ماي اۋدانىنىڭ اكىمدىگى كوپبالالى وتباسىلاردى, جەتىم بالالاردى, مۇمكىندىگى شەكتەۋلى ازاماتتار جانە بيۋدجەتتىك ۇيىمداردىڭ قىزمەتكەرلەرىن, تاعى باسقا دا كەزەكتە تۇرعان ازاماتتاردى تۇرعىن ۇيمەن قامتاماسىز ەتۋ ءۇشىن ارنايى جوبانى قولعا الدى.
اۋدان ورتالىعى كوكتوبە اۋىلىندا تالاي جىل بويى بوس تۇرعان ەسكى جاتاقحانانى «جۇمىسپەن قامتۋدىڭ جول كارتاسى-2020» باعدارلاماسى بويىنشا قايتا جوندەۋ تۋرالى شەشىم قابىلدانىپ, سونىڭ ناتيجەسىندە كوپتەگەن ازامات ءۇيلى بولىپ وتىر.
پاتەر العانداردىڭ قاتارىندا ارسەن تولەۋ, اباي قادىربەك ۇلى, باۋىرجان ءجۇمادىل, اياجان بەكەنوۆا, اباي قاناتبەك ۇلى, ماكسيم پەرستنەۆ, مەيرامگۇل جەڭىسقىزى سياقتى اتا-اناسىنىڭ قامقورلىعىنسىز قالعان جەتكىنشەكتەر بار. ارالارىندا تۇرمىس قۇرىپ, جاڭادان ءۇي بولعاندار پاتەرلى بولعانىنا قۋانىشتى.
– بۇگىن − مەنىڭ وتباسىمنىڭ ومىرىندەگى باقىتتى كۇن, – دەيدى ماكسيم پەرستنەۆ. – پاتەر كەزەگىن ۇزاق كۇتتىك, ەندى ءوز ۇيىمىزدە تۇراتىن بولامىز. الداعى ۋاقىتتا قالدىق قۇنى بويىنشا جەكەشەلەندىرە الاتىنىمىز قۋانتادى.
ال ءاسيات اپاي بولسا, اتا-انا قامقورىنسىز قالعان ماكسيم جانە الەكسەي ەسىمدى ەگىز نەمەرەسىن ءۇش ايلىعىنان باۋىرىنا باسىپتى. ۇلدارى قازىر 16 جاسقا كەلدى, ماكسيم اۋدان ورتالىعىنداعى اگرارلىق كوللەدجدە فەرمەر ماماندىعىندا وقيدى.
ءۇي كەزەگىندە تۇرىپ, پاتەر العانداردىڭ قاتارىندا كوپ بالالى انالار شىنار بەيسەمبەكقىزى, ساعاي كۇلزيرا, اسەم حارماان, اسەم قالايبەكقىزى دا بار.
− وسىلاي جاعداي جاساپ, ەسكى ۇيلەردى جوندەپ, تۇرعىندارعا پاتەر بەرسە, اۋىلدان ەشكىم كەتپەيدى عوي. بىزدەن كەيىنگى كەزەكتە تۇرعان باسقا دا اۋىلداستارىمىزعا ءۇي بەرىلسە دەگەن تىلەگىمىز بار, − دەيدى كوپ بالالى انا شىنار بەيسەمبەكقىزى.
ال پاتەر كىلتىن العان فاريزا مايقىباەۆا − 12 بالا تاربيەلەپ وسىرگەن باتىر انا. جاسى قازىر 75-تە. بالا-شاعا, نەمەرەلەرى ءوسىپ كەلەدى. ءومىر بويى اۋىلدا تۇرىپ, وت جاعىپ, سۋ تاسىعان اپالارىنىڭ جايلى پاتەر العانىنا ءبارى دە قۋانىشتى. شاشۋ شاشىپ, باسقا دا قونىستانۋشىلاردى قۇتتىقتادى.
سونىمەن قاتار ۆ.ابەنوۆا, ج.گروسس, ت.قۇسايىنوۆ, ا.قابىتاەۆا, ف.مايقىباەۆا سەكىلدى الەۋمەتتىك جاعىنان از قامتاماسىز ەتىلگەن وتباسىلار جانە مەملەكەتتىك قىزمەتكەرلەر سەرىك باشەنوۆ, قانات احمەتوۆ, ايگەرىم مۇستاحانوۆا دا پاتەر كىلتىن الدى.
– جالپى, اۋدان ورتالىعىندا ەسكى جاتاقحانانى قايتا جوندەۋ جوباسى تۇرعىن ءۇي كەزەگىن ازايتۋعا سەپ بولدى. ەسكى ۇيلەردى جوندەۋ ءۇردىسى ءارى قاراي جالعاسادى. قازىر 137 تۇرعىن كەزەكتە تۇر. بيىل اۋدان بويىنشا 15 ءتورت پاتەرلى ءۇي سالۋ جوسپارلانىپ وتىر. جاڭا تۇرعىن ءۇي سالۋعا بيۋدجەتتىك ءوتىنىم قارالۋدا, − دەيدى اۋدان اكىمى مارات اقتاەۆ.
ال قايتا جوندەۋدەن وتكەن جاتاقحاناداعى پاتەرلەر زامان تالابىنا ساي. ءبىر, ەكى جانە ءۇش بولمەلى پاتەرلەر بار.
پاۆلودار وبلىسى