اردانا ەسىمدى ارۋ قىز ۇشقىش بولۋدى جاسىنان ارمانداعان ەكەن. بالا كەزىندە تەحنيكالىق تاقىرىپتاعى جۋرنالداردىڭ بىرىنەن كورگەن «ميگ-29» اسكەري ۇشاعىنىڭ سۋرەتى اسەرشىل جاستىڭ بولاشاق تاعدىرىنا تىكەلەي اسەر ەتەدى دەپ كىم ويلاعان؟..
مەكتەپتى بىتىرە سالىسىمەن الىپ-ۇشىپ ارمانىنا قول سوزعان. اقتوبەدەگى تالعات بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتىنا قۇجات تاپسىردى. بىراق سىناقتان وتە المادى. نامىستى قىز اردانا العان بەتىنەن قايتپايتىنداردىڭ ساناتىنان ەدى. ەندى الاتاۋدى بەتكە الىپ, الماتىداعى ازاماتتىق اۆياتسيا اكادەمياسىنا وقۋعا تۇسۋگە بەل بۋعان.
«تالپىنعان جەتەر مۇراتقا» دەگەن بار ەمەس پە, بۇل سىناقتان ءساتتى وتكەن ول ستۋدەنتتىك داۋرەندى ارتقا تاستاپ, «اۋە كەمەلەرى مەن قوزعالتقىشتاردى ۇشۋدا پايدالانۋ» ماماندىعى بويىنشا ديپلوم الىپ شىقتى. «اكادەميانى تامامداعاننان كەيىن مەندە 240 ساعاتتىق رەيد بولدى, دەيدى ۇشقىش قىز. – ونىڭ 40 ساعاتىن مەن استانا قالاسىنىڭ مەملەكەتتىك اۆياتسيالىق ورتالىعىندا ۇشىپ ماشىقتاندىم. TL-2000, Tecnam P-2002, Diamond DA42 ەكى قوزعالتقىشتى جەڭىل ۇشاقتاردى باعىندىرۋدى مەڭگەردىم».
قازىرگى تاڭدا اعا لەيتەنانت اردانا بوتاي – قاراعاندىنىڭ اۆياتسيالىق بازاسىندا اسكەري قىزمەتتە جۇرگەن جالعىز قىز. ەسكادريليانىڭ اعا ۇشقىش-جويعىش لاۋازىمىنداعى ول ەر ادامدارمەن تەڭ دارەجەدە جۇمىس ىستەيدى. ناقتىراق ايتقاندا, اردانا «سۋ-30سم» دەپ اتالاتىن جاڭا بۋىن جويعىش ۇشاقتارىن تىزگىندەپ ءجۇر قازىر.
اۆياتسيالىق ەسكادريليا كومانديرى پودپولكوۆنيك ءبىرىمجان ت ۇلىپباەۆ اردانانىڭ ءوزىن جاقسى ۇشۋ دەرەكتەرى بار ساۋاتتى جانە جاۋاپتى ۇشقىش رەتىندە كورسەتە بىلگەنىن ماقتانىشپەن ايتادى. «اسپاندا ۇشقىشتىڭ ءبارى بىردەي. سول سەبەپتى بارلىق ۇشۋ قۇرامىنا قانداي تالاپتار قويىلسا, اردانا بوتايعا دا سونىڭ ءبارى قاتىستى», دەيدى كوماندير.
ال ۇشقىش قىز بولسا, كۇنىگە زەڭگىر كوككە سامعاپ ۇشىپ, ءوزىنىڭ كاسىبي شەبەرلىگى مەن بىلىكتىلىگىن ۇشتاۋدان جالىققان ەمەس.
قاراعاندى