ەلىمىزدە ورگانيكالىق ءوندىرىس ورىندارى نەگە دامىمايدى؟ سالاعا قانداي زاڭنامالىق قولداۋ قاجەت؟ بۇل سالاعا حالىقارالىق تاجىريبە قالاي سەرپىن بەرە الادى؟ سەناتتا ورگانيكالىق ءونىم ءوندىرىسىن زاڭنامالىق رەتتەۋگە ارنالعان كەزدەسۋگە قاتىسۋشىلار وسى جانەوزگە دە ماسەلەلەردى تالقىلادى, دەپ حابارلادى پالاتانىڭ ءباسپاسوز قىزمەتى.
سەناتتىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ مۇشەلەرى, بىرقاتار مينيسترلىكتىڭ باسشىلارى, عىلىمي قاۋىمداستىقتار مەن حالىقارالىق ۇيىمداردىڭ وكىلدەرى وسى ماسەلە بويىنشا وزدەرىنىڭ ساراپتامالىق پىكىرلەرىن ورتاعا سالدى.
«ورگانيكالىق ءونىم وندىرۋشىلەردىڭ ءتىزىلىمىن جۇرگىزۋ, ءوندىرىسى مەن اينالىم ەرەجەلەرىن, سونداي-اق ونى وندىرۋدە قولدانىلاتىن رۇقسات ەتىلگەن قۇرالداردىڭ ءتىزىمىن بەلگىلەيتىن «ورگانيكالىق ءوندىرىس تۋرالى» زاڭ 2015 جىلى قابىلدانعان بولاتىن. الايدا سالالىق كوميتەت وكىلى ءالي بەكتاەۆتىڭ ايتۋىنشا, بۇل باعىت الەۋەتى مەن پەرسپەكتيۆالارىنا قاراماستان, ءتيىستى دەڭگەيدە دامي العان جوق.
«نەگىزگى پروبلەمالاردىڭ ءبىرى وسى سالاداعى زاڭنامانىڭ جەتىلدىرىلمەۋى, ورگانيكالىق ءونىمدى جانە ونى ءوندىرۋدى سەرتيفيكاتتاۋدىڭ ۇلتتىق جۇيەسى مەن ورگانيكالىق ءونىمدى بىرىڭعاي تاڭبالاۋ ينستيتۋتىنىڭ بولماۋى بولىپ وتىر. وسى جانە باسقا دا فاكتورلار سالاداعى بيزنەستى دامىتۋعا نيەت بىلدىرۋشىلەرگە تۇساۋ بولۋدا», دەدى سەناتور ءا.بەكتاەۆ.
سەناتور اقىلبەك كۇرىشباەۆ ءوز كەزەگىندە ورگانيكالىق ءوندىرىس جونىندەگى ەو رەگلامەنتىمەن جانە باسىم وتكىزۋ نارىقتارىنىڭ شەتەل مەملەكەتتەرىنىڭ ستاندارتتارىمەن بالامالى ۇلتتىق ستاندارتتاردى ازىرلەۋ قاجەتتىگىن اتاپ ءوتتى.
«ورگانيكالىق ءونىم ءوندىرىسى مەن اينالىمىن ەسەپكە الۋ مەن قاداعالاۋدىڭ قازىرگى زامانعى جۇيەسىن ەنگىزۋ, قازاقستاننىڭ ورگانيكالىق ءوندىرىسىنىڭ بىرىڭعاي ينتەرنەت-پورتالىن قۇرۋ, ورگانيكالىق وسىمدىك شارۋاشىلىعىنا جارامدى تۇقىمدار مەن وتىرعىزۋ ماتەريالدارىنىڭ ءتىزىلىمىن جاساۋ قاجەت», دەدى ا.كۇرىشباەۆ.
اۋىل شارۋاشىلىعى ءمينيسترىنىڭ ورىنباسارى نۇربەك دايىربەكوۆ قازىر ورگانيكالىق ءونىم ءوندىرۋ جانە ونىڭ اينالىمى سالاسىنداعى ۇلتتىق زاڭنامانى جاقسارتۋ, اتاپ ايتقاندا ۇلتتىق جانە حالىقارالىق ستاندارتتارعا سايكەس ەكولوگيالىق تازا ورگانيكالىق ءونىمنىڭ سايكەستىگىن راستاۋ جانە باقىلاۋ جونىندەگى ۇلتتىق ورگانداردى قۇرۋ جانە تىركەۋ جونىندەگى شارالار پىسىقتالىپ جاتقانىن ايتتى.
ساۋدا جانە ينتەگراتسيا ءمينيسترىنىڭ ورىنباسارى ەرجان قازانباەۆ ورگانيكالىق ونىمدەردى تەحنيكالىق رەتتەۋ جانە ەكسپورتتاۋ, قازاقستاندىق برەندتەردى نىسانالى نارىقتارعا ىلگەرىلەتۋ جانە ساراپشى-اۋديتورلارعا قويىلاتىن رۇقسات بەرۋ تالاپتارىن بەكىتۋ جونىندەگى شارالار تۋرالى باياندادى.
دوڭگەلەك ۇستەل بارىسىندا ايتىلعان ۇسىنىستار كەيىن مۇددەلى تاراپتارعا جىبەرىلەتىن ۇسىنىمداردا كورىنىس تاباتىن بولدى. سەنات دەپۋتاتتارى سونىمەن قاتار وسى جىلى ورگانيكالىق ءونىم ءوندىرۋ ماسەلەلەرى جونىندەگى زاڭ جوباسىن ازىرلەۋگە باستاماشى بولماقشى.