ىندەت جۇقتىرعان ادامدى ەمدەۋگە قانشا قاراجات كەتەدى؟

سونىمەن دۇيسەنبىدە قالادا 342 ادامنىڭ ىندەت جۇقتىرعانى انىقتالسا, سەيسەنبى كۇنگى ەپيدەميالىق احۋالعا سايكەس ينفەكتسيا تاعى دا 297 تۇرعىننان تابىلىپ وتىر.

ىندەتتىڭ قايتا باس كوتەرۋىنە بايلانىستى قوعامدىق دەنساۋلىق ساقتاۋ باسقارماسىنىڭ باسشىسى ناريمان تابىنباەۆ جۋرناليستەر ساۋالدارىنا جاۋاپ بەردى. باق وكىلدەرىن اۋرۋحانالار مەن ءدارىحانالاردى ءدارى-دارمەكپەن قامتاماسىز ەتۋدەن باستاپ, ۇشاقتان امان قالعانداردىڭ دەنساۋلىعى, ىندەت جۇقتىرعانداردى ەمدەۋ, اۋرۋحاناعا جاتۋدان باس تارتقان تۇرعىندار ماسەلەسى تولعاندىرادى.

«جاڭا جىلعا دەيىن كوۆيدتى ناۋقاستى ەمدەۋ ءۇشىن كۇن سايىن باعا قۇبىلىپ تۇردى. قازىرگى ۋاقىتتا قوعامدىق دەنساۋلىق ساقتاۋ باسقارماسى تاريفتەردى انىقتادى. كوروناۆيرۋس ينفەكتسياسىنىڭ اۋىر تۇرىمەن اۋىراتىن ءبىر ناۋقاستى ەمدەۋگە 930 مىڭ تەڭگەدەن استام قاراجات بولىنەدى. ءحالى ورتاشا پاتسيەنتتەردى ەمدەۋگە شامامەن 450 مىڭ تەڭگە جۇمسالادى. ءاربىر ناۋقاستىڭ جاعدايى بەلگىلەنگەن تاريفتىك مولشەرلەمەمەن قارالادى. بۇگىنگى تاڭدا دەنساۋلىق ساقتاۋ مينيسترلىگى بولگەن قاراجات كوروناۆيرۋس ينفەكتسياسىمەن اۋىراتىن ناۋقاستارعا تولىقتاي جەتەدى. وعان ءدارى-دارمەكتەر, دارىگەرلەردىڭ, مەدبيكەلەردىڭ جالاقىسى جانە بارلىق قۇرىلعىلاردىڭ جابدىقتارى كىرەدى», دەدى ن.تابىنباەۆ.

«پاندەميا باستالعان كەزدە الماتىدا 500 توسەكتىك ورىن عانا بار ەدى. 2 ينفەكتسيالىق ستاتسيونار جۇمىس ىستەدى. ال 2020 جىلدىڭ شىلدە ايىندا الماتىنىڭ 27 بىردەي مەديتسينالىق ۇيىمى كۆي-مەن اۋىراتىن ناۋقاستارعا ستاتسيونارلىق كومەك كورسەتتى. سونىمەن قاتار, قوعامدىق دەنساۋلىق ساقتاۋ باسقارماسىنىڭ شەشىمىمەن 280 توسەكتىك ورىنعا ارنالعان ي.جەكەنوۆ اتىنداعى مودۋلدىك كلينيكالىق جۇقپالى اۋرۋلار اۋرۋحاناسى, سودان كەيىن 300 ورىنعا ارنالعان بالالار قالالىق مودۋلدىك كلينيكالىق جۇقپالى اۋرۋلار اۋرۋحاناسى جانە 500 ورىندى رۆ-90 ينفەكتسيالىق اۋرۋحاناسىنىڭ ەكىنشى فيليالى پايدالانۋعا بەرىلدى», دەيدى الماتىنىڭ باس دارىگەرى.

13 ناۋقاستىڭ ءحالى وتە ناشار

سوڭعى مالىمەتتەرگە سايكەس ستاتسيونارلاردا 1 239 ادام (ونىڭ ىشىندە 64 بالا) ەمدەلىپ جاتىر. ەرەسەك 13 ناۋقاستىڭ جاعدايى وتە اۋىر. بىلتىر الماتىدا كوروناۆيرۋس ينفەكتسياسىمەن كۇرەس اياسىندا كۆي جانە پنەۆمونيامەن اۋىراتىن ناۋقاستاردى قابىلداۋ ءۇشىن جەتكىلىكتى ورىن قورى جاساقتالعان بولاتىن. باستاپقى مەديتسينالىق-سانيتارلىق كومەك دەڭگەيىندە 298 ءموبيلدى بريگادا قۇرىلدى, وندا 948 قىزمەتكەر جۇمىس ىستەيدى. بۇگىنگى كۇنى قالا بويىنشا 7 011 ينفەكتسيالىق ورىن, ونىڭ ىشىندە 250 رەانيماتسيالىق ورىن بار.

– كۆي جانە پنەۆمونيامەن اۋىرعان پاتسيەنتتەردى ەمدەيتىن ۇيىمدار مەديتسينالىق وتتەگىمەن 100% قامتاماسىز ەتىلگەن. 6 ستاتسيوناردا وتتەگى گازداندىرۋ ستانسالارى سالىندى, ءبىز تاعى 12 ستانسانى پايدالانۋعا بەرۋگە دايىنداپ جاتىرمىز. وسىلايشا, 1 دەڭگەيلى ينفەكتسيالىق اۋرۋحانالاردىڭ جانساقتاۋ جانە رەانيماتسيا بولىمشەلەرىن وتتەگى جابدىقتارىمەن تولىق قامتاماسىز ەتۋ جۇزەگە اسىرىلدى. كونسەرۆاتسيادا اۋىرلىعى جەڭىل دارەجەدەگى پاتسيەنتتەردى ەمدەۋ ءۇشىن سىيىمدىلىعى 1000 پاتسيەنتكە دەيىن قايتا جابدىقتالعان «حالىق ارەنا» سپورت كەشەنى ورنالاسقان, – دەدى ن.تابىنباەۆ.

ەكپە بيۋدجەت ەسەبىنەن سالىنادى

الماتىدا اقپان ايىندا 10 مىڭعا جۋىق مامان ۆاكتسينا العان. ن.تابىنباەۆ ساۋىردە كوروناۆيرۋسقا قارسى ەكپەنىڭ 30 مىڭ دوزاسى قولجەتىمدى بولعان كەزدە ەكپە الاتىنداردىڭ ءتىزىمى كوبەيەتىندىگىن اتاپ ءوتتى. الدىمەن سوزىلمالى كەسەلدەرى بار – جۇرەك, قان تامىرلارى جانە باۋىر اۋرۋى بويىنشا ديسپانسەرلىك ەسەپتە تۇرعاندارعا ۆاكتسينا سالىنادى. قالا جەتكىلىكتى تۇردە ەكپەمەن قامتاماسىز ەتىلسە, تۇرعىنداردى جاپپاي ۆاكتسينالاۋ قولعا الىنادى.

«تاياۋ ۋاقىتتا ءوزىمىزدىڭ وتاندىق ۆاكتسينانى دا كوروناۆيرۋسقا قارسى قولدانامىز. سونداي-اق ۇكىمەت تاراپىنان قىتايلىق جانە امەريكالىق ۆاكتسينانى ەلگە اكەلۋ ماسەلەسى تالقىلانىپ جاتىر. قازىر كەلىسسوزدەر جۇرگىزىلۋدە. ءبىز وسى ەكپەگە ۇلكەن ءۇمىت ارتىپ وتىرمىز. حالىقتى بارىنشا جاپپاي ەكپەمەن قامتاماسىز ەتسەك, ىندەتتىڭ تارالۋىن بارىنشا تەجەۋگە مۇمكىندىگىمىز بار. سوندىقتان, جالپى حالىقتى ۆاكتسينالاۋ ماسەلەسى ءبىز ءۇشىن وتە وزەكتى», دەدى ن.تابىنباەۆ.

قالانىڭ باس دارىگەرى الماتىدا اقپاندا 1 750 مەديتسينا قىزمەتكەرى ەگىلىپ, بارلىعى دا قايتا ۆاكتسينالاۋدان وتكەنىن ايتتى. ال ەكىنشى كەزەڭ 2021 جىلدىڭ 1 ناۋرىزىندا باستالدى. بۇل كەزەڭگە سپۋتنيك V ۆاكتسيناسىنىڭ قوسىمشا 10 800 دوزاسى الىندى. قازىرگى تاڭدا 6 550 ادامعا ەكپە سالىنسا, ولاردىڭ 60 پايىزى – «قاۋىپتى ايماقتا» جۇمىس ىستەيتىن مەديتسينا قىزمەتكەرلەرى, 18 پايىزى – ۇستازدار, 12 پايىزى – قۇقىق قورعاۋ ورگاندارىنىڭ قىزمەتكەرلەرى.

ايتا كەتەلىك, كوروناۆيرۋسقا قارسى ەكپە مەملەكەتتىك بيۋدجەت ەسەبىنەن جۇرگىزىلەدى.

الماتى