بالقاش قالاسىنداعى قازاقستان اۋە قورعانىسى كۇشتەرىنىڭ وقۋ-اۆياتسيالىق ورتالىعىنا L-39 وقۋ-جاۋىنگەرلىك ۇشاقتارى كەلدى. مەملەكەتتىك قورعانىستىق تاپسىرىس شارتى شەڭبەرىندە وتكەن جىلدىڭ سوڭىندا ولار ءوندىرۋشى زاۋىتقا جىبەرىلدى. ول جەردە كۇردەلى جوندەۋ جۇمىستارى جۇرگىزىلىپ, مودەرنيزاتسيادان ءوتتى.
مودەرنيزاتسيا بارىسىندا ۇشاقتارعا جاڭا تسيفرلىق اۆيونيكا, كاتاپۋلتتاۋ جۇيەلەرى, بايلانىس جانە وبەكتيۆتى باقىلاۋ قۇرالدارى ورناتىلدى.
L-39 كۋرسانتتاردى كۇندىز جانە تۇندە قاراپايىم جانە كۇردەلى مەتەوجاعدايلاردا, ۇشۋ تەحنيكاسىنا باستاپقى وقىتۋعا, جاۋىنگەرلىك قولدانۋ ەلەمەنتتەرىن وقىتۋعا, سونداي-اق وقۋ ورىندارى مەن اسكەري بولىمدەردىڭ ۇشقىشتار قۇرامىن جاتتىقتىرۋعا ارنالعان.
كۋرسانتتارعا اۋە كەمەسىن مەڭگەرۋگە تاجىريبەلى ۇشقىش-نۇسقاۋشىلار كومەكتەسەدى.
– جالپى العاندا L-39 ۇشاعىمەن ۇشۋ, اۆياتسيانى مەڭگەرۋدەگى العاشقى قادام بولىپ تابىلادى. ءاربىر كۋرسانت ءۇشىن جەكە ءوزى ۇشۋ – وتە ماڭىزدى ءسات. بۇل ول بولاشاقتا قاراپايىم, كۇردەلى پيلوتاج جاساۋ, بۇلتتاردا, تومەن بيىكتىكتە, جەرۇستى جانە اۋە نىسانالارى بويىنشا جاۋىنگەرلىك قولدانۋعا ۇشۋ سىندى كەزەڭدەرگە قول جەتكىزە الادى دەگەندى بىلدىرەدى, – دەپ اتاپ ءوتتى وقۋ-اۆياتسيا ورتالىعى كومانديرىنىڭ ورىنباسارى پودپولكوۆنيك ماقسات بۇراتاەۆ.