شۋاقتى كوكتەم, شۇعىلالى مەزەت, شابىتتى شاق... سۇلۋلىق پەن ىزگىلىك, ماحاببات پەن مەيىرىم, نازىكتىك پەن تازالىق, جاڭارۋ مەن جاڭعىرۋ ماۋسىمى اشىق دەپ جاريالانادى! كوكتەم كەلدى! ەركە كوكتەم ەسى-دەرتىمىزدى الىپ, بارلىق يگىلىك پەن جاقسىلىق اتاۋلىدان ەنشى ۇسىنىپ تۇر. ەل كوڭىلى سەرپىلگەن. ەمەن-جارقىن. مىرزا كوكتەم, مەرەيلى كوكتەم, ءمارت كوكتەم. قادىرلى كوكتەم, قاستەرلى ۋاقىت.
تاۋەلسىزدىگىمىزدىڭ وتىزىنشى كوكتەمى. ءار كوكتەم سايىن جانىمىز جاقسىلىققا بايدى. ءاربىر كوركەم كوكتەم سايىن كوڭىلىمىز مارقايادى. ءبىز ۇلى مۇراتتارعا ۇمتىلامىز. ءار كوكتەم سايىن جاس ۇمىتتەر ءبۇر جارادى. كوكتەم سۇلۋداي ەلىتەدى, اناڭداي ايالايدى, بالاڭداي الاقايلايدى.
و, قۇدىرەت, ءبىز كوكتەم جايلى ايتا باستاساق, كوز الدىمىزعا قىز بەينەلى دۇنيە مولدىرەپ كەلىپ تۇرا قالاتىنى نەسى ەكەن؟ كوكتەم جايلى ءبىر اڭگىمە باستالسا, ونىڭ سۇلۋلار, ايەل جايىنا, ايەل-انا جايىنا اۋىسا بەرەتىنى نەدەن ەكەن؟ كوكتەمنىڭ العاشقى قۇستارى – قارلىعاش پەن ناۋرىزەك كەلسە, جاۋقازىن مەن بايشەشەك گۇل اشسا, جومارت كۇن جەردىڭ بەتىن شاپاعاتىنا بولەسە, سونىڭ ءبارىن دە تابيعات ايەل ءۇشىن جاساپ جاتقانداي اسەر قالدىراتىنى قالاي ەكەن؟
كوكتەم شەرۋى باستالىپ كەتتى!
قىردىڭ استىنا قۇلدىراڭداپ جۇگىرگەن بالاقان گۇل تەرىپ ءجۇر, تاعى ءبىرى اق قاعازعا گۇلدىڭ سۋرەتىن سالىپ وتىر, ونى الۋان تۇسكە الەمەشتەپ بويايدى, گۇل ساتاتىن دۇڭگىرشەكتەردىڭ الدى بوسار ەمەس, سونىڭ ءبارى: بالاقاي دا, جاس جىگىت تە, جاسامىس تا اناعا, ارۋعا, اسىل جارعا سىيلىق ىزدەپ ءجۇر. ءوزى دە گۇلدەن جارالعانداي جاراتىلىس يەسىنە گۇل سىيلاماققا ۇمتىلادى. جارىق دۇنيەنىڭ ساۋلەسىن سىيلاعان جانعا جانىن دا ۇسىنۋعا ءازىر.
8 ناۋرىز – حالىقارالىق ايەلدەر كۇنى. وسى كۇندە, وسى مەرەكەدە ءبىر حيكمەت بارى انىق-اۋ. 8 – شەكسىزدىك بەلگىسى. سوندىقتان دا بولار, وسى كۇن شەكسىز ريزالىقتىڭ, شەكسىز قۇرمەت پەن تاعزىمنىڭ, ماحاببات پەن مەيىرىمنىڭ, اسەمدىك پەن ادەمىلىكتىڭ بەلگىسىندەي. ول ارۋ جۇرەكتىڭ, انا جۇرەگىنىڭ سيمۆولى سەكىلدى.
ەل تاريحىنىڭ ەستە جوق ەسكى كەزەڭدەرىنەن باستاپ, كەشەگى الاساپىران, الماعايىپ ۋاقىتتاردا, حاندىق داۋىردە, كەڭەستىك كەزەڭدە, تاۋەلسىزدىك زامانىندا دا ازاماتپەن الدىڭعى شەپتە قاتار تۇرعان, بايراق ۇستاسقان, باعان كوتەرىسكەن, يىق تىرەسكەن, تىزە قوسقان, بارىڭدى تۇگەندەسىپ, جوعىڭدى ىزدەسكەن, حالىق حاقىسىنا قاتار قىزمەت ەتىسكەن – ارۋلار, انالار, ارداقتىلار, اسىلدار, اياۋلىلارمەن بىرگە – ءار كۇن مەرەكە! ءار ازاماتتىڭ جۇرەگىنىڭ تورىندە كوكتەمدەي كوركەم ءبىر جان بار!