شىعىسقازاقستاندىقتاردىڭ كوروناۆيرۋس ينفەكتسياسىنا ەتى ابدەن ۇيرەنگەن سياقتى. ىندەت تۇبەگەيلى جويىلىپ كەتپەسە دە, ءاۋ باستاعىداي الاڭداپ جۇرگەندەر جوقتىڭ قاسى. ماسكا تاققانىمەن, انتيسەپتيك سەپكەنىمەن, اۆتوبۋستاردا, قوعامدىق ورىنداردا ءيىن تىرەسكەن جۇرت. ال وبلىستا Covid-19 ينفەكتسياسىنا قارسى ەكپە ەكىنشى كەزەڭمەن كەلە باستادى.
شىعىس قازاقستان وبلىسىنا العاش جەتكىزىلگەن «سپۋتنيك-V» ۆاكتسيناسى وسكەمەن مەن سەمەي قالالارىنداعى «قىزىل ايماقتا» جۇمىس ىستەپ جۇرگەن دارىگەرلەرگە, مەدبيكەلەرگە جانە تازالىقشىلارعا سالىنعان ەدى. قازىرگى تاڭدا ولاردىڭ جاعدايى جاقسى, رەۆاكتسيناتسيادان ءوتىپ جاتىر. ماسەلەن, سەمەي قالاسىنداعى №1 ەمحانانادا 225 مەديتسينا قىزمەتكەرى ەكپە سالدىرسا, ولاردىڭ 118-ءى ەكىنشى قايتارا العىزىپ ۇلگىردى. ۆاكتسينانىڭ ءتارتىبى سولاي, 21 كۇننەن كەيىن ەكىنشى رەت ەگىلەدى.
– «سپۋتنيك-V» ۆاكتسيناسىن العانداردىڭ ەشقايسىسىنان بوگدە رەاكتسيا بايقالعان جوق. بۇيرىقتا كورسەتىلگەندەي, الدىمەن ۆاكتسينانى ناۋقاستارمەن ەتەنە جاقىن جۇمىس ىستەيتىن مەديتسينا قىزمەتكەرلەرى الدى. قازىر ءبارىنىڭ دەنساۋلىعى جاقسى. ولارعا ەكىنشى قايتارا ەگىپ جاتىرمىز. ەندىگى كەلگەن ەكپەلەر مۇعالىمدەرگە, پوليتسيا قىزمەتكەرلەرىنە, مەملەكەتتىك قىزمەتتەگى ازاماتتارعا سالىنادى, – دەدى سەمەي قالالىق №1 ەمحاناسى باس دارىگەرىنىڭ ورىنباسارى گۇلنارا ەسەنجانقىزى.
وبلىستىق دەنساۋلىق ساقتاۋ باسقارماسى ماماندارىنىڭ مالىمەتىنشە, ەكىنشى كەزەڭمەن كەلگەن ۆاكتسينا دا دارىگەرلەرگە سالىنادى. ءبىر قىزىعى, ەكپە الۋعا بىلايعى جۇرتتىڭ اسا قۇلقى جوق. سوزدەرىنە قاراساق, سەنىمسىزدىك باسىم.
– ەكپە سالماساق, اۋرۋ جۇعا قويادى دەپ ويلامايمىن. ونىڭ ۇستىنە كوروناۆيرۋس ينفەكتسياسى ءبىزدىڭ وبلىستا ازايىپ كەلەدى. ال قان پلازماسىن تاپسىرۋ دۇرىس. پلازمانىڭ پايداسى دالەلدەندى مەديتسينادا. ارينە بىرەۋدىڭ ءومىرىن قۇتقارىپ قالۋ, ساۋاپتى ءىس, – دەيدى وسكەمەن قالاسىنىڭ تۇرعىنى گ ۇلىم ادىلبەكوۆا.
شىعىس قازاقستاندا كوروناۆيرۋس ينفەكتسياسى ازايدى دەگەنمەن, سوڭعى تاۋلىكتە 49 ادامنان ىندەت انىقتالعان. ونىڭ 33-ءى سەمەيدەن شىقسا, 9-ى وسكەمەندە تىركەلدى. قالعان ناۋقاستار ريددەر مەن گلۋبوكوە اۋدانىنان شىقتى. مەديتسينا قىزمەتكەرلەرىنىڭ پىكىرىنشە, اۋرۋدى اۋىزدىقتاۋدىڭ بىردەن-ءبىر جولى – ۆاكتسينا مەن سانيتارلىق تالاپتاردى ساقتاۋ. الايدا وبلىستىڭ باس سانيتارلىق دارىگەرى بەكىتكەن قاۋلىعا قۇلاق اسپاي جۇرگەندەر از ەمەس.
1 ناۋرىزدا وسكەمەندە سانيتارلىق تالاپتاردى بۇزعان 8 جاعداي تىركەلگەن. اسىرەسە, ازىق-ت ۇلىك دۇكەندەرىندە ەرەجەنى ەلەمەيدى. وسكەمەن قالاسى بويىنشا ولارعا 175 مىڭ 20 تەڭگە كولەمىندە ايىپپۇل سالىنسا, سەمەيدە 510 475 تەڭگەنىڭ حاتتاماسى تولتىرىلدى. اتاپ ايتساق, ازاماتتار ساۋدا ۇيلەرىندە, بازارلار مەن قوعامدىق كولىكتەردە ماسكالىق رەجىمدى ساقتامايدى. ال ريددەردە جۇمىس ورنىندا ماسكاسىز جۇرگەن ءبىر ازاماتقا شارا قولدانىلدى.