Cاۋدا جانە ينتەگراتسيا مينيسترلىگى مەن قازاقستان تۇتىنۋشىلارىنىڭ رەسپۋبليكالىق قاۋىمداستىعى ءوزارا ىنتىماقتاستىق تۋرالى مەموراندۋمعا قول قويدى.
وسى كەلىسىمنىڭ نەگىزىندە تۇتىنۋشىلاردىڭ قۇقىقتارىن قورعاۋ جۇيەسىن جەتىلدىرۋگە, سونداي-اق ۇكىمەتتىڭ جول كارتاسىندا كوزدەلگەن ءىس-شارالاردى بىرلەسىپ ىسكە اسىرۋعا باسىمدىق بەرىلەدى. بۇعان قوسا IX ازاماتتىق فورۋمدا قوعامدىق بىرلەستىكتەر ايتقان ۇسىنىستار دا نازارعا الىنىپ وتىر.
بىلتىر قۇزىرلى ورگان تۇتىنۋشىلاردىڭ قۇقىعىن قورعايتىن 55 قوعامدىق بىرلەستىكتىڭ قاتىسۋىمەن بىرنەشە ونلاين كەزدەسۋ (جۇمىس توپتارى, كونفەرەنتسيا) وتكىزگەن ەدى. اتالعان باسقوسۋلاردا مينيسترلىكتىڭ تاراپىنان بىرىڭعاي ۇلتتىق تۇتىنۋشىلار قاۋىمداستىعىن قۇرۋدىڭ وزەكتىلىگى جايلى, قوعامدىق ۇيىمداردىڭ قۇرامىنا كىرۋدىڭ ماڭىزدىلىعى تۋرالى, سونداي-اق تۇتىنۋشىلاردىڭ قۇقىقتارىن قورعاۋ جونىندەگى ومبۋدسمەن ينستيتۋتىن ەنگىزۋ قاجەتتىلىگى سىندى باستامالار جونىندە ءتۇسىندىرىلدى. دەمەك, ۇلتتىق قاۋىمداستىقتىڭ قۇرىلۋىمەن ەلىمىزدىڭ بارلىق وڭىرىندە ونىڭ فيليالدارى اشىلىپ, وداقتاردى قايتا فورماتتاۋ «ساننان ساپاعا» ۇرانىمەن وتپەك. بۇل كاسىبي ۇيىمدار قاتارىنان قالىپتاساتىن بىرلەستىكتەر قىزمەتىندەگى تار بەيىندى باعىتتاردى دامىتۋعا باسىمدىق بەرىلەتىنىن اڭعارتادى.
ۆەدومستۆونىڭ مالىمەتىنە سۇيەنسەك, ەڭ بەلسەندى دەگەن 30 قوعامدىق بىرلەستىك مينيسترلىك باستامالارىن قولداپ وتىر. قوعامدىق ۇيىم وكىلدەرى تۇتىنۋشىلاردىڭ ۇلتتىق قاۋىمداستىعى «قازاقستان تۇتىنۋشىلارىنىڭ رەسپۋبليكالىق قاۋىمداستىعى» زتب بازاسىندا قۇرىلسا دەگەن ۇسىنىستارىن جەتكىزىپتى. سەبەبى ونىڭ قۇرامىنا قارجى, ءبىلىم بەرۋ, تكش, تۋريستىك جانە مەديتسينا سالاسىندا تۇتىنۋشىلاردىڭ قۇقىقتارىن قورعاۋعا ماماندانعان قوعامدىق بىرلەستىكتەر كىرەدى.
جوعارىداعى ۇسىنىستاردى ەسكەرىپ, مينيسترلىك «قازاقستان تۇتىنۋشىلارىنىڭ رەسپۋبليكالىق قاۋىمداستىعى» زتب-مەن ىنتىماقتاستىق تۋرالى مەموراندۋمعا وتىرۋدى قۇپ كورگەن. وسىلايشا, مۇددەلى تاراپتار اتالعان قۇجات ۇكىمەتتىك ەمەس ۇيىمدارعا تەڭ مۇمكىندىكتەردى قامتاماسىز ەتەتىنىنە جانە تۇتىنۋشىلاردىڭ قۇقىعىن قورعاۋ ماسەلەسىندە مەملەكەتتىڭ قاتىسۋىن بارىنشا ازايتاتىنىنا سەنىمدى.