باتىس قازاقستان وبلىسىندا 14 ناۋرىز – ءداستۇرلى كورىسۋ كۇنى كەڭ كولەمدە اتالىپ ءوتتى, دەپ حابارلايدى Egemen.kz.
قازاقستاننىڭ باتىس وڭىرىندە ەجەلدەن ەرەكشە اتالىپ وتەتىن كورىسۋ مەرەكەسى بيىل دا 14 ناۋرىزدا سانيتاريا-ەپيدەميولوگيا تالاپتارىن ساقتاي وتىرىپ اتالىپ ءوتتى. ءبىر قۋانارلىعى بۇل مەرەكە بۇرىن وڭىرلىك دەڭگەيدە بولسا, جىل وتكەن سايىن جالپىحالىقتىق سيپات الىپ بارا جاتىر.
كونە كۇنتىزبە بويىنشا حامال ايى باستالاتىن بۇل كۇنى حاديشا بوكەەۆا اتىنداعى باتىس قازاقستان وبلىستىق قازاق دراما تەاترىندا وتكەن شارادا ءوڭىر باسشىسى عالي ەسقاليەۆ وبلىس تۇرعىندارىن ايتۋلى مەرەكەمەن قۇتتىقتادى.
«ناۋرىز كەلىسىمەن ۇلى دالامىز كوركەيىپ, جاڭعىرىپ, كەرەمەت كەيىپكە ەنەدى. حالقىمىز «كۇز جاۋىنىمەن ءساندى, قىس قارىمەن ءارلى» دەپ بەكەر ايتپاعان. قازاق ەرتە كوكتەمدە قار كوپ بولسا, كەلەر جىلدا مولشىلىق بولادى دەپ ەسەپتەگەن. قىستى ارتقا تاستاپ, قاڭقىلداپ قازدار كەلەتىن, جان بىتكەن جاڭعىرىپ, جاسانىپ جاقسى ءبىر كۇيگە ەنەتىن كوكتەمنىڭ عاجاپ مەرەكەسى – كورىسۋ مەرەكەسى دە كەلىپ جەتتى. بۇل ەجەلدەن كەلە جاتقان مەرەكە. حالىقتىڭ اتا كاسىبى مال شارۋاشىلىعىمەن بايلانىستى بولعاندىقتان, كوپتەن ءبىرىن ءبىرى كورمەگەن اعايىن-تۋىس, باۋىرلار قىستان امان شىعىپ, ساعىنىسىپ باس قوساتىن ۇلكەن ماڭىزى بار مەيرام. سوندىقتان اتا-بابامىزدان قالعان مەرەكەنى تويلاۋ بىزگە بۇيىرعان باقىت.
قادىرلى ەل اعالارى, اق جاۋلىقتى اپالار, سىزدەردى كوكتەمنىڭ تاماشا مەرەكەسى – كورىسۋ كۇنىمەن شىن جۇرەكتەن قۇتتىقتايمىن. سىزدەردىڭ اق باتالارىڭىزدان, رياسىز كوڭىلدەرىڭىزدەن ءبىز رۋح پەن كۇش-قۋات الامىز. ارينە, وتكەن جىلعا وكپە جوق دەگەنمەن, وتكەن جىل ەلدەگى ىندەتكە بايلانىستى بارىمىزگە دە وڭاي تيگەن جوق. دەگەنمەن جاڭا جىلدا ارقايسىمىز ءبىر-بىرىمىزگە قولداۋ-دەمەۋ كورسەتىپ, جاناشىر بوپ جۇرسەك ءبىز كەز كەلگەن قيىندىقتاردى ەڭسەرەمىز», دەدى عالي ەسقاليەۆ.
ساقتىق شارالارى بارىنشا ساقتالىپ وتكەن تەاترداعى شارادا ارداگەر كوركەمونەرپازداردان قۇرالعان «اعالار اۋەنى» توبى مەن «اجە سالەمى» ءانسامبلى, وبلىستىق فيلارمونيانىڭ «ورال سازى» فولكلورلىق ءانسامبلى, «نازەركە», «سالتانات» بي انسامبلدەرى ونەر كورسەتىپ, ءداستۇرلى كورىسۋ سالتىنان كورىنىس كورسەتىلدى. اجەلەر شاشۋ شاشىپ, جاس كەلىندەر سالەم سالىپ, قوناقتارعا كوجە مەن باۋىرساق ۇسىندى. ۇلكەندەر جاعى جينالعاندارعا اق باتاسىن بەردى.
بۇل كۇنى باتىس قازاقستان وبلىسىنىڭ ءار اۋدانىندا, ورال قالاسىنىڭ ءار جەرىندە ءتۇرلى شارالار بولىپ جاتتى. جاستار مادەنيەت ءۇيىنىڭ جانە مادەني-اعارتۋ بىرلەستىگىنىڭ ونەرپازدارى, قالالىق كىتاپحانالار جۇيەسىنىڭ قىزمەتكەرلەرى, وبلىستىق رەسۋرستىق ورتالىقتىڭ ماماندارى ورال قالاسىنداعى قوعامدىق كولىكتەردە ءان شاشۋ شاشىپ, ىزگى تىلەكتەرىن جولداپ, ۆيكتورينالىق سۇراقتار قويىپ, سالت-ءداستۇر تۋرالى مالىمەتتەر بەردى. سۇراقتاردىڭ جاۋابىن ءدال تاپقان جولاۋشىلار ءتۇرلى سىيلىققا يە بولدى.
بۇل كۇنى قازاقستاننىڭ جالپىۇلتتىق كيەلى نىساندارى قاتارىنا ەنگەن دادەم اتا – جۇماعازى قازىرەت زياراتىندا دا اس بەرىلىپ, ناۋرىز كوجە تاراتىلدى. جەتى جىلدان بەرى ءوتىپ كەلە جاتقان ءداستۇرلى شارا بيىل كارانتين تالاپتارىنا ساي ۇيىمداستىرىلدى. جينالعاندار الدىندا فيلولوگيا عىلىمدارىنىڭ دوكتورى, پروفەسسور مۇرات سابىر, ولكەتانۋشى, قاراتوبە اۋداندىق ىشكى ساياسات ءبولىمىنىڭ باسشىسى نۇرتاس سافۋللين ناۋرىز مەرەكەسى مەن كورىسۋ ايتىنىڭ تاريحى مەن ءمان-ماڭىزىن اڭگىمەلەپ بەردى. زاڭگەر ابزال قۇسپان «وتباسى حرەستوماتياسى» ايدارىمەن شىعىپ جاتقان جاڭا كىتاپتاردى تانىستىرسا, ورال قالالىق ءماسليحاتىنىڭ دەپۋتاتى, بەلگىلى ونەرپاز ارمان بيعاليەۆ حالىقتى مەيراممەن قۇتتىقتاپ, پاتريوتتىق اندەردى شىرقادى.
كورىسۋ كۇنىنە وراي ءبورلى جانە سىرىم اۋدانىندا ۇلتتىق ات سپورتى تۇرلەرىنەن ءتۇرلى جارىستار ءوتتى. ال ورال قالاسىندا قادىر مىرزا ءالي اتىنداعى مادەنيەت جانە ونەر ورتالىعىىنڭ جازعى امفيتەاتردا وتكەن قايىرىمدىلىق شاراسىندا جينالعان قارجى اۋىر دەرتكە شالدىققان ورالدىق ءبۇلدىرشىن ەمير شاحماروۆتىڭ وتباسىنا بەرىلدى.
«كورىسۋ – جۇرەكتەگى نۇردى ءبولىسۋ» دەپ اقىن, قازاقستان جازۋشىلار وداعىنىڭ مۇشەسى مۇنايدار بالمولدا جازعانداي, بۇل كۇنى ۇيىمداستىرىلعان ءاربىر ءىس-شارا ىزگىلىككە تولى بولدى.