قازاقستان مەن تاجىكستان اراسىنداعى اۋە رەيستەرى قايتا اشىلاتىن بولدى, دەپ حابارلايدى Egemen.kz يندۋستريا جانە ينفراقۇرىلىمدىق دامۋ مينيسترلىگىنە سىلتەمە جاساپ.
پرەمەر-ءمينيستردىڭ ورىنباسارى ەرالى توعجانوۆتىڭ توراعالىعىمەن وتكەن قازاقستان اۋماعىندا كوروناۆيرۋستىڭ پايدا بولۋى مەن تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ 2 ناۋرىزداعى شەشىمىنە سايكەس, الماتى-دۋشانبە-الماتى باعىتىندا قازاقستان مەن تاجىكستان اراسىنداعى تۇراقتى رەيستەردى قايتا اشۋعا رۇقسات ەتىلدى.
تاجىكستاندا Covid-19 ينفەكتسياسىنىڭ تارالۋىن بولدىرماۋ جونىندەگى ىندەتكە قارسى ءىس-شارالاردى كۇشەيتۋ جونىندەگى رەسپۋبليكالىق شتابتىڭ شەشىمىنە بايلانىستى باستاپقى كەزەڭدە ءار تاراپتان اپتاسىنا 1 رەيستەن عانا ورىندالادى.
14 ناۋرىزدان باستاپ «ەير استانا» اۋە كومپانياسى الماتى مەن دۋشانبە قالالارى اراسىندا اپتاسىنا 1 رەت (جەكسەنبى كۇندەرى) تۇراقتى رەيس ورىنداۋدى جوسپارلاپ وتىر.
ال تاجىكستان جاعىنان الماتى مەن دۋشانبە قالالارى اراسىندا تۇراقتى اۋە قاتىناسىن 18 ناۋرىزدان «Somon Air» اۋە كومپانياسى اپتاسىنا 1 رەيسپەن (بەيسەنبى كۇندەرى) قايتا باستايدى دەپ جوسپارلانىپ وتىر.
رەيستەر سانيتارلىق-ەپيدەميولوگيالىق تالاپتاردى قاتاڭ ساقتاي وتىرىپ جانە اۋە كومپانيالارىنىڭ سايتتارىندا جاريالانعان كەستەگە سايكەس ورىندالادى.