قىس كەزەڭىنىڭ باسىنان باستاپ ەلىمىزدە 1 135 داۋىلدى ەسكەرتۋ جاريالاندى. اۆتوجولدارىنىڭ ۋچاسكەلەرى 1 481 رەت جابىلدى, جۇك جانە جولاۋشىلار اۆتوكولىكتەرى ءۇشىن قوزعالىس 233 رەت شەكتەلدى, دەپ حابارلايدى Egemen.kz توتەنشە جاعدايلار مينيسترلىگىنىڭ ءباسپاسوز قىزمەتىنە سىلتەمە جاساپ.
اتالعان كەزەڭدە ەلىمىزدىڭ قۇتقارۋشىلارى 1 722 ادامدى, ونىڭ ىشىندە 230 بالانى قۇتقاردى. 1129 ادام, ونىڭ ىشىندە 116 بالا ەۆاكۋاتسيالاندى. 108 جىلىتۋ پۋنكتى جۇمىلدىرىلدى. قار قۇرساۋىنان 1 300-دەن استام تەحنيكا شىعارىلدى.
اۆاريالىق-قۇتقارۋ جۇمىستارىنا تجم, ءىىم, جەرگىلىكتى اتقارۋشى ورگاندار مەن جول قىزمەتتەرىنەن 10 557 ادام جانە 5 245 بىرلىك تەحنيكا جۇمىلدىرىلدى.
ەڭ كۇردەلى جاعداي ەلىمىزدىڭ سولتۇستىك جانە ورتالىق بولىگىندە, الماتى وبلىسىنىڭ ء«ۇشارال-دوستىق» اۆتوجولىنىڭ ۋچاسكەسىندە ورىن الدى. جىل سايىن قىسقى كەزەڭدە اۋا-رايى ناشار بولعان كەزدە وسى ۋچاسكەدە 100-دەن استام جۇك جانە جەڭىل اۆتوموبيل قار قۇرساۋىندا قالادى.
تەك 2020 جىلدىڭ قاراشا ايىنان باستاپ 2021 جىلدىڭ اقپان ايىنا دەيىنگى كەزەڭدە جولدىڭ اتالعان ۋچاسكەسىندە قار قۇرساۋىنان 490-عا جۋىق ادام قۇتقارىلىپ, ەۆاكۋاتسيالاندى جانە 200 بىرلىك تەحنيكا شىعارىلدى.
اۋا رايىنىڭ قولايسىزدىعىنان زارداپ شەككەن حالىقتى قۇتقارۋ بويىنشا اۆاريالىق-قۇتقارۋ جۇمىستارى 12 ساعاتتان استام ۋاقىتقا سوزىلاتىن كەزدەر دە كەزدەسەدى, ال كەيبىر جاعدايلاردا بىرنەشە تاۋلىككە جەتەدى.
قار قۇرساۋىنىڭ سەبەبى - وڭتۇستىك-باتىستان سوققان قاتتى جەل جانە جولدىڭ وسى ۋچاسكەسىندە قار ۇستايتىن قالقانداردىڭ بولماۋى.
تج جانە وقيعالار قاۋپى تۋرالى حالىقتى ەسكەرتۋ ماقساتىندا حالىقتىڭ ۇيالى تەلەفوندارىنا اۋا رايىنىڭ ناشارلاۋى تۋرالى 3 896 سمس-حابارلاما, «دارمەن» موبيلدىك قوسىمشاسى ارقىلى 1 265 حابارلاما جىبەرىلدى.
الدىن الا جاسالعان ەسكەرتۋلەرگە قاراماستان, ادامدار ەلدى مەكەندەردەن تىس جەرلەرگە شىعىپ, قار قۇرساۋىندا قالىپ قويىپ جاتتى.
ماسەلەن, 2021 جىلعى 16 قاڭتاردا الماتى وبلىسى كەربۇلاق اۋدانىندا «سارىوزەك-كوكتال» رەسپۋبليكالىق ماڭىزى بار اۆتوجولىندا قار قۇرساۋىنان 80 ادام, ونىڭ ىشىندە ەكى بالاسى بار جۇكتى ايەل قۇتقارىلدى. قاتتى جەلدەن وسى جولدىڭ 15 جانە 40 شاقىرىمىنداعى ۋچاسكەنى قار باسىپ, سالدارىنان جولاۋشىلارى بار اۆتوكولىكتەر قار قۇرساۋىندا قالىپ قويدى. بۇل تۋرالى الماتى وبلىسىنىڭ تجد حابارلادى. ءبىرىنشى كەزەكتە قۇتقارۋشىلار اي-كۇنى تولعالى جۇرگەن جۇكتى ايىندا ايەلدى قار قۇرساۋىنان ەۆاكۋاتسيالادى, ول ەكى بالاسىمەن تاسىوزەك اۋىلىنان الماتى قالاسىنا بارا جاتقان بولاتىن. قۇتقارۋشىلار ايەل مەن بالالاردى سارىوزەك كەنتىندە تۇراتىن تۋىستارىنا جەتكىزدى. جول قىزمەتتەرىنىڭ قىزمەتكەرلەرىن, اسكەري قىزمەتشىلەردى جانە جەرگىلىكتى اتقارۋشى ورگانداردى جۇمىلدىرا وتىرىپ اۆتوجولداردى تازالاۋ جانە تۇرىپ قالعان اۆتوماشينالاردى سۇيرەپ شىعارۋ جۇمىستارى جۇرگىزىلدى. كەيىننەن اۆتوكولىكتەر ءوز باعىتى بويىنشا قوزعالىستى جالعاستىردى. ساعات 16.30-دا جول قاردان تازارتىلدى.
2021 جىلعى 25 اقپاندا قاراعاندى وبلىسىندا داۋىلدى ەسكەرتۋ جاريالاندى. اۋا رايىنىڭ قولايسىزدىعىنا بايلانىستى بارلىق اۆتوجولداردا كولىك قوزعالىسى جابىلدى. تج دەپارتامەنتىنىڭ, 52859 اسكەري ءبولىمىنىڭ, اپاتتار مەديتسيناسى ورتالىعىنىڭ بولىمشەلەرى جولداردا 79 ادامدى, ونىڭ ىشىندە 7 بالانى قۇتقاردى. قۇتقارۋ جۇمىستارىنىڭ ءبىرى شەت اۋدانىندا جۇرگىزىلدى. قىزىلقوي اۋىلى اۋدانىنداعى «الماتى-ەكاتەرينبۋرگ» اۆتوجولىندا قار قۇرساۋىندا توقتاپ قالعان جەدەل مەديتسينالىق جاردەم ءاۆتوموبيلى مەن جەڭىل اۆتوكولىكتەن 9 ادام قۇتقارىلدى. قۇتقارىلعانداردىڭ ىشىندە ەكى ناۋقاس: ينفاركت العان ەر ادام جانە بوسانعالى جۇرگەن جۇكتى ايەل جول تالعامايتىن كولىكپەن قاراعاندى قالاسىنا جەتكىزىلدى.
بۇحار جىراۋ اۋدانىندا «قاراعاندى-اياگوز-بۇعاز» اۆتوجولىنىڭ 52 شاقىرىمىندا, بوتاقارا كەنتىنەن 5 شاقىرىم جەردە تجد قۇتقارۋشىلارى قار قۇرساۋىندا قالعان اۆتوكولىكتەردەن 37 ادامدى, ونىڭ ىشىندە 2 بالانى قۇتقاردى. ادامدار قاراعاندى قالاسىنا جەتكىزىلدى.
2021 جىلعى 11 ناۋرىزدا قاراعاندى وبلىسى تجد قۇتقارۋشىلارى قر تجم 52859 اسكەري ءبولىمىنىڭ كۇشتەرىمەن بىرلەسىپ وساكاروۆ, بۇقار جىراۋ, جاڭاارقا, اباي اۋداندارىنىڭ, سونداي-اق قاراعاندى جانە تەمىرتاۋ قالالارىنىڭ قار باسقان تراسسالارىنان ادامداردى ەۆاكۋاتسيالاۋ بويىنشا جۇمىستار جۇرگىزدى. وسىلايشا 87 ادام قۇتقارىلدى جانە ەۆاكۋاتسيالاندى.
2021 جىلعى 13-15 ناۋرىز ارالىعىندا شىعىس قازاقستان وبلىسىندا قار قار قۇرساۋىنان 164 ادام, ونىڭ ىشىندە 9 بالا قۇتقارىلدى, 63 بىرلىك تەحنيكانى سۇيرەپ شىعارۋعا كومەك كورسەتىلدى. ادامدار تارباعاتاي, كوكپەكتى, كۇرشىم, قاتونقاراعاي اۋداندارى مەن التاي قالاسىنا اپاراتىن تاس جولداردا قار قۇرساۋىندا قالعان بولاتىن.