ءۇش ەلدىڭ ساحناسىنان سامعاعان ءان

«وسىناۋ ايتۋلى كونتسەرتكە قاتىسۋ  مەن ءۇشىن ۇلكەن قۇرمەت, دەپ اتاپ ءوتتى جۇپار عابدۋللينا مەرەكەلىك ءان جوباسى تۋرالى. – بيىل مادەني قاۋىمداستىق الەمگە ايگىلى وپەرا ءانشىسى, تاڭعاجايىپ داۋىس يەسى, الت, ەرىك قۇرمانعاليەۆتىڭ تۋعانىنا 62 جىل تولۋىن اتاپ وتۋدە. ول بىرەگەي ورىنداۋ­شى بولدى, ونىڭ ليريكالىق نازىك داۋسىن تەك قازاقستاندا عانا ەمەس, سونىمەن قاتار بارشا الەم ۇيىپ تىڭدادى, جاقسى كوردى. ول كلاسسيكالىق مۋزىكانىڭ ءتۇرلى جانرلارىن, سونىڭ ىشىندە باروككو, باتىس ەۋروپالىق, ورىس جانە قازاق مۋزىكاسىن, مىسالعا, ابايدىڭ «كوزىمنىڭ قاراسى» مەن باسقا دا كوپتەگەن قازاق حالىق اندەرىن ورىندادى.

حالىقارالىق كونتسەرت-تەلەكوپىردىڭ ونلاين فورماتتاعى كورسەتىلىمىن وتكىزۋگە ەرىك قۇرمانعاليەۆپەن ءار كەزدەرى بىرگە جۇمىس ىستەگەن مۋزىكانتتار مەن ونىڭ جا­قىن دوستارى اتسالىستى. «استانا وپەرا» تەاترىنىڭ كامەرالىق زالىندا قازاق­ستاننىڭ ەڭبەك سىڭىرگەن قايراتكەرى, «استانا وپەرانىڭ» جەتەكشى ءسوليسى جۇپار عابدۋللينا «استانا وپەرا» تەاترىنىڭ كونتسەرتمەيستەرى جانار اح­مەتوۆامەن بىرلەسىپ ونەر كورسەتتى, سونىمەن قاتار مۋزىكالىق كەشكە تانىمال انشىلەر: رەسەيدىڭ ەڭبەك سىڭىرگەن ءارتىسى, ۇلكەن تەاتردىڭ ءسوليسى لاريسا رۋداكوۆا (سوپرانو), ۇلكەن تەاتردىڭ ءسوليسى, حا­لىق­ارالىق بايقاۋلاردىڭ لاۋرەاتى رۋس­تام ياۆاەۆ (كونتر-تەنور), پيانيست ءارى مۋزى­كاتانۋشى الەكساندر كوتوۆششيكوۆ, «يزرايل وپەراسىنىڭ» سوليستەرى الەكسەي كانۋننيكوۆ (باس-باريتون), ليليا گرەتسوۆا (سوپرانو), بوريس كوستينەتسكي (كونتر-تەنور), سوفيا لەششينسكايا (مەتستسو-سوپرانو), يلونا تويۆيس (سوپرانو) جانە يزرايل وپەراسىنىڭ كونتسەرتمەيستەرى الەكساندر يۆانوۆ قاتىستى.

باعدارلامانىڭ تاعى ءبىر ەرەكشەلىگى, كونتسەرتكە قاتىسۋشىلار ەرىك قۇرمان­عاليەۆتىڭ رەپەرتۋارىنداعى تۋىندىلاردى ورىندادى.

ەسكە سالار بولساق, ونەر يەسىنىڭ 55 جىلدىعى قۇرمەتىنە بەلگىلى اقىن مار­جان ەرشۋدىڭ «ەركىن قۇرمانعاليەۆ» اتتى كىتابى جارىق كورگەن بولاتىن. عۇمىر­نامالىق ەڭبەكتە كسرو اۋماعىندا ءبىرىنشى كونتر-تەنور اتانعان ءانشىنىڭ ءومىرى مەن ونەرى جايىندا ەگجەي-تەگجەيلى باياندالادى.

«بۇكىل ادامزاتقا ۇلكەن ءان مۇراسىن قالدىرعان ەرىك قۇرمانعاليەۆ كىم ەدى؟ ول 1959 جىلى 31 جەلتوقساندا اتىراۋ وبلىسىنىڭ جىلىوي اۋدانىندا, قۇلسارى كەنتىندە دارىگەرلەر وتباسىندا دۇنيەگە كەلگەن. اكەسى ءسالىم – حيرۋرگ, اناسى مە­رۋەرت بالالار دارىگەرى بولدى. ەرىكتىڭ كىش­كەنتاي كەزىندە ولار جۇمىس بابىمەن اتى­راۋ قالاسىنا كوشتى. اناسى مىنەزى جۇمساق, جانى نازىك ادام بولىپتى. انا­سىنىڭ وسى قاسيەتى ەرىكتىڭ بويىنا قوندى. ول بالا كەزىندە كوكتە قالىقتاي ۇشقان قۇستاردىڭ داۋسىنا قۇمارتتى. قۇستار تابيعاتتىڭ انشىلەرى ەدى. سوسىن وعان مۋلتفيلمنەن گورى, تەلەديدار, راديودان بەرىلەتىن كونتسەرتتەر وتە قاتتى ۇنايتىن. جاس بالاعا ولگا ۆورونەتس, ليۋدميلا زىكينا رەپەرتۋارىنداعى اندەر ەرەكشە اسەر ەتەدى. سول كەزدىڭ وزىندە مەك­تەپتەگى ءان­شى بالا جىڭىشكە الت داۋسىمەن اتاقتى ءان­شى اپالاردىڭ ءانىن ورىنداعان» دەپ جازدى اۆتور.

ەرىك قۇرمانعاليەۆتىڭ ەرەكشە داۋسىن كاسىبي ماماندار العاش رەت 1975 جىلى تىڭدادى. ول كەڭ اۋقىمدى, الاپات تىنىستى, تازا, ادەمى داۋىسقا يە بولاتىن. قۇرمانعاليەۆ باح, گەندەل, گليۋك, مو­تسارت پەن بورتنيانسكيدىڭ كانتاتالارى مەن وراتوريالارىن, روسسيني, بەلليني مەن مەيەربەردىڭ وپەرالارىنان اريالار ورىنداعان. ۆوكال ونەرىندەگى ەرەكشە قۇبىلىس سانالاتىن ەرىك قۇرمانعاليەۆ ايرىقشا تاعدىر كەشكەن ءانشى. ونىڭ انشىلىك تۇلعاسى كۇللى الەمنىڭ الدىندا تەڭدەسى جوق دارالىققا يە. ءتىلى باسقا, ءداستۇرى بولەك التى قۇرلىقتىڭ ادامدارى وعان, ونىڭ انشىلىك ونەرىنە تابىنا ءارى تاڭدانا كوز تىكتى. ەرىك ءبىر عانا حالىقتىڭ پەرزەنتى بولسا دا, ونىڭ انشىلىك ميسسياسى وتانىنان ءارى اسىپ, تاۋلاردان, مۇحيتتاردان ءوتىپ, بۇكىل الەمنىڭ الابىن ارالاپ كەتتى, اتاعى شارتاراپقا جايىلدى. ول گيننەستىڭ رەكوردتار كىتابىنا ايەل داۋىستى تۇڭعىش ەر ادام رەتىندە ەندى. ءانشى 2007 جىلى قاراشانىڭ 13 كۇنى 47 جاسىندا دۇنيەدەن وزدى.