وبلىس ورتالىعىنان شالعايدا جاتقان كاتونقاراعاي اۋدانىنىڭ تۇرعىندارى جىلجىمالى مەديتسينالىق كەشەندە تولىق تەكسەرۋدەن ءوتتى. مۇنداي مۇمكىندىك كۇندەلىكتى بولا بەرمەيتىندىكتەن, دەنساۋلىعىنا الاڭداعان اۋىلداعى اعايىنداردىڭ قاتارى كوپ بولدى.
الەۋمەتتىك مەديتسينالىق ساقتاندىرۋ جۇيەسىنىڭ باستى ماقساتتارىنىڭ ءبىرى – كومەك كورسەتۋدىڭ قولجەتىمدىلىگى مەن ساپاسىن جاقسارتۋ. سوندىقتان, ءمامس قاراجاتى ەسەبىنەن اۋىل حالقىنا مەديتسينالىق تۇرعىدا كومەك كورسەتۋدى جىلجىمالى مەديتسينا ارقىلى قولعا العان.
جاقىندا كاتونقاراعاي اۋدانىنىڭ اۋداندىق اۋرۋحاناسىنان اۋىلداردى ارالاۋعا العاش رەت جىلجىمالى مەديتسينالىق كەشەنمەن جابدىقتالعان اۆتوبۋس شىقتى. ولار كۇن رايىنىڭ كۇرت قۇبىلۋىنا قاراماستان, الىستاعى نوۆو-پولياكوۆكا اۋىلىنا دەيىن بارىپ قايتتى.
اۆتوبۋسقا قوندىرىلعان ءموبيلدى دياگنوستيكالىق مەديتسينالىق ورتالىقتىڭ ءبىر ەرەكشەلىگى – جىلى جانە سۋىق جاعدايلاردا جۇمىس ىستەي بەرەدى. مۇنداعى ماماندار كۇنىنە 60-قا جۋىق ناۋقاستى مەديتسينالىق تەكسەرۋدەن وتكىزۋگە قاۋقارلى. مەديتسينا ماماندارىنىڭ قاتارىندا نەۆرولوگ, وفتالمولوگ, سانولوگ, پەدياتر, اكۋشەر-گينەكولوگ, زەرتحاناشى, تەراپەۆت بار. سالوندا گينەكولوگيالىق تەكسەرۋ ءۇشىن دە ورىن قاراستىرىلعان. ماسەلەن, اكۋشەر-گينەكولوگ 25 پاتسيەنتتى قاراپ شىقسا, جالپى پراكتيكا دارىگەرى 52 تۇرعىندى, نەۆروپاتولوگ 20, پەدياتر 6 بالانى تەكسەردى. 20 ادام ساندىق رەنتگەننەن, تاعى سونشا ادام ۋلترادىبىستىق دياگنوستيكادان ءوتتى. كوز جانارى سىر بەرگەن 31 تۇرعىن وكۋليستكە قارالدى. ايتقانداي, حالىق الەۋمەتتىك مەديتسينالىق ساقتاندىرۋ شەڭبەرىندە دارىگەرلىك قىزمەتتەردى تەگىن الدى.
– جىلجىمالى مەديتسينالىق كەشەن ارقىلى اۋىل تۇرعىندارى تولىق تەكسەرۋدەن وتە الدى. ايتپەسە, تەكسەرىلۋ ءۇشىن 60 شاقىرىمداعى اۋدان ورتالىعىنا بارۋعا تۋرا كەلەر ەدى. ول جاقتا ۇزىن-سونار كەزەك كۇتۋىڭ كەرەك. اسىرەسە, بۇل قارتتار مەن بالالار ءۇشىن قيىن. جىلجىمالى كەشەننىڭ كەلگەنىنە اۋىل بولىپ قۋاندىق, – دەيدى نوۆو-پولياكوۆكا اۋىلىنىڭ تۇرعىنى زينايدا پروكوپەۆنا.
ايتا كەتەرلىگى, اۆتوبۋس ليفتىمەن جانە پاندۋسپەن جابدىقتالعاندىقتان, مۇمكىندىگى شەكتەۋلى ادامدارعا دا اسا قيىندىق تۋىنداتپادى. كاتونقاراعاي ورتالىق اۋداندىق اۋرۋحاناسىنىڭ باس دارىگەرى ساۋلە بايگەرەەۆانىڭ ايتۋىنشا, وسىدان بىلاي جىلجىمالى كەشەن اۋىلدارعا تۇراقتى تۇردە بارىپ تۇرادى. سول ماقساتتا جىلجىمالى مەديتسينالىق كەشەننىڭ شالعاي اۋىلدارعا تۇراقتى بارۋ كەستەسى جاسالدى.
شىعىس قازاقستان وبلىسى