شارۋالارعا ديزەل وتىنى تومەن باعادا ساتىلادى

جاۋاپتى ۆەدومستۆونىڭ وكىلى مۇناي وڭدەۋ زاۋىتىنان شارۋالارعا ديزەل وتىنىن جونەلتۋگە باسىمدىق بەرىلەتىنىن ايتتى. بۇل رەتتە باقىلاۋ مەن مونيتورينگ تاۋلىك بويى وتكىزىلەدى دەپ جوسپارلانعان.

«مۇناي ونىمدەرىنىڭ جەكەلەگەن تۇرلەرىن ءوندىرۋ مەن ولاردىڭ اينالىمىن مەملەكەتتىك رەتتەۋ تۋرالى» زاڭىنا سايكەس, ەنەرگەتيكا مينيسترلىگى اۋىل شارۋاشىلىعى مينيسترلىگىمەن بىرلەسىپ, وڭىرلەردى مۇناي وڭدەۋ زاۋىتتارى مەن رەسۋرس ۇستاۋشىلارعا بەكىتە وتىرا كوكتەمگى دالا جۇمىستارىن جۇرگىزۋگە ارنالعان كەستەنى دايىندادى. ونىڭ اياسىندا اۋىل شارۋاشىلىعى تاۋار وندىرۋشىلەرىنە پاۆلودار مۇناي-حيميا زاۋىتى مەن «پەترو قازاقستان ويل پروداكس» زاۋىتىنان قاجەتتى وتىننىڭ باعاسى تونناسىنا 174 مىڭ تەڭگەدەن جىبەرىلەدى. اتىراۋ مۇناي وڭدەۋ زاۋىتىنان تونناسى 172 مىڭ تەڭگەنى قۇرايتىن جەڭىلدەتىلگەن ديزەل بولىنەدى. جوسپارعا سايكەس, 380 مىڭ توننا كولەمىندە ديزەل وتىنى قاراستىرىلىپ وتىر», دەدى ۆيتسە-مينيستر.

قۇزىرلى ورگاننىڭ اقپاراتىنا سۇيەنسەك, بۇگىندە 12 مىڭ تونناعا جۋىق جانارماي تيەلگەن.

ەنەرگەتيكا مينيسترلىگى گاز جانە مۇناي-گاز حيمياسى دەپارتامەنتىنىڭ ديرەكتورى قۋانىش سارسەكەەۆتىڭ ايتۋىنشا, ەلىمىزدە 1 ناۋرىزدان باستاپ, كولىكتەرگە ارنالعان گاز قۇيۋ ستانسالارىندا سۇيىتىلعان مۇناي گازىنىڭ بولشەك ساۋ­دا باعالارىن ۋاقىتشا مەملەكەتتىك رەتتەۋ تەتىگى الىنىپ تاستالدى. دەپارتامەنت باسشىسى سۇيىتىلعان گازدى ساتۋدى ۋاقىت­شا مەملەكەتتىك رەتتەۋ بىلتىر توتەنشە جاعداي رەجىمىن قامتاماسىز ەتۋ جو­نىندەگى مەملەكەتتىك كوميسسيانىڭ شە­شى­مى نەگىزىندە قابىلدانعانىن جەتكىزدى. 

«قازىر سۇرانىس پەن ۇسىنىستىڭ نە­گى­زىندە كولىكتەرگە ارنالعان گاز قۇيۋ ستانسالارىندا بولشەك ساۋدا باعالارىن نارىق رەتتەپ وتىر. ەنەرگەتيكا مينيستر­لىگى جۇرگىزگەن تمد ەلدەرىندەگى بولشەك ساۋدا باعاسىنىڭ تالداۋى كورسەتكەندەي, قازىرگى باعالار پاندەمياعا دەيىنگى I توقسانعا قاراعاندا رەسپۋبليكا بويىنشا ورتا ەسەپپەن 5%-عا تومەن. ياعني بۇگىنگى نارىقتىق باعا بۇرىن قولدانىستا بولعان باعادان دا تومەن», دەدى ق.سارسەكەەۆ.

ۆەدومستۆو وكىلدەرى اي سايىن ىشكى نا­رىققا سۇيىتىلعان مۇناي گازىن جەت­كىزۋ جوسپارىن قالىپتاستىرۋ جۇمىسى جال­عاسىپ جاتقانىن ايتتى. جانارمايدىڭ تورت­تەن ءبىر بولىگى ەلەكتروندى ساۋدا الاڭ­دارى ارقىلى ساتىلىپ جاتىر. قالعانى توق­سان سايىن مينيسترلىك بەكىتەتىن كوتەر­مە شەكتى باعا بويىنشا جىبەرىلىپ كەلەدى.

«وسى جىلدىڭ I توقسانىن ققس ەسەپكە الماعاندا باعا تونناسىنا 38 701 تەڭ­گە كولەمىندە بەكىتىلدى. بۇل 2018 جىل­دان بەرى وزگەرمەگەن. تەك بىلتىرعى ءۇشىن­شى توقساندا سۇيىتىلعان گازدىڭ الەم­دىك باعاسى تومەندەگەنىنە بايلانىستى ققس-سىز تونناسى 28 مىڭ تەڭگەگە دەيىن تو­مەن­دەگەن ەدى», دەدى دەپارتامەنت ديرەكتورى.

بۇگىندە وتاندىق مۇناي ونىمدەرىنىڭ جيىنتىق قورى قولايلى دەڭگەيدە. اتاپ ايتقاندا, بەنزين 225 مىڭ توننانى قۇراپ, بۇل ەلىمىزدىڭ 20 تاۋلىكتىك قاجەتتىلىگىن وتەۋگە جەتكىلىكتى. ال ديزەل وتىنى 298 مىڭ تونناعا جەتىپ, سايكەسىنشە بۇل ىشكى نارىقتىڭ قاجەتتىلىگىن 27 تاۋلىككە قامتاماسىز ەتۋگە مۇمكىندىك بەرەدى.

«باعانى بەلگىلەۋدەگى نەگىزگى فاك­تورلارعا – قازاقستانداعى مۇناي قۇنى, ىشكى باعالار, مۇناي وڭدەۋ بويىنشا قىزمەت, سالىقتار مەن اكتسيزدەر, زەرتحا­نالىق سىناقتار مەن قوسپالار بويىنشا شىعىستار, بانكتىك قارىزدارعا قىزمەت كورسەتۋ, تسيستەرنالاردى بەرۋ-جيناۋ, تاۋ­اردى تاسىمالداۋ جانە باسقا دا ىلەسپە شىعىس كىرەدى», دەدى ءا.ماعاۋوۆ.

ەنەرگەتيكا مينيسترلىگىنىڭ دەرەگى بويىنشا قازاقستاندا بەنزيننىڭ ورتاشا باعاسى – 160 تەڭگە.