تانىمال ونكولوگ-دارىگەر رايىمقۇل قاراقۇلوۆ ومىردەن وزدى

بۇل قازاقستاننىڭ بارلىق مەديتسينالىق جانە ونكولوگيالىق قوعامداستىعى ءۇشىن ورنى تولماس قايعى.

ول 1942 جىلى 13 تامىزدا وڭتۇستىك قازاقستان وبلىسى, قازىعۇرت اۋدانى, جاڭا بازار اۋىلىندا دۇنيەگە كەلگەن. 1967 جىلى الماتى مەملەكەتتىك مەديتسينا ينستيتۋتىنىڭ پەدياتريا فاكۋلتەتىن بىتىرگەن.

1967 جىلدىڭ تامىز ايىنان 1968 جىلدىڭ شىلدە ايىنا دەيىن گۋرەۆ (قازىرگى اتىراۋ) وبلىستىق اۋرۋحاناسىندا دارىگەر-حيرۋرگ بولىپ جۇمىس ىستەدى. كەيىن الماتى مەملەكەتتىك مەديتسينا ينستيتۋتىنىڭ فاكۋلتەتتىك تەراپيا كافەدراسىنىڭ اسسيستەنتى بولدى. 1969 جىلدىڭ تامىزىنان باستاپ 1970 جىلدىڭ تامىزىنا دەيىن بايكال اسكەري وكرۋگىنىڭ اسكەري بولىمىندە لازارەت باستىعى لاۋازىمىن, سودان كەيىن 1970 جىلدىڭ قىركۇيەگىنەن باستاپ 1971 جىلدىڭ قازانىنا دەيىن اۆياتسيالىق ءبولىمنىڭ ينجەنەرلىك باتالونىنىڭ (معر, ۇلان – باتىر قالاسى) اعا دارىگەرى بولىپ قىزمەت اتقاردى.

ول 1971 جىلى قازوجرعزي-عا قاراپايىم زەرتحاناشى بولىپ قىزمەتكە كەلىپ, 1977 جىلى كانديداتتىق ديسسەرتاتسياسىن ءساتتى قورعادى, 1978 جىلدان 1983 جىلعا دەيىن پ.ا. گەرتسەن اتىنداعى ماسكەۋ ونكولوگيا جانە راديولوگيا عىلىمي-زەرتتەۋ ينستيتۋتىندا تاعىلىمدامادان ءوتتى. 1986 جىلى ماسكەۋ رەنتگەن-راديولوگيا عىلىمي-زەرتتەۋ ينستيتۋتىندا (وبنينسك ق.) دوكتورلىق ديسسەرتاتسياسىن ءساتتى قورعادى.

1984 جىلدان باستاپ گەموبلاستوزدار بولىمشەسىندە جۇمىس ىستەدى, قازوجرعزي-دا وسى بولىمشەنى قۇرۋدىڭ باستاۋىندا تۇردى. 1993 جىلدان 1999 جىلعا دەيىن بولىمشە باسشىسى, كەيىن حيميوتەراپيا ءبولىمىنىڭ مەڭگەرۋشىسى بولىپ جۇمىس ىستەدى. سوڭعى جىلدارى قازوجرعزي-دىڭ گەماتولوگيا جانە سۇيەك كەمىگىن ترانسپلانتاتسيالاۋ ورتالىعىنىڭ پروفەسسور قىزمەتىن اتقاردى.

ونىڭ نەگىزگى عىلىمي باعىتى «ىسىكتىڭ مولەكۋلالىق-گەنەتيكالىق ەرەكشەلىكتەرىن ەسكەرە وتىرىپ, قاتەرلى ليمفومالاردىڭ قايتالاناتىن جانە رەفراكتەرلىك تۇرلەرىن ەمدەۋدە مونوكلونالدى انتيدەنەلەردىڭ تيىمدىلىگىن زەرتتەۋ» بولىپ تابىلادى. عىلىمي زەرتتەۋلەردى تابىستى ورىنداعانى ءۇشىن 1984 جىلى كسرو عا پرەزيديۋمىنىڭ سىيلىعىمەن ماراپاتتالدى.

2002 جىلى رايىمقۇلعا ونكولوگيا پروفەسسورى اتاعى بەرىلدى, ال 2009 جىلدان باستاپ حالىقارالىق اقپاراتتاندىرۋ اكادەمياسىنىڭ (حاا) تولىق مۇشەسى بولدى.

عىلىمي زەرتتەۋلەردەگى جەتىستىكتەرى ءۇشىن «كسرو ونەرتاپقىشى» جانە «كسرو دەنساۋلىق ساقتاۋ ۇزدىگى» بەلگىلەرىمەن جانە «ەڭبەك ارداگەرى» مەدالىمەن ماراپاتتالدى.

پروفەسسور قاراقۇلوۆ ينستيتۋتتىڭ قوعامدىق ومىرىنە بەلسەندى قاتىستى, ينستيتۋتتىڭ عىلىمي كەڭەسىنىڭ مۇشەسى, كوپ جىلدار بويى كاسىپوداق كوميتەتىنىڭ مۇشەسى بولدى, قازوجرعزي-دا «Nur Otan» پارتياسىنىڭ باستاۋىش پارتيا ۇيىمىن باسقاردى. «Nur Otan» پارتياسىنىڭ توراعاسى ن.ءا. نازارباەۆتىڭ اتىنان العىس حاتپەن ماراپاتتالدى.

ر.ق. قاراقۇلوۆ شەت ەلدەردىڭ عالىمدارىمەن بەلسەندى ىنتىماقتاستىقتا بولىپ, حالىقارالىق فورۋمدار مەن كونگرەستەرگە قاتىستى. 2013 جىلدان باستاپ ليمفورۋمنىڭ (قاتەرلى ليمفومالار بويىنشا) تاۋەلسىز ساراپشىسى بولدى.

ول 350-دەن استام جۇمىس جاريالادى, ونىڭ 50-ءى شەتەلدە. سونىمەن قاتار, ەكى مونوگرافيانىڭ اۆتورى, 10 اۆتورلىق كۋالىك, ونىڭ ىشىندە 2 حالىقارالىق ماڭىزى بار.

رايىمقۇل قاراقۇلوۆ – جوعارى بىلىكتى مامان, كاسىبيلىگى, جوعارى ادامي قاسيەتتەرى, ورىنداۋشىلىق ءتارتىبى ءۇشىن ءاردايىم ارىپتەستەر مەن پاتسيەنتتەر اراسىندا لايىقتى بەدەلگە يە بولعان.

2020 جىلدىڭ جەلتوقسان ايىندا قازوجرعزي-دىڭ 60 جىلدىعىنا وراي «قازاقستان رەسپۋبليكاسىنىڭ دەنساۋلىق ساقتاۋ ءىسىنىڭ ۇزدىگى» توسبەلگىسىمەن ماراپاتتالعان.