەروقايىق روبوتتى كەشەندى سۋ قويماسى ارقىلى بەرىلگەن باعىت بويىنشا جىلجىتۋ فۋنكتسياسىن ورىندايدى. جىلجىمالى قالقىمالى مەحانيزم سۋ استىنداعى جانە ۇستىندە قوقىس جيناۋعا جۇمىلدىرىلادى.
– ءبىزدىڭ روبوتتاندىرىلعان كەشەن سۋ استىنداعى جانە ۇستىندەگى قوقىستاردى جيناپ, بەينەكامەرالار كومەگىمەن سۋ استى الەمىنىڭ جاعدايىن, ونىڭ فاۋناسى مەن فلوراسىن باقىلايدى, – دەيدى جوبا اۆتورلارىنىڭ ءبىرى نۇربول ماقتاەۆ.
جاس زەرتتەۋشىلەردىڭ ەندىگى جوسپارى توكسيندەر مەن زياندى حيميالىق قوسىلىستاردان ءتىرى اعزالارعا زيان تيگىزبەيتىن نەمەسە اسەر ەتپەيتىن سۋدى تازارتاتىن حيميالىق زاتتارعا IGW قوسۋ. سونىمەن قاتار جوبانى جەتىلدىرىپ, «دارىن» سايىسىندا باقتارىن سىناماق. ءبارى ساتىمەن جۇزەگە اسىپ جاتسا, جوبانى پاتەنتتەپ قويۋ كەرەك دەسەدى.
سەمەي