كورىسۋ – قازاق ەلىنىڭ باتىس ايماعىندا كەڭ تارالعان مەرەكە. ونى «كورىسۋ ايت», «كورىسۋ امالى» دەپ تە جاتادى. نەگىزىنەن, ۇلتتىق ناقىشتاعى جاڭا جىلدىڭ باستاۋى رەتىندە قابىلدانادى. ناۋرىز ايىنىڭ 14-ىنە تۋرا كەلەدى. بىراق ءبىر عانا كۇنمەن شەكتەلەدى دەگەن ءسوز ەمەس.
كورىسۋ – ەڭ ىزگى مەرەكەلەردىڭ ءبىرى. بۇل كۇنى جاقىن-تۋىستار ءبىر ءبىرىن ىزدەپ, قوناققا بارىپ, جاڭا جىلدىڭ كەلۋىمەن قۇتتىقتايدى. اسىرەسە, قارياسى بار ۇيلەرگە جاستار, بالالارى سالەم بەرە بارادى. قىستان امان-ەسەن شىعىپ, جاڭا جىلدا باس قوسقان جۇرت ءوزارا اق نيەتتەرىن جاۋدىرادى. وسى مەرەكەگە وراي «جاسىڭ قۇتتى بولسىن!», ء«بىر جاسىڭمەن!» دەگەن تىلەكتەر ءجيى ايتىلادى. تاڭەرتەڭنەن باستاپ ۇلكەن-كىشىگە مەرەكەلىك كوڭىل كۇي انىق سەزىلىپ تۇرادى. بالا كەزىمىزدەن ۇيدەگى ۇلكەندەر ەرتە وياتىپ, كورشى-كولەمگە, جاقىن-تۋىسقا كورىسىپ كەلۋگە جىبەرەتىنى ەسىمىزدە. بارعان ءۇيدىڭ اتا-اجە, اعا-اپالارى ساعان باتاسىن بەرىپ, ءتاتتى دامنەن ۇسىنادى. وسىنىڭ ءبارى – ەلدى ىنتىماق, بىرلىككە, تارتىپكە شاقىراتىن امالدار.
كورىسۋدىڭ باستى بەلگىسىنىڭ ءبىرى رەتىندە: ادامدار ءوزارا قوس قولىن ۇسىنىپ, سودان كەيىن ءتوس تۇيىستىرە قۇشاقتاسىپ امانداسادى. ەل ىشىندە كەلىسپەۋشىلىك پەن تۇسىنىسپەۋشىلىك ورىن العان بولسا, وسىناۋ مەيرام كۇنى جويىلادى دەگەن سەنىم بار. ياعني وكپە-رەنىش اتاۋلى تۇگەل تارقاپ, كەشىرىم ۇستەمدىك قۇرادى. «الدىڭا كەلسە, اتاڭنىڭ قۇنىن كەش», «وكپەشىل بولما, كەشىرىمشىل بول», «كەڭ بولساڭ, كەم بولمايسىڭ» دەگەن قازاقتىڭ ماقال-ماتەلدەرى كورىسۋ ايتى سىندى ۇستانىمداردان قالىپتاسقانىنا سەنەسىڭ. ويتكەنى ناۋرىزدىڭ وسى كۇندەرى بۇكىل دۇنيە جايناپ, جادىراپ تۇرادى. ادامداردىڭ كوتەرىڭكى كوڭىل كۇيى تابيعاتتىڭ جايما-شۋاعىمەن اسەم ۇيلەسىم تابادى. بۇل – ومىرگە جاڭاشا قاراۋعا شاقىراتىن, الداعى كۇندەردەن تەك قانا ءۇمىت كۇتىپ, كوكتەمنىڭ كەلۋىمەن كوڭىل جايلاناتىن مەزگىل.
ءبىزدىڭ اۋىلدارىمىزدا باقيلىق بولعان قۇرباندارعا كورىسۋدەن ءبىر كۇن بۇرىن تاعزىم ەتۋ ءداستۇرى دە بار. ونى «وتكەنگە سالاۋات ايتۋ», ء«ولى جەبەمەي, ءتىرى بايىمايدى» دەپ الدىڭعى بۋىنعا قۇرمەت رەتىندە سەزىنەمىز. سول ارقىلى ادامزاتتىڭ ساباقتاستىعىن سىيلاۋ, كەشەگىڭدى ۇمىتپاۋ ارقىلى كەلەشەگىڭە سەنىم ءبىلدىرۋ نيەتى كورىنەدى.
كورىسۋ ايتى تۋرالى كەڭ تارقاتا اڭگىمەلەپ ءجۇرۋ, ونى اتاپ ءوتۋ اۋقىمىن كەڭەيتە تۇسكەنىمىز دۇرىس دەپ ويلايمىز. ادام بالاسىنىڭ جۇرەگىنە سەزىم, كوڭىلىندە ساۋلە بايىتاتىن مۇنداي مەرەكەلەردىڭ بەرەرى مول.
گۋليا بالتاەۆا,
نۇر-سۇلتان قالاسى №2 ارنايى مەكتەپتىڭ دەفەكتولوگ-مۇعالىمى