قۇرلىقتىق حوككەي ليگاسىنىڭ (قحل) پلەي-وفف كەزەڭىنە شىققان ەلوردانىڭ «بارىسى» گاگارين كۋبوگى جولىنداعى جارىستىڭ 1/8 فينالىندا ماگنيتوگورسكىنىڭ «مەتاللۋرگ» كومانداسىمەن كەزدەسىپ, سىرت ايدىندا وتكەن العاشقى ويىندا ءىرى ەسەپپەن جەڭىلىپ قالدى.
جالپى ەكى كوماندا اراسىنداعى ماتچ قحل-ءدىڭ وسى ماۋسىمداعى ەڭ ناتيجەلى ءارى ەڭ تارتىستى ويىنىنىڭ ءبىرى بولدى دەپ ايتۋعا تولىق نەگىز بار. ويتكەنى تارازى باسى تەڭسەلىپ تۇرعان كەزدەسۋدە حوككەيشىلەر 11 شايبا سوقتى. ءبىرىنشى كەزەڭنىڭ 37-سەكۋندىندا ايدىن يەلەرىنەن ەگور كوروبكين ەسەپ اشقانىمەن, كەزەڭ سوڭىنا دەيىن جەرلەستەرىمىز ءۇش گول سوعىپ ۇلگەردى. «بارىس» ساپىنان ك.پانيۋكوۆ, ر.ستارچەنكو جانە د.ديتس مەرگەندىگىمەن كوزگە ءتۇستى. ەكىنشى كەزەڭدە «مەتاللۋرگتىڭ» قارقىنى قاتتى بولدى. اينالدىرعان 12 مينۋتتىڭ ىشىندە حەنريك كارلسسون قورعاعان قاقپاعا جاۋاپسىز ءتورت شايبا سالىپ, ەسەپتە قايتادان العا شىقتى. ۇزىلىسكە دەيىن فيليپ ۆارونە مەرگەندىك تانىتىپ, تابلوداعى كورسەتكىشتى 5:4-كە قىسقارتتى.
كەزدەسۋدىڭ سوڭعى بولىگىندە جەرلەستەرىمىز جاعدايدى تۇزەۋ ءۇشىن بارىن سالعانىمەن, ءبارىبىر كوزدەگەن ناتيجەسىنە قول جەتكىزە المادى. ءۇشىنشى كەزەڭدە دە مىقتىلىق تانىتقان «مەتاللۋرگ» ويىنشىلارى قاقپامىزعا تاعى دا ەكى شايبا سوعىپ, كەزدەسۋدىڭ نۇكتەسىن قويدى. قورىتىندى ەسەپ – 7:4. ەكى كوماندا اراسىنداعى ەكىنشى كەزدەسۋ دە بۇگىن ماگنيتوگورسكىدەگى «مەتاللۋرگ ارەنادا» وتەدى.