اشىقتىق العىشارتى

بۇل جونىندە اگەنتتىكتىڭ الەۋمەتتىك جەلى­لە­رىندە تىكەلەي ەفيردە وتكەن ءباسپاسوز ءماسلي­حاتى بارىسىندا اگەنتتىكتىڭ اسا ماڭىزدى ىستەر جونىندەگى تەرگەۋشىسى دانيار بەكايداروۆ مالىمدەدى. جەمقورلىق فاكتىلەرى تۋرالى حابارلاعان نەمەسە بۇل قوعامدىق ىندەتكە قارسى تۇرۋعا وزگە دە جولمەن كومەك كورسەتكەن ادامداردى كوتەرمەلەۋ جايىندا جان-جاقتى اقپارات بەرگەن اگەنتتىك وكىلى: «قازىرگى جاعدايدا كەز كەلگەن مەملەكەتتىك ورگان قوعامنىڭ قولداۋىمەن عانا تابىسقا جەتە الادى», دەپ اتاپ ءوتتى.

جەمقورلىقتى اۋىزدىقتاۋ ءۇشىن حالىقتىڭ بەلسەندىلىگى قاجەت ەكەنىن جەتكىزگەن ول اگەنت­تىك­تىڭ اشىقتىق قاعيداتىن ءتۇرلى بايلانىس ارنالارى ارقىلى, اتاپ ايتقاندا, Antikor Live, Antikor News جوبالارى, Facebook, Instagram, Telegram جەلىلەرىنىڭ كومەگىمەن جۇزەگە اسىرىپ كەلەتىنىن دە اتاپ ءوتتى. ەلىمىزدىڭ ەكونوميكالىق دا­مۋىنا تەجەۋ بولىپ, باسەكەلەستىك قابىلەتتى باسەڭ­دەتەتىن الەۋمەتتىك دەرتپەن كۇرەس جۇرگىزۋ – جال­پىحالىقتىق ءىس. وسىعان وراي اگەنتتىك قىز­مەت­كەرلەرى بۇل ماسەلەگە بەيجاي قارامايتىن ازاماتتاردى سىبايلاس جەمقورلىققا قارسى ءىس-قيمىل اگەنتتىگىنىڭ 1424 Call-ورتالىعىنا قوعام دەرتىنىڭ كەز كەلگەن كورىنىسى تۋرالى حابار بەرۋگە شاقىرادى.

«Call-ورتالىق تەگىن اقپاراتتىق-كونسۋل­تا­تسيالىق قولداۋ كورسەتۋگە قاشاندا دايىن. وپە­راتورلار اگەنتتىكتىڭ قىزمەتى تۋرالى سۇ­راق­تارعا جاۋاپ بەرىپ قانا قويماي, قىزمەت­كەر­لەرىنىڭ ۇستىنەن تۇسكەن ارىز-شاعىم, ۇسىنىستار مەن پىكىرلەردى قابىلداپ, جۇمىسقا ءتۇسۋ ءتارتىبىن دە تۇسىندىرەدى. ورتالىق جەمقورلىق فاكتىلەرى, ونىڭ ىشىندە جا­سال­عان نەمەسە دايىندالىپ جاتقان قۇقىق بۇزۋ­شى­لىقتار جونىندە, سونداي-اق كاسىپكەرلىك قىزمەتكە كەدەرگى كەلتىرۋ جاعدايلارى تۋرالى تەلەفون حابارلامالارىنا تاۋلىك بويى دەن قويادى», دەدى ور­تا­لىق­تىڭ جۇ­مىسى تۋرالى جان-جاقتى مالىمەت بەرگەن تەر­گەۋشى.

سىبايلاس جەمقورلىق تۋرالى قوڭىراۋ تۇسكەن كەزدە وپەراتور ابونەنتتى دەرەۋ اگەنتتىكتىڭ كەزەكشى وفيتسەرىمەن قوسادى. ال ول ءوز كەزەگىندە بۇل حابارلامانى تىركەپ, جەدەل دەن قويۋ شارالارىن قابىلدايدى. وسىلايشا, ءاربىر حابارلاما ۋاقتىلى تەكسەرىلىپ, جەتكىلىكتى نەگىزدەر بولعان جاعدايدا سوتقا دەيىنگى تەرگەپ-تەكسەرۋ باستالادى. «حالىق تىكەلەي بايلانىس ارقىلى جەمقورلىق فاكتىلەرى تۋرالى جەرگىلىكتى دەپارتامەنتتەرگە دە حابارلاي الادى. ەگەر كىنالىنىڭ قىلمىسى راستالىپ, وعان قاتىستى اكىمشىلىك جازا قولدانۋ تۋرالى سوت قاۋلىسى نەمەسە ايىپتاۋ ۇكىمى زاڭدى كۇشىنە ەنسە, وسى جونىندە اقپارات بەرگەن, بولماسا باسقا دا جولدارمەن جاردەمدەسكەندەرگە بىرجولعى اقشالاي سىياقى تولەنەدى», دەدى بۇل جونىندە اگەنتتىك قىزمەتكەرى. ەستەرىڭىزدە بولسا, وتكەن جىلى ىنتالاندىرۋ ەرەجەلەرىنە ءبىراز وزگەرىستەر ەنگىزىلگەن بولاتىن. گەرمانيا, ۇلىبريتانيا, اقش سەكىلدى ەىدۇ ەلدەرىنىڭ تاجىريبەسىنە سۇيەنە وتىرىپ, سىياقى سوماسى سارالانعان ەدى.

ەندى پارا نەمەسە كەلتىرىلگەن زالال سوماسى 1 مىڭ ايلىق ەسەپتىك كورسەتكىشتەن (ياعني 2 ملن 778 مىڭ تەڭگەدەن) اسپايتىن سىبايلاس جەمقورلىق تۋرالى حابارلاما ءۇشىن سىياقى قىلمىستىڭ اۋىرلىعىنا قاراي 30-دان 100 اەك-كە دەيىن قۇرايدى. ال بۇرىن كوتەرمەلەۋدىڭ ەڭ جوعارى مولشەرى 100 ەسەپتىك كورسەتكىشتەن, ياعني 277 مىڭ 800 تەڭگەدەن اسپايتىن. تالداۋ جۇمىستارى حالىقتىڭ كوبىنەسە پاراقورلىق, سوسىن ۇرلىق پەن لاۋازىمدىق وكىلەتتىكتەردى تەرىس پايدالانۋ فاكتىلەرى بويىنشا حابارلاساتىنىن كورسەتىپ بەرگەن.

اقشالاي ىنتالاندىرۋ – سىبايلاس جەم­قور­لىقپەن كۇرەستى كۇشەيتىپ, ونىڭ الدىن الۋ تيىمدى­لى­گىن ارتتىرۋدا ءتيىمدى تاسىلدەردىڭ ءبىرى. «بۇل قادام ازاماتتىق ۇستانىمدى قالىپتاستىرىپ قانا قوي­ماي, جەمقورلىققا جول بەرمەۋدە ەل-جۇرتتىڭ سانا­سى­نا وڭ اسەر ەتەدى», دەيدى اگەنتتىك وكىلى.