ەلىمىزدىڭ تاۋەلسىزدىگىنىڭ 30 جىلدىعىن اتاپ ءوتۋ اياسىندا قازاقستاننىڭ يرانداعى ەلشىلىگى «قازاقستان – يران مادەني كۇنى» اتتى سالتاناتتى ءىس-شارا ۇيىمداستىردى. وعان يراننىڭ مادەني مۇرا, تۋريزم جانە قولونەر جونىندەگى ءمينيسترى الياسكار مۋنەسان, گۇلستان پروۆينتسياسىنىڭ گۋبەرناتورى حادي حاكشەناس, پارلامەنت دەپۋتاتى گۋلامرەزا مونتەزاري, قازاقستان ەلشىسى اسحات ورازباي, بيزنەس وكىلدەرى جانە جەرگىلىكتى قازاق دياسپوراسىنىڭ بەلسەندىلەرى قاتىستى, دەپ حابارلايدى Egemen.kz.
ءىس-شارا اشىلۋىندا ءسوز سويلەگەن ا. مۋنەسان مەن ەلشى قازاقستان تاۋەلسىزدىك العان كەزدەن بەرگى 30 جىل ىشىندە ءتۇرلى سالالاردا, سونداي-اق قازاقستان مەن يراننىڭ ەكىجاقتى ىنتىماقتاستىعىن دامىتۋدا زور جەتىستىكتەرگە قول جەتكىزگەنىن اتاپ ءوتتى.
ح. حاكشەناس ەكى ەل اراسىنداعى وڭىرارالىق ساۋدا-ەكونوميكالىق, مادەني, تۋريستىك, ەمدىك تۋريزم, زياراتتىق بايلانىستاردىڭ جاقسى دامۋدا ەكەنىنە توقتالدى. گۇلستان پروۆينتسياسىندا قازاق حالقىنىڭ تاريحي-مادەني ەسكەرتكىشتەرى, ياعني اقىن ءارى عالىم سۇلتان ءۇببى كەسەنەسى (XII عاسىر, سۇلەيمەن باقىرعانيدىڭ ءۇشىنشى ۇلى), ءدىني ۇستاز ءارى عالىم شاعۇرباتتىڭ مازارى (XVIII عاسىر) جانە باسقا قازاقتارعا قاتىستى قاسيەتتى ورىندار زياراتتىق ءتۋريزمدى دامىتۋعا جول اشادى دەپ مالىمدەدى. پروۆينتسيا گۋبەرناتورى كوكتەمنىڭ العاشقى كۇندەرى ءارى ەكى ەلگە ورتاق ناۋرىز جاڭا جىل مەيرامى قارساڭىندا ۇيىمداستىرىلعان «قازاقستان – يران مادەني كۇنىن» الداعى ۋاقىتتا ءتيىستى تاقىرىپتاعى اپتالىق رەتىندە جىل سايىن الماكەزەك ماڭعىستاۋ وبلىسى مەن گۇلستان پروۆينتسياسىندا وتكىزىپ تۇرۋ جونىندە ۇسىنىس ءبىلدىردى. بۇل ۇسىنىستى يران مادەني مۇرا ءمينيسترى قۇپتادى.
ع. مونتەزاري قازاقستاننىڭ تاۋەلسىزدىك العاندا ونى العاشقىلاردىڭ ءبىرى بولىپ رەسمي تانىعان يرانمەن قارىم-قاتىناستار بارلىق سالالاردا جاقسى دامۋدا, سونىڭ ىشىندە ءداستۇرلى مادەني بايلانىستاردىڭ دا تەرەڭدەگەنىنىڭ كۋاسى بولىپ وتىرمىز, دەپ اتاپ ءوتتى.
ءىس-شاراعا قاتىسۋشىلار گورگان قالاسىنىڭ ورتالىق مادەنيەت ءۇيىنىڭ زالدارىندا ۇيىمداستىرىلعان جەرگىلىكتى قازاق دياسپوراسى قولونەر شەبەرلەرىنىڭ ۇلتتىق بۇيىمدارىنا ارنالعان كورمەنى ارالاپ, قازاقستان تاۋەلسىزدىگىنىڭ 30 جىلدىعىنا ارنالعان فوتو جانە بەينە ماتەريالدارمەن تانىستى.
سونىمەن قاتار, جەرگىلىكتى قازاق دياسپوراسى مەن يراندىق ونەرپازدار قويعان كونتسەرتتە ۇلتتىق شاعىن وركەستر قازاق كۇيلەرىن تارتىپ, انشىلەر قازاق جانە يران حالىق اندەرىن شىرقادى.