«قازاقكونتسەرت» ۇيىمى دۇنيەجۇزىندەگى ەڭ اۋقىمدى باستاما – «جەر ساعاتى» بۇكىلالەمدىك اكتسياسىنا قاتىستى, دەپ حابارلايدى Egemen.kz.
ساعات 20:30-دا «قازاقكونتسەرت» ۇيىمىنا قاراستى ەلىمىزدىڭ ەڭ ۇلكەن «QAZAQSTAN» ورتالىق كونتسەرت زالى ىشكى جانە سىرتقى جارىق قۇرالدارىن ءسوندىردى. الەمنىڭ ۇزدىك ارحيتەكتۋرالىق جوباسى بولىپ سانالاتىن «QAZAQSTAN» كونتسەرت زالى ەكولوگيالىق ماسەلەلەرگە بەي-جاي قارامايتىندىعىن كورسەتتى.
ەكولوگيا, گەولوگيا جانە تابيعي رەسۋرستار مينيسترلىگىنىڭ ۇيىمداستىرۋىمەن جۇزەگە اسقان اكتسياعا ەلورداداعى وزگە دە 150 نىسان قاتىسىپ, ەلەكتر قۋاتىنان اجىراتىلدى.
جالپى, دۇنيەجۇزىنە تانىمال اكتسياعا جىل سايىن 180 ەلدەن ميلليونداعان ادام قاتىسىپ, 1 ساعاتقا جارىق قۇرالدارىن وشىرەدى. ولاردىڭ قاتارىندا بايتەرەك مونۋمەنتى, ەيفەل مۇناراسى, بيگ بەن, كوليزەي سياقتى الەمنىڭ تانىمال ساۋلەت ەسكەرتكىشتەرى دە بار. ءبىر ساعاتتىق اكتسيا عالامشاردى بىردەن قالپىنا كەلتىرمەسە دە, اۋانى لاستايتىن ەلەكتر قۋاتىن ءبىر ساعاتقا تەجەپ, قاشىقتىققا قاراماستان ادامزاتتىڭ بىرلەسۋىنە ءوز ۇلەسىن قوسادى.