وسىدان ەكى جىل عانا بۇرىن قۇرىلعان «مەركى» مەملەكەتتىك تابيعي قاۋمالىنا قاراستى ورمان قورى جەرى مەن قىرعىز الاتاۋى اۋماعىندا قورعاۋ جانە كۇزەتۋ جۇمىستارىنىڭ تالاپقا ساي ۇيىمداستىرىلۋىنىڭ ناتيجەسىندە وڭىردەن بۇرىن-سوڭدى كەزدەسپەگەن, «قىزىل كىتاپقا» ەنگىزىلگەن بىرقاتار اڭ-قۇستار پايدا بولىپ, سانى وسۋدە.
قاۋمالدا العاش رەت بىلتىر قاڭتار ايىندا بۇۇ باعدارلاماسى اياسىندا ارنايى ورناتىلعان فوتوتۇزاققا مىسىق تۇقىمداسىنا جاتاتىن ەڭ ءىرى اڭ – قار بارىسىنىڭ ء(ىلبىس) دا ءتۇسىپ قالعانى تىركەلگەن. ەلىمىزدىڭ اۋماعىندا 130-عا جۋىق, ال جەر بەتىندە بىرنەشە مىڭى عانا قالعان وسىناۋ اڭ ءتۇرىنىڭ جامبىل جەرىنەن ۇشىراسۋى, شىنىندا دا سۇيسىنەرلىك جاڭالىق. وسىعان بايلانىستى الماتى قالاسىنداعى زوولوگيا ينستيتۋتىنان ارنايى ماماندار كەلىپ, فوتوتۇزاق تۇسىرىلىمدەرى بويىنشا زەرتتەۋ جۇمىستارىن جۇرگىزدى. ناتيجەسىندە, قاۋمال اۋماعىنداعى تاۋ قويناۋلارىن 4 بىردەي قار بارىسى مەكەندەيتىنىنە ناقتىلى كوز جەتكىزىلگەن-ءدى.
ال مەركى ورمانداردى جانە جانۋارلار دۇنيەسىن قورعاۋ جونىندەگى كوممۋنالدىق مەملەكەتتىك مەكەمەسىنىڭ ديرەكتورى ج.يبرايموۆتىڭ ايتۋىنشا, بۇگىندە قاۋمال اۋماعىنداعى قار بارىسىنىڭ سانى 8 باسقا جەتكەن. بۇل اۋماقتى سونداي-اق 140 ارقار, 8 ءۇندى جايراسى مەكەندەيتىنى دە ءمالىم بولىپ وتىر.
وسى ورايدا ايتا كەتەرلىك جاي, بىلتىردان باستاپ وبلىس اكىمىنىڭ باستاماسىمەن مەركى اۋدانىنىڭ تاۋلى ايماعىندا مەملەكەتتىك وڭىرلىك تابيعي ساياباق قۇرۋ ءىسى قولعا الىنعانى بارشاعا ءمالىم. قازىرگى ۋاقىتتا اتالعان جوبانىڭ جاراتىلىستانۋ-عىلىمي تۇجىرىمداماسى تولىقتاي دايىندالىپ ءبىتتى. ەندى تابيعي ساياباقتىڭ شەكارا-شەگى بەلگىلەنىپ, تەحنيكالىق-ەكونوميكالىق نەگىزدەمەسىن ءتۇزۋ جۇمىستارى جۇزەگە اسىرىلۋ ۇستىندە.
بايماحانبەت احمەت,
جۋرناليست
جامبىل وبلىسى