ادىلەت ءمينيسترى مارات بەكەتاەۆ ءوزىن لاۋازىمدى قىزمەتىنەن وتستاۆكاعا كەتۋىن تالاپ ەتىپ, پەتيتسيا ازىرلەگەندەرگە جاۋاپ بەردى, دەپ حابارلايدى Egemen.kz.
«شىنىمەن دە پەتيتسيا ماتىنىمەن تانىسىپ شىقتىم جانە وسىعان بايلانىستى مىنانى ايتقىم كەلەدى. «اكىمشىلىك پروتسەدۋرالار تۋرالى» زاڭعا سايكەس, بۇل پەتيتسيا ۇندەۋ بولىپ سانالادى جانە اتالعان زاڭ بويىنشا لاۋازىمدى تۇلعانىڭ بەلگىلى ءبىر ءىس-ارەكەتىن داۋلايتىن ۇندەۋ سول لاۋازىمدى تۇلعانىڭ وزىنە باعىتتالماۋى ءتيىس. سونداي-اق زاڭ ءىس-ارەكەتى قانداي دا ءبىر تۇردە داۋلاناتىن لاۋازىمدى تۇلعاعا ۇندەۋدىڭ قارالۋ پروتسەسىنە كەدەرگى كەلتىرۋگە, ونىڭ ىشىندە مۇنداي ۇندەۋدىڭ مازمۇنىنا جاريا تۇردە پىكىر بىلدىرۋگە تىيىم سالادى. باسقاشا ايتار بولساق, «اكىمشىلىك پروتسەدۋرالار تۋرالى» زاڭ ماعان اتالعان پەتيتسيا مازمۇنىنا پىكىر بىلدىرۋگە تىيىم سالادى. وتستاۆكاعا ءوتىنىش بەرەيىن دەپ وتىرعانىم جوق», دەدى مارات بەكەتاەۆ ورتالىق كوممۋنيكاتسيالار قىزمەتىندەگى ءباسپاسوز ءماسليحاتى بارىسىندا باق وكىلدەرىنىڭ ساۋالىنا بەرگەن جاۋابىندا.