1 ناۋرىز بەن 15 مامىر ارالىعىندا قازاقستاندا كوكتەمگى اڭ اۋلاۋ كەزەڭى اشىق بولادى. بۇل رەتتە كوكتەمدە ءتيىستى اڭشىلىق شارۋاشىلىعى سۋبەكتىسىنىڭ قورىقشىسىنىڭ مىندەتتى قاتىسۋىمەن قوڭىر ايۋدى, ۇيرەكتى, قارا تورعايدى جانە تىزىمگە سايكەس باسقا دا جانۋارلاردى اۋلاۋعا رۇقسات ەتىلەدى, دەپ حابارلايدى Egemen.kz.
ايتا كەتەيىك, قر ەكولوگيا, گەولوگيا جانە تابيعي رەسۋرستار مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتى قر اۋىل شارۋاشىلىعى ءمينيسترىنىڭ م.ا. بۇيرىعىمەن بەكىتىلگەن اڭ اۋلاۋ قاعيدالارىنىڭ 19-تارماعى نەگىزىندە اڭ اۋلاۋ ماۋسىمىنىڭ باستالۋى تۋرالى بۇيرىق شىعارادى.
كوكتەمگى اڭ اۋلاۋ ەرەجەلەرىنە سايكەس, ۇيرەكتەردى اۋلاۋعا تەك اڭشىدا ەلىكتىرەتىن ۇيرەك نەمەسە تولتىرىلعان جانۋار بولعان جاعدايدا عانا رۇقسات ەتىلەدى. ال اۋەسقويلىق (سپورتتىق) اڭ اۋلاۋعا بەكىتىلگەن اڭشىلىق القاپتاردا عانا رۇقسات ەتىلەدى. سونداي-اق, بۇل بەكىتىلگەن اڭشىلىق القاپتارعا بارۋ قۇقىعىنا جولدامانىڭ بولۋىن تالاپ ەتەدى.
ەگەر جانۋارلار دۇنيەسىن پايدالانۋ تالاپتارى مەن اڭ اۋلاۋ قاعيدالارى بۇزىلعان جاعدايدا, قر اكىمشىلىك قۇقىق بۇزۋشىلىق تۋرالى كودەكسىنىڭ 382-بابىنا سايكەس جەكە تۇلعالارعا 70 اەك مولشەرىندە ايىپپۇل سالۋ نە اكىمشىلىك قۇقىق بۇزۋشىلىق زاتتارى مەن قۇرالدارى تاركىلەنىپ, ەكى جىلعا دەيىنگى مەرزىمگە اڭ اۋلاۋ قۇقىعىنان ايىرۋ تۇرىندەگى ەڭ جوعارعى جازا كوزدەلگەن.