ناۋرىزدىڭ سوڭعى ونكۇندىگىندە الماتىداعى ەپيدەميالىق احۋال ناشارلاپ, ىندەتتىڭ بەلەڭ الىپ تۇرعانى بارشاعا ايان. سوندىقتان مەرەكە, دەمالىس دەمەي, قالانىڭ دەنساۋلىق ساقتاۋ باسقارماسى, سانيتارلىق-ەپيدەميولوگيالىق قىزمەتى, مونيتورينگتىك باقىلاۋ توپتارى تىنىمسىز ارەكەت ەتىپ وتىر, دەپ حابارلايدى ەgemen.kz
دەگەنمەن, مەگاپوليستە ىندەتتىڭ ورشۋىنە, ۆاكتسيناتسياعا بايلانىستى, الىپ-قاشتى اڭگىمە جەتكىلىكتى بولعاندىقتان, الماتى قالاسى قوعامدىق دەنساۋلىق باسقارماسىنىڭ وكىلى, تەلەمەديتسينا ورتالىعىنىڭ ديرەكتورى لاۋرا مىرزاعالي باق وكىلدەرىنىڭ بىرقاتار ساۋالدارىنا جاۋاپ بەرىپ, داقپىرت سوزدەردى سەيىلتۋگە ۇمتىلدى.
سوڭعى تاۋلىكتەگى, ياعني 25 ناۋرىزداعى تاڭعى مالىمەتتەرگە سايكەس, الماتىدا كۆي جۇقتىرعان 2246 سىرقات ەمدەلىپ جاتىر. بۇل ىسكە 15 مەديتسينالىق مەكەمە جۇمىلدىرىلعان. ال جانساقتاۋ بولىمدەرىندە 118 ناۋقاس جاتسا, ونىڭ ىشىندە 10 ادامنىڭ جاعدايى وتە اۋىر دەۋگە بولادى. جانە بۇل سىرقاتتاردىڭ بارلىعى دەرلىك جاسى 70-تەن اسقان ۇلكەن كىسىلەر. سول سياقتى سوڭعى تاۋلىكتە قالا اۋرۋحانالارىنا كۆي جۇقتىرعان 238 ادام كەلىپ تۇسكەن, بۇل ازداپ بولسا دا ىندەتتىڭ باسەڭسىگەنىن بايقاتادى. ءدال مەرەكە, ياعني 22 ناۋرىزدا سىرقاتتانعاندار سانى 410 ادامعا جەتكەن بولاتىن.
– ال ىندەتتەن كوز جۇمعان 11 ادامعا كەلەتىن بولساق, ولاردىڭ جاسى 70, 80, 90 جاستان اسقان كىسىلەر. وكىنىشكە وراي, كەيبىر ادامدار وزدەرىنىڭ دەنساۋلىقتارىنا سونشالىقتى سالعىرت قارايدى. اۋرۋى اسقىنىپ, ابدەن دارمەنى قالماعان كەزدە عانا دارىگەرگە جۇگىنەدى, دەيدى لاۋرا مىرزاعالي.