اتىراۋدا ناۋرىز مەرەكەسى قارساڭىندا 72 وتباسى جاڭا پاتەرگە يە بولىپ, قۋانىشقا كەنەلدى, دەپ حابارلايدى ەgemen.kz
«نۇرلى جەر» باعدارلاماسىمەن «بەرەكە» شاعىن اۋدانىندا بوي كوتەرگەن باسپانا ءۇش الەۋمەتتىك ساناتقا جاتاتىن مۇقتاج وتباسىلارعا بەرىلدى. ونىڭ ىشىندە كوپ بالالى 27, تۇرمىسى تومەن 28 وتباسى بار. سونداي-اق, اتا-انا قامقورلىعىنسىز قالعان جانە جەتىم 17 تۇرعىن دا جاڭا پاتەردىڭ كىلتىن الدى.
«مەنىڭ وتباسىمدا بەس بالا بار. كوپ جىلدان بەرى باسپانانىڭ قيىندىعىن كورىپ كەلگەن ەدىك. جاڭا پاتەر الساق دەگەن ارمانىمىز ورىندالدى. ناۋرىز مەرەكەسىن جاڭا پاتەردە قارسى الاتىنىمىزعا قۋانىپ تۇرمىن», دەيدى داميرا ەرعاليەۆا.
ال 22 جاستاعى ولەگ ليپاتوۆ ءبىر بولمەلى پاتەردى يەلەندى. ول «شاڭىراق» بالالار اۋىلىندا تاربيەلەنىپ, كەيىن جاسوسپىرىمدەر ءۇيىن پانالاپتى. وسى كەزگە دەيىن اجەسىنىڭ ۇيىندە تۇرعان.
«مىنە, ەندى مەنىڭ ءوز پاتەرىم بار. جاڭا قونىس تويىن ۇيلەنۋمەن ۇلاستىرامىن», دەيدى و.ليپاتوۆ.