الماتىداعى «شىمبۇلاق» تاۋ-شاڭعى كۋرورتىندا ەلىمىزدە تۇڭعىش رەت قىسقى سپورتتىڭ فريستايل-موگۋل جانە فريستايل-اكروباتيكا تۇرىنەن الەم چەمپيوناتى ءوتىپ جاتىر. ءوز ەلىمىزدەگى دۇنيەجۇزىلىك دودادا وسى سپورت تۇرىنەن باق سىنايتىن جەرلەستەرىمىز مەدال ءۇشىن باسەكەلەردە ايانىپ جاتقان جوق.
جالپى ەلىمىزدە جازعى سپورت تۇرلەرىنەن الەم چەمپيوناتى ءجيى ءوتىپ جاتادى, ال قىسقى سپورت تۇرلەرىنەن تەك الەم كۋبوگى جارىسى ۇيىمداستىرىلعانى بولماسا, الەمدىك دودا تۇڭعىش رەت وتكىزىلىپ وتىر. بۇعان دەيىن 2019 جىلى الاتاۋ باۋرايىندا موگۋلدان العاش رەت الەم كۋبوگى جارىسى وتسە, 2020 جىلى الماتىدا فريستايل-اكروباتيكادان الەم كۋبوگى كەزەڭى ۇيىمداستىرىلدى. تۋرنير Oi-Qaragai Lesnaya Skazka كۋرورتىندا ءوتىپ, سپورتشىلار مەدال مەن رەيتينگتىك ۇپاي ءۇشىن بارىن سالدى. اتالعان باسەكەدە موگۋلدان يۋليا گالىشەۆا توپ جارسا, اكروباتيكادان جانبوتا الدابەرگەنوۆا ۇزدىكتەر قاتارىنا ەنگەن بولاتىن. حالىقارالىق شاڭعى سپورتى تۇرلەرى فەدەراتسياسى قازاقستان الەمدىك باسەكەنى جوعارى دەڭگەيدە ۇيىمداستىرعانىن اتاپ ءوتىپ, جوعارى باعا بەرگەن ەدى.
حالىقارالىق شاڭعى سپورتى تۇرلەرى فەدەراتسياسىنىڭ وسىنداي سەنىمىنە يە بولعان قازاقستانعا اتالعان فەدەراتسيا فريستايل-موگۋل جانە فريستايل-اكروباتيكادان بيىلعى الەم چەمپيوناتىن وتكىزۋدى سەنىپ تاپسىردى. تاعى ءبىر ايتا كەتەرلىگى, بۇل – جاي عانا كەزەكتى الەم بىرىنشىلىگى ەمەس, 2022 جىلى بەيجىڭدە وتەتىن وليمپيا ويىندارىنا ۇپاي بەرەتىن ماڭىزدى جارىستىڭ ءبىرى.
جارىستىڭ اشىلۋ سالتاناتىندا حالىقارالىق شاڭعى فەدەراتسياسىنىڭ ديرەكتورى (FIS) اندرەا رينالدي: «پاندەميا كەزىندە, وسىنداي قيىن ساتتە الەم چەمپيوناتىن وتكىزۋ تۋرالى ۇسىنىسپەن سىزدەرگە جۇگىنگەنىمدە, وڭ جاۋاپ الامىن دەپ ۇمىتتەنگەنىمدى اتاپ وتكىم كەلەدى. قيىن كەزەڭدە جىلدام شەشىم شىعارىپ, وسىنداي ەرەكشە جاعدايدا ۇلكەن دارەجەدە دايىندالعاندارىڭىزدى جوعارى باعالايمىن», دەگەن بولاتىن.
فريستايل-موگۋل بويىنشا ۇيىمداستىرىلعان جارىستىڭ العاشقى كۇنىندە تالاي الەمدىك دودادا اتوي سالىپ جۇرگەن ەكى بىردەي وتانداسىمىز – يۋليا گالىشەۆا مەن پاۆەل كولماكوۆ تۇعىردىڭ بيىك ساتىسىنان كورىندى. 2019 جىلى اقش-تىڭ پارك-سيتي قالاسىندا ۇيىمداستىرىلعان كەزەكتى الەم چەمپيوناتىندا توپ جارعان يۋليا گالىشەۆا ءوز جەرىمىزدە وتكەن دودادا كۇمىس جۇلدە ولجالادى. فينالدىق باسەكەدە وتانداسىمىز وليمپيادا چەمپيونى, الەم كۋبوگى كەزەڭدەرىنىڭ كوشباسشىسى فرانتسيالىق پەررين لاففونعا ەسە جىبەرىپ, 79.52 ۇپايمەن ەكىنشى ورىندى قاناعات تۇتتى. لاففون فينالدا 82.11 ۇپاي الدى. ۇشتىكتى 79.41 ۇپايعا قول جەتكىزگەن رەسەيلىك اناستاسيا سميرنوۆا تۇيىندەدى.
جارىستان كەيىن جۋرناليستەرگە بەرگەن سۇحباتىندا يۋليا گالىشەۆا جەڭىس تۇعىرىنا كوتەرىلەتىنىنە سەنىمدى بولعانىن, الايدا بولماشى عانا قاتەلىگىنىڭ كەسىرىنەن التىننان ايىرىلىپ قالعانىن ايتتى.
ەل قورجىنىنا ەكىنشى مەدالدى 2015 جىلى يسپانيادا وتكەن قىسقى ۋنيۆەرسيادا دا توپ جارعان وتانداسىمىز پاۆەل كولماكوۆ سالدى. فينالدىق سايىستا 82.23 ۇپاي ەنشىلەگەن ول مانسابىندا العاش رەت الەم بىرىنشىلىگىنىڭ قولا جۇلدەسىنە قول جەتكىزدى. بۇل سىندا كانادالىق ميكاەل كينگسبەري الەم چەمپيونى اتانسا, كۇمىس مەدالدى فرانتسيالىق بەندجامەن كاۆەت يەلەندى.
ەكىنشى جارىس كۇنىنە جوسپارلانعان پاراللەلدى موگۋلدان ايەلدەر اراسىنداعى دودا دا ءبىزدىڭ سپورتشىلار ءۇشىن جەمىستى اياقتالدى. بىلتىر شۆەيتساريادا وتكەن پاراللەلدى موگۋلدان ەۋروپا كۋبوگىندا جاسىنداي جارقىلداپ, التىن جۇلدە جەڭىپ العان 15 جاستاعى جەرلەسىمىز اناستاسيا گورودكو بۇل جولى العاش رەت ۇزدىك ۇشتىككە ەندى. كىشى فينالدا گورودكو كانادالىق سوفيا گەگنونمەن جارىسىپ, قارسىلاسىنان وق بويى وزىق بولدى. التىن جۇلدەنى رەسەيلىك اناستاسيا سميرنوۆا, كۇمىستى ونىڭ وتانداسى اناستاسيا لازارەنكو يەلەندى. وسىلايشا, اناستاسيا گورودكو فريستايل-موگۋلدان قازاقستان كومانداسىنىڭ ءۇشىنشى مەدالىن جەڭىپ الدى.
بۇگىن فريستايل-اكروباتيكا بويىنشا الەم بىرىنشىلىگىنىڭ سوڭعى كۇنى وتەدى. بۇل سىندا ەل نامىسىن جۋىردا عانا اقش-تاعى North American Cup تۋرنيرىندە توپ جارعان شەرزود حاشيرباەۆتان بولەك, رومان يۆانوۆ, يلدار باترۋدينوۆ, جانبوتا الدابەرگەنوۆا, اقمارجان قالمۇرزاەۆا جانە ايانا جولداس قورعايدى.