مادەنيەت جانە سپورت مينيسترلىگى, نۇرسۇلتان نازارباەۆ قورى 8-12 جاس ارالىعىنداعى دارىندى بالالاردى «بالا داۋىسى» ۇلتتىق بالالار ءان بايقاۋىنىڭ التىنشى ماۋسىمىنا شاقىرادى, دەپ حابارلايدى Egemen.kz مادەنيەت جانە سپورت مينيسترلىگىنىڭ ءباسپاسوز قىزمەتىنە سىلتەمە جاساپ.
17 ءفيناليستى انىقتايتىن قاشىقتان ىرىكتەۋ كەزەڭى 25 ناۋرىز بەن 15 مامىر ارالىعىندا وتەدى. كاستينگكە قاتىسۋدىڭ بارلىق شارتتارى www.baladauysy.kz سايتىندا جازىلعان, سونداي-اق وتىنىمدەردى قابىلداۋ كەزەڭى بۇگىننەن باستالدى. بايقاۋعا قاتىسۋ تەگىن.
1 ماۋسىم مەن 1 قازان ارالىعىندا «بالا داۋىسى» فينالىنا دايىندىق كەزەڭىندە: فينالعا قاتىسۋشىلار ءۇشىن ۆوكال, اكتەرلىك شەبەرلىك, حورەوگرافيا بويىنشا جەكە ساباقتار وتكىزىلەدى; قايتالانباس جانە ەرەكشە ساحنالىق بەينەنى جاساۋ ماقساتىندا رەجيسسەرلەر, گرافيكا جانە جارىق تۇسىرۋشىلەر, سۋرەتشىلەر, ديزاينەرلەر, ستيليستتەر ولارمەن جۇمىس ىستەيدى.
ايتا كەتەيىك, ىرىكتەۋ كەزەڭىنىڭ ءاربىر قاتىسۋشىسى اتاۋلى ديپلومدار الادى, فيناليستەرگە باعالى سىيلىقتار بەرىلەدى. «بالا داۋىسى» بايقاۋىنىڭ جەڭىمپازى العاشقى كۇندەرىنەن باستاپ جوبا اۆتورى جانە «جاندانۋ الەمى» قورىنىڭ قۇرىلتايشىسى اليا نازارباەۆا تاعايىنداعان اتاۋلى ءبىلىم بەرۋ گرانتىنىڭ يەگەرى اتانادى. سونداي-اق بايقاۋ قورىتىندىسى بويىنشا بالالار اندەرىنىڭ جيناعى شىعارىلادى. بارلىق جاڭا اندەر, الدىڭعى ماۋسىمداردا جازىلعان اندەرمەن «بالا داۋىسى» سايتىندا تانىسۋعا بولادى.
بايقاۋدىڭ فينالى 7 جانە 9 قازان كۇندەرى نۇر-سۇلتان قالاسىندا وتەدى.