فۋتبولدان يتاليا چەمپيوناتىنىڭ كەزەكتى تۋرىندا ءتۋريننىڭ «يۋۆەنتۋسى» سىرت الاڭدا «كالياريمەن» كەزدەستى. بۇل ماتچ 3:1 ەسەبىمەن قوناقتاردىڭ پايداسىنا شەشىلدى, دەپ حابارلايدى Egemen.kz.
«يۋۆەنتۋستىڭ» ساپىندا جاسىنداي جارقىراپ جۇرگەن كريشتيانۋ رونالدۋ وسى ويىندا قارسىلاستار قاقپاسىن ءۇش مارتە ءدال كوزدەپ, حەت-تريك اۆتورى اتاندى. بۇل دوپتاردى ول 10, 25 جانە 32 مينۋتتاردا قاقپاعا توعىتتى. وسىلايشا, ايگىلى پورتۋگاليالىق فۋتبولشى ءوزىنىڭ سپورتتىق كارەراسىندا سوققان گولدار سانىن 770-كە جەتكىزىپ, داڭقتى پەلەنىڭ وزىنەن اسىپ ءتۇستى. اتى اڭىزعا اينالعان برازيليا ويىنشىسى 767 رەت نىسانانى ءدال كوزدەگەن.
كەزدەسۋ اياقتالعان بەتتە رونالدۋ «پەلەنىڭ عالامات ويىنى, ونىڭ العا قويعان ماقساتى جانە قول جەتكىزگەن تابىستارى جايىندا اسەرلى اڭگىمەلەردى ەستىپ وسپەگەن ويىنشى جەر جاھاندا جوق-اۋ, ءسىرا. مەن دە سولاردىڭ ءبىرىمىن. سول سەبەپتى دە پەلەنىڭ رەكوردىن جاڭارتىپ, الەمنىڭ سۇرمەرگەن شابۋىلشىلارىنىڭ كوشىن باستاۋعا كۇش-قۋاتىمنىڭ جەتكەنىنە ءدال قازىر ەرەكشە شاتتانىپ تۇرمىن. مەن مادەيرادا دوپ تەۋىپ جۇرگەنىمدە وسىنداي وراسان زور كورسەتكىشكە قول جەتكىزەمىن دەپ ەش ويلاعان جوق ەدىم», دەپ رونالدۋ اعىنان جارىلدى.