پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا وڭدەۋ ونەركاسىبىن دامىتۋ ماسەلەسى قارالدى. يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, ەنەرگەتيكا ءمينيسترى نۇرلان نوعاەۆ, «بايتەرەك» ۇبح» اق باسقارما توراعاسى ايدار ءارىپحانوۆ, قاراعاندى وبلىسىنىڭ اكىمى جەڭىس قاسىمبەك, قوستاناي وبلىسىنىڭ اكىمى ارحيمەد مۇحامبەتوۆ, اقمولا وبلىسىنىڭ اكىمى ەرمەك مارجىقپاەۆ, ماڭعىستاۋ وبلىسىنىڭ اكىمى سەرىكباي ترۇموۆ بايانداما جاسادى.
بيىل ءۇش ءىرى جوبا ىسكە قوسىلادى
يندۋستريا جانە ينفراقۇرىلىمدىق دامۋ ءمينيسترى ب.اتامقۇلوۆ اتاپ وتكەندەي, ەلباسىنىڭ باستاماسىمەن جۇزەگە اسىرىلىپ جاتقان يندۋستريالىق ساياساتتىڭ ناتيجەسىندە وڭدەۋ ونەركاسىبىنىڭ بەرىك تۇعىرىن قۇرۋعا قول جەتكىزىلدى, بۇل پاندەميا جاعدايىندا سالانىڭ ءوسۋ قارقىنىن ساقتاۋعا مۇمكىندىك بەردى.
«بيىل ءبىز فەرروقورىتپا, قۇرىلىس ارماتۋرالارى, بولات قۇبىرلار, تەمىر جانە مارگانەتس كەنىن قايتا وڭدەۋ ءوندىرىسىن ارتتىرۋعا مۇمكىندىك بەرەتىن 6 جوبانى ىسكە قوسامىز. جوسپارلانعان وسىمگە قول جەتكىزۋ ءۇشىن مۇددەلى مەملەكەتتىك ورگاندارمەن جانە بيزنەسپەن بىرلەسىپ, وتاندىق كاسىپورىنداردى شيكىزاتپەن قامتاماسىز ەتەتىن رەتتەۋشى تەتىك ازىرلەنەدى. 2025 جىلعا قاراي ءوندىرىس كولەمى جىلىنا 4 ملن توننا بولاتقا جەتكىزىلىپ, «ارسەلورميتتال تەمىرتاۋ» كومپانياسىنىڭ نەگىزگى تەحنيكالىق قۋاتىن جاڭعىرتۋ جۇمىستارى اياقتالادى. سالىناتىن ينۆەستيتسيا كولەمى – 1,3 ترلن تەڭگە», دەدى ب.اتامقۇلوۆ.
ءتۇستى مەتاللۋرگيادا 2021 جىلعا جوسپارلى كورسەتكىش – 104,5%. مىرىش ءوندىرۋ كولەمى – 18,6%, قورعاسىن – 18,8%, مىس كونتسەنتراتى – 9%, اليۋميني 6% ۇلعايتىلادى. «Bloomberg بولجامىنا قاراساق, قىسقا مەرزىمدى پەرسپەكتيۆادا ءتۇستى مەتالداردىڭ بارلىق ءتۇرى بويىنشا باعا كوتەرىلۋى ءتيىس. وسىعان بايلانىستى نومينالدى ماندە ءتۇستى مەتاللۋرگيا ءوندىرىسىنىڭ ءوسىمى 13% دەڭگەيىندە بولجانىپ وتىر. بۇل ءوندىرىستىڭ جوسپارلانعان كولەمىن قامتاماسىز ەتەدى. ءوندىرىستىڭ قوسىمشا كولەمى جايرەم كەن بايىتۋ كاسىپورنىن, قازمينەرالس اقتوعاي-2 جانە ساتباەۆ تاۋ-كەن بايىتۋ كاسىپورنىن, سونداي-اق التىن شىعارۋ فابريكالارىن ىسكە قوسادى» دەدى ۆەدومستۆو باسشىسى.
تيتان ءوندىرىسى بويىنشا الەمدىك كوشباسشىلاردىڭ ءبىرى – وسكەمەن تيتان-ماگني كومبيناتىن شيكىزاتپەن تولىق جۇكتەۋ ءۇشىن ەەك شەڭبەرىندە تيتان شيكىزاتىنا سالىناتىن كەدەندىك باجداردى الىپ تاستاۋ بويىنشا جۇمىستار جۇرگىزىلەدى. 2025 جىلعا دەيىنگى مەرزىمدە الماتى وبلىسىندا كوكساي مىس كەن ورنىن يگەرۋ جوباسى ىسكە اسىرىلادى. ونىڭ قۋاتى جىلىنا 25 ملن توننا بولادى جانە پاۆلودار قالاسىنداعى قۋاتى 250 مىڭ توننا باستاپقى اليۋميني بولاتىن «قازاقستاندىق ەلەكتروليز زاۋىتىنىڭ» ەكىنشى كەزەگى سالىنادى.
حيميا ونەركاسىبىندە ناقتى كولەم يندەكسىنىڭ سالاداعى ۇلەسى 57%-دى قۇرايتىن ءىرى كاسىپورىنداردىڭ ءوندىرىس كولەمىنىڭ ۇلعايۋى ەسەبىنەن 102%-عا جەتۋى ءتيىس. ماشينا جاساۋ سالاسىندا دا ءوسىم بولادى دەپ جوسپارلانعان. ناقتى كولەم يندەكسى 113%-دى قۇرايدى. نەگىزگى ءوسىم ماشينا جاساۋ سالاسىنداعى ۇلەسى 35%-دى قۇرايتىن اۆتوموبيل قۇراستىرۋ سەكتورى ەسەبىنەن بولادى. بيىل فارماتسەۆتيكا سالاسىنىڭ ءوندىرىس كولەمى 105% دەڭگەيىندە جوسپارلانعان. نەگىزگى ءوسىم ءدارى-دارمەك ءوندىرىسىنىڭ 10,2%-عا ۇلعايۋى ەسەبىنەن قامتاماسىز ەتىلەدى. كوروناۆيرۋس ينفەكتسياسىنا قارسى ۆاكتسينا ءوندىرىسىن جانە 5 جاڭا وندىرىستىك قۋاتتى ىسكە قوسۋ وڭ اسەر ەتەدى. جەڭىل ونەركاسىپ بويىنشا جوسپارلانعان ناقتى كولەم يندەكسى – 105%. توقىما ونىمدەرىن ءوندىرۋ كولەمى 6%, ونىڭ ىشىندە ماقتا-ماتا ءيىرىم ءجىبى – 50%, ماتا – 14%, كىلەم – 19%, كيىم – 11%, تەرى 30,4%-عا ۇلعايادى. قۇرىلىس ماتەريالدارى وندىرىسىندە ناقتى كولەم يندەكسى 106% دەڭگەيىندە جوسپارلانعان.
«مەملەكەت باسشىسىنىڭ وڭدەۋ ونەركاسىبى كولەمىن 2025 جىلعا قاراي 1,5 ەسەگە ارتتىرۋ جونىندەگى تاپسىرماسىن جەرگىلىكتى اتقارۋشى ورگاندارمەن بىرلەسىپ ورىندايمىز. قازىرگى ۋاقىتتا ءبىز وڭىرلەر مەن سالالار بويىنشا 2025 جىلعا دەيىنگى وڭدەۋ ونەركاسىبى ءوندىرىسىنىڭ كولەمى بويىنشا جوسپارلى كورسەتكىشتەردى ايقىندادىق», دەپ تۇيىندەدى ب.اتامقۇلوۆ.
ءوز كەزەگىندە ەنەرگەتيكا ءمينيسترى ن.نوعاەۆ ەلىمىزدىڭ ەنەرگيا قاۋىپسىزدىگىن قامتاماسىز ەتۋ ماقساتىندا وتىن-ەنەرگەتيكالىق كەشەن ساياساتى مۇناي-گاز حيمياسىن دامىتۋ بولىگىندە وڭدەۋدى تەرەڭدەتۋگە جانە ىشكى نارىقتا باسەكەلەستىكتى دامىتۋعا نەگىزدەلەتىنىن اتاپ ءوتتى. بيىل 17 ملن توننا كولەمىندە مۇناي وڭدەپ, 12,4 ملن توننا مۇناي ونىمدەرىن ءوندىرۋ جوسپارلانعان.
ەل پرەزيدەنتى 2020 جىلعى 1 قىركۇيەكتەگى قازاقستان حالقىنا ارناعان جولداۋىندا باتىس وڭىرلەردى مۇناي-حيميا كەشەندەرىنىڭ قۇرىلىسىنا ينۆەستيتسيالار تارتۋ ورتالىقتارى رەتىندە قالىپتاستىرۋ, سونداي-اق مۇناي-حيميا مەن جوعارى ءبولىنىستى گاز وڭدەۋدى دامىتۋ مىندەتىن قويدى. «سوڭعى 4 جىلدا شىعارىلعان ءونىم كولەمى 4 ەسە ءوسىپ, 360 مىڭ توننانى قۇرادى. بۇگىندە ەلىمىزدە جالپى قۋاتى شامامەن 870 مىڭ توننانى قۇرايتىن مايلاۋ ماتەريالدارىن, پوليپروپيلەن, مەتيل-ترەت-بۋتيل ەفيرىن, بەنزول مەن پاراكسيلول وندىرەتىن 5 زاۋىت جۇمىس ىستەيدى», دەدى ن.نوعاەۆ.
Nur Otan پارتياسىنىڭ «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسى شەڭبەرىندە اتىراۋ, ورال جانە شىمكەنت قالالارىندا مۇناي مەن گازدى تەرەڭ وڭدەيتىن 5 زاۋىتتى ىسكە قوسۋ ارقىلى ەكسپورتقا باعىتتالعان مۇناي-گاز حيمياسى ونىمدەرىنىڭ ءوندىرىسىن 2019 جىلمەن سالىستىرعاندا 9 ەسەگە ۇلعايتۋ كوزدەلگەن. بۇگىندە 3 زاۋىت سالىنۋدا.
بۇدان باسقا, 2025 جىلعا قاراي 2 الەۋەتتى جوبانى ىسكە اسىرۋ جوسپارلانۋدا. ولار – قۋاتى جىلىنا 430 مىڭ توننا پوليەتەلەنتەرەفتالات ءوندىرۋ زاۋىتى; قۋاتى جىلىنا 130 مىڭ توننا مەتانول ءوندىرۋ زاۋىتى.
ارنايى ەكونوميكالىق ايماق ىسكە قوسىلعاننان باستاپ 2021 جىلعى 1 اقپانداعى جاعداي بويىنشا: تارتىلعان جەكە ينۆەستيتسيالار كولەمى – 598,3 ملرد تەڭگە, شىعارىلعان ءونىم كولەمى – 20,3 ملرد تەڭگە. 793 ادامعا تۇراقتى جۇمىس ورنى, 3 002 ادامعا ۋاقىتشا جۇمىس ورنى قۇرىلدى.
مەملەكەت باسشىسى قاڭتار ايىندا وتكەن ۇكىمەتتىڭ كەڭەيتىلگەن وتىرىسىندا ىسكە اسىرىلىپ جاتقان مۇناي-گاز حيمياسى وندىرىستەرىن جەدەلدەتۋ جونىندە شارالار قابىلداۋ, سونداي-اق الەۋەتتى ينۆەستورلار ءۇشىن تارتىمدى جاعدايلار جاساۋ مىندەتىن قويدى. وسىعان وراي ۇكىمەت پەن ينۆەستور اراسىندا مەملەكەتتىك قولداۋدىڭ بارلىق شارالارىن ءبىر قۇجاتتا بىرىكتىرۋگە مۇمكىندىك بەرەتىن ينۆەستيتسيالىق كەلىسىم ازىرلەۋ قاجەت. اتالعان كەلىسىم مىناداي ناتيجەلەرگە قول جەتكىزۋگە مۇمكىندىك بەرەدى: مۇناي-گاز حيمياسى ونىمدەرىن ءوندىرۋ كولەمى 2020 جىلمەن سالىستىرعاندا 2025 جىلعا قاراي 5,5 ەسەگە ارتىپ, 2 ملن توننادان استام ءونىمدى قۇرايدى. مالىمدەلگەن جوبالاردى ىسكە اسىرۋ ءۇشىن تارتىلعان قاراجاتتىڭ جالپى كولەمى شامامەن 3,9 ملرد دوللاردى قۇرايتىن بولادى. قۇرىلىس كەزەڭىندە 6 مىڭنان استام جۇمىس ورنى, پايدالانۋ كەزەڭىندە شامامەن 2 مىڭ جۇمىس ورنى قۇرىلماق. بۇل رەتتە ساراپشىلاردىڭ باعالاۋى بويىنشا, مۇناي-گاز حيمياسى سالاسىندا 1 جۇمىس ورنى ەكونوميكانىڭ ارالاس سالالارىندا قوسىمشا 3 جۇمىس ورنىن قۇرادى.
قۋاتى جىلىنا 1 250 مىڭ توننا پوليەتيلەن ءوندىرۋ جوباسى بويىنشا بۇگىنگى تاڭدا ستراتەگيالىق سەرىكتەستى ىزدەستىرۋ جۇمىسى جۇرگىزىلۋدە. قازىرگى ۋاقىتتا Chevron Phillips Chemical كومپانياسىمەن كەلىسسوزدەر باستالدى, ول ءوزىنىڭ «MarTECH» ليتسەنزيالىق تەحنولوگياسىن جانە off-take كەلىسىمشارتىن سۇيەمەلدەۋگە قاتىستى كومەگىن ۇسىندى. ىنتىماقتاستىق, ونىڭ ىشىندە جوباعا قاتىسۋ تۋرالى ەگجەي-تەگجەيلى ماسەلەلەر جاقىن ارادا تالقىلانادى.
پرەزيدەنت تاپسىرماسى بويىنشا بيىل قاشاعان كەن ورنىنىڭ شيكىزاتى بازاسىندا قۋاتى 1,150 ملرد تەكشە مەتر شيكى گاز, قۇنى 860 ملن دوللاردى قۇرايتىن گاز وڭدەۋ زاۋىتىنىڭ قۇرىلىسىن باستاۋ جوسپارلانىپ وتىر. بولاشاقتا ونى جىلىنا 4-5 ملرد تەكشە مەترگە دەيىن ودان ءارى كەڭەيتۋ قاراستىرىلۋدا.
دامۋ سەرپىندى بولۋى ءتيىس
ماسەلەنى قورىتىندىلاعان ۇكىمەت باسشىسى اسقار مامين مەملەكەت باسشىسى قاسىم-جومارت توقاەۆتىڭ جولداۋىنا جانە Nur Otan پارتياسىنىڭ سايلاۋالدى باعدارلاماسىنا سايكەس, ۇكىمەت الدىنا 2025 جىلعا قاراي وڭدەۋ ونەركاسىبى ءوندىرىسىن 1,5 ەسەگە ۇلعايتۋ مىندەتى قويىلعاندىعىن اتاپ كورسەتتى. بيىل قارا مەتاللۋرگيانىڭ 5%-عا ءوسۋىن قامتاماسىز ەتۋ جوسپارلانۋدا, ونىڭ ىشىندە فەرروقورىتپا ءوندىرىسىن 10,4%-عا, بولاتتى 17%-عا جانە پروكات ءوندىرىسىن 19%-عا, ءتۇستى مەتاللۋرگيانى 4,5%-عا, ونىڭ ىشىندە مىرىشتى 18,6%-عا, قورعاسىندى 18,8%-عا, مىس كونتسەنتراتىن 9%-عا, ءاليۋمينيدى 6%-عا ارتتىرۋ كوزدەلگەن. حيميا سالاسىندا فوسفور تىڭايتقىشتارى, امموفوس, اممياك سەليتراسى جانە حروم قوسىلىستارى ءوندىرىسىنىڭ ءوسۋى كۇتىلۋدە.
ماشينا جاساۋدا اۆتوموبيل جاساۋدى (+29%), تەمىر جول ۆاگوندارىن (+180%), اۋىل شارۋاشىلىعى تەحنيكاسىن (+58%) جانە اككۋمۋلياتورلاردى (+10%) قوسا العاندا, 13%-عا ءوسىم كۇتىلەدى. فارماتسەۆتيكا سالاسىنىڭ ءوندىرىس كولەمىنىڭ ءوسۋى 5% دەڭگەيىندە جوسپارلانعان, بۇل ءدارى-دارمەكتەر ءوندىرىسىن 10,2%-عا ۇلعايتۋ, كوروناۆيرۋس ينفەكتسياسىنا قارسى ۆاكتسينا شىعارۋ ءوندىرىسىن ىسكە قوسۋ جانە 5 جاڭا جوبا ەسەبىنەن قامتاماسىز ەتىلەدى.
تەمىر-بەتون بۇيىمدارى, كىرپىش, تسەمەنت, قۇرىلىس ەرىتىندىلەرى, جىلۋ وقشاۋلاعىش ماتەريالدار, گيپسوكارتون وندىرىستەرىنىڭ 16-11% ۇلعايۋى ەسەبىنەن, جالپى قۇرىلىس ماتەريالدارى وندىرىسىندە 6% دەڭگەيىندە ءوسىمدى قامتاماسىز ەتۋ جوسپارلانۋدا.
«بيىل وڭدەۋ ونەركاسىبىنىڭ ناقتى كولەم يندەكسى كورسەتكىشىنىڭ 5,8% دەڭگەيىندە وسۋىنە قول جەتكىزۋىمىز كەرەك. ماشينا جاساۋدا, قارا مەتاللۋرگيادا, جەڭىل ونەركاسىپتە, فارماتسەۆتيكادا, تاماق ونىمدەرىمەن, قۇرىلىس ماتەريالدارىنىڭ وندىرىسىندە ءوسىمدى ءارى قاراي قامتاماسىز ەتۋىمىز قاجەت. بيىل جالپى سوماسى 2 ترلن تەڭگەگە جۋىق 110 وڭدەۋ جوباسىن ەنگىزۋ كەرەك», دەدى ا.مامين.
ۇكىمەت باسشىسى وندىرىستىك پروتسەستەرگە جاڭا تەحنولوگيالاردى ەنگىزۋ جونىندەگى الەمدىك ترەندتەردى ەسەپكە الۋدىڭ ماڭىزدىلىعىن, تسيفرلى يننوۆاتسيالىق شەشىمدەردى ەنگىزەتىن كاسىپورىنداردى قوسىمشا ىنتالاندىرۋ شارالارىن, سونداي-اق جۇمىس كۇشىنىڭ ونىمدىلىگى تومەن سەكتورلاردان اناعۇرلىم ءونىمدى سەكتورلارعا اۋىسۋىن ىنتالاندىرۋ شارالارىن قابىلداۋ قاجەت ەكەنىن اتاپ ءوتتى. «مەملەكەت باسشىسى قاسىم-جومارت توقاەۆ قازاقستاندى دامىتۋدىڭ 2025 جىلعا دەيىنگى ۇلتتىق جوسپارىن بەكىتتى, ونىڭ نەگىزگى باسىمدىعى «مىقتى ەكونوميكا» قۇرۋ بولىپ ايقىندالدى. ستراتەگيالىق سالالاردا ۇلتتىق جوبالار قۇرىلاتىن بولادى. مۇندا وڭدەۋ سەكتورىنا ەرەكشە نازار اۋدارىلعان», دەدى ا.مامين.
پرەمەر-مينيستر Nur Otan پارتياسىنىڭ سايلاۋالدى باعدارلاماسىن ورىنداۋدىڭ جول كارتاسىنا سايكەس 2025 جىلعا قاراي ەكسپورتقا باعدارلانعان مۇناي-گاز حيمياسى ونىمدەرى ءوندىرىسىنىڭ 9 ەسە ءوسۋىن قامتاماسىز ەتۋ قاجەتتىگىن اتاپ ءوتتى. وسىعان بايلانىستى ۇكىمەت باسشىسى ەنەرگەتيكا مينيسترلىگىنە «سامۇرىق-قازىنا» ۇاق» اق-مەن بىرلەسىپ, بيىل اتىراۋ وبلىسى مەن شىمكەنتتە ءۇش مۇناي-گاز حيمياسى زاۋىتىن پايدالانۋعا بەرۋدى تاپسىردى, بۇل مۇناي-گاز حيمياسىنداعى ءوندىرىس كولەمىن 400 مىڭ تونناعا دەيىن ۇلعايتۋعا مۇمكىندىك بەرەدى.
حالىقتى ۆاكتسينامەن قامتۋ جاقسارا تۇسەدى
سونداي-اق ۇكىمەت وتىرىسىندا ەلىمىزدەگى سانيتارلىق-ەپيدەميالىق جاعداي قارالدى. دەنساۋلىق ساقتاۋ ءمينيسترى الەكسەي تسوي, نۇر-سۇلتان قالاسىنىڭ اكىمى التاي كولگىنوۆ, الماتى وبلىسىنىڭ اكىمى اماندىق باتالوۆ, باتىس قازاقستان وبلىسىنىڭ اكىمى عالي ەسقاليەۆ, پاۆلودار وبلىسىنىڭ اكىمى ابىلقايىر سقاقوۆ بايانداما جاسادى.
ماسەلەنى قورىتىندىلاعان ۇكىمەت باسشىسى اسقار مامين قازىرگى تاڭدا قازاقستاندا, اسىرەسە, «قىزىل ايماققا» كىرگەن الماتى, نۇر-سۇلتان قالالارىندا جانە باتىس قازاقستان وبلىسىندا كوروناۆيرۋسپەن سىرقاتتانۋشىلىقتىڭ ۇلعايۋى بايقالعانىن اتاپ ءوتتى. الماتى, قاراعاندى, اقمولا جانە اتىراۋ وبلىستارىندا اۋىرعاندار سانى وسۋدە. رەسپۋبليكا بويىنشا ۆيرۋستىڭ رەپرودۋكتيۆتىك كورسەتكىشى 1,1-ءدى قۇرايدى. جۇقپالى اۋرۋلار اۋرۋحانالارىنىڭ تولۋى 24%, رەانيماتسيالىق توسەكتىك ورىندارىنىڭ تولۋى 16%-دى قۇرايدى. وتكەن تاۋلىكتە كۆي+ 954 جاعدايى جانە كۆي- 7 جاعدايى تىركەلدى.
ەلىمىزدە رەسەيلىك ۆاكتسينانى شىعارۋ جولعا قويىلدى جانە وتاندىق ۆاكتسينا دا تىركەلەتىن بولادى. حالىقتى ۆاكتسينالاۋ اقپان ايىندا باستالدى. قازىرگى ۋاقىتتا 95 مىڭنان استام ادامعا ۆاكتسينا سالىندى. ءبىرىنشى بولىپ مەديتسينا قىزمەتكەرلەرى, سودان كەيىن پەداگوگتەر, كۇش قۇرىلىمدارىنىڭ قىزمەتكەرلەرىنە ۆاكتسينا سالىندى. ۆاكتسينا العانداردىڭ بارلىعىنىڭ جاعدايى جاقسى, پرەپاراتقا قالىپتى توزىمدىلىگىن جانە جاعىمسىز رەاكتسيانىڭ جوقتىعىن كورسەتتى. ءساۋىر ايىندا ۆاكتسينا الاتىنداردىڭ سانى, ونىڭ ىشىندە اعا بۋىن وكىلدەرى اراسىندا ايتارلىقتاي ارتادى.
ۇكىمەت باسشىسى ۆاكتسينا الۋدىڭ قولجەتىمدىلىگىن قامتاماسىز ەتۋ جانە جاپپاي ەگۋ پاندەميامەن كۇرەستە باستى مىندەت ەكەنىن اتاپ ءوتتى. «ۆاكتسينالاۋ حالىقتىڭ ۇجىمدىق يممۋنيتەتىن قالىپتاستىرۋعا جانە ينفەكتسيانىڭ ودان ءارى تارالۋىن شەكتەۋگە مۇمكىندىك بەرەدى. ءدال وسى فاكتور – پاندەميامەن كۇرەستە, سونداي-اق ەكونوميكالىق ءوسىمدى قالپىنا كەلتىرۋدە اسا ماڭىزدى», دەدى ا.مامين.
ۆاكتسينا سالىناتىندار سانىن ۇلعايتۋ ماقساتىندا پرەمەر-مينيستر ۆاكتسينانى ساقتاۋ جانە تاسىمالداۋ ءۇشىن قاجەتتى جاعدايلارى بار ەگۋ كابينەتتەرىن قوسىمشا اشۋدى, ازاماتتارعا اقپاراتتىق-ءتۇسىندىرۋ جۇمىستارىن كۇشەيتۋدى تاپسىردى. «اكىمدىكتەردىڭ سايتتارىندا ۆاكتسينالاۋ, ونىڭ پايداسى, ەگۋ پۋنكتتەرىنىڭ مەكەنجايلارى تۋرالى تولىق اقپارات جوق. حالىق اراسىندا ۆاكتسينالاۋدىڭ ماڭىزدىلىعى تۋرالى دۇرىس پىكىر قالىپتاستىرۋ ءۇشىن جۇرتشىلىق پەن مەديتسينا قىزمەتكەرلەرى اراسىندا سەمينارلار ۇيىمداستىرۋ قاجەت», دەدى ا.مامين.
دەنساۋلىق ساقتاۋ مينيسترلىگىنە وسى جىلدىڭ ناۋرىز ايىنىڭ سوڭىنا دەيىن ەگۋ پۋنكتتەرىنىڭ دايىندىعىن باقىلاۋ جانە ۆاكتسينانىڭ قاجەتتى مولشەرىن ۋاقتىلى جەتكىزۋگە قاتىستى بارلىق ماسەلەنى شەشۋ تاپسىرىلدى.
وڭىرلەردىڭ اكىمدىكتەرىنە حالىقتىڭ, اسىرەسە ۇجىمداردا جانە ءبىلىم بەرۋ ۇيىمدارىندا شەكتەۋ شارالارىن ساقتاۋىن قامتاماسىز ەتۋ, ادامدار كوپ جينالاتىن ويىن-ساۋىق ءىس-شارالارىن وتكىزۋگە جول بەرمەۋ, ىشكى ىستەر, دەنساۋلىق ساقتاۋ مينيسترلىكتەرىمەن بىرلەسىپ, مونيتورينگتىك توپتاردىڭ جۇمىسىن كۇشەيتۋ جانە ءتارتىپ بۇزۋشىلاردى قاتاڭ جاۋاپكەرشىلىككە تارتۋ مىندەتتەلدى.
دەنساۋلىق ساقتاۋ مينيسترلىگىنە اكىمدىكتەرمەن بىرلەسىپ, اۋرۋ وشاقتارىندا جەدەل شارا قولدانىپ, شەكتەۋ شارالارىن قايتا قاراۋ تاپسىرىلدى. «ناۋقاستارمەن بايلانىستا بولعان بارلىق ادامعا كوروناۆيرۋسقا تەستىلەۋ مىندەتتى تۇردە جۇرگىزىلىپ, ولار باقىلاۋدا بولۋى كەرەك. بۇل رەتتە كۇندەلىكتى جۇرگىزىلەتىن پتر-تەستىلەۋ دەڭگەيى تومەندەمەۋى ءتيىس», دەدى ا.مامين.