نۇرسۇلتان نازارباەۆ قورىنىڭ ديرەكتورى داريعا نازارباەۆا جۇمىس ساپارىمەن تاراز قالاسىنا جانە شىمكەنت قالالارىنا باردى. بۇل ساپار كەزىندە داريعا نۇرسۇلتانقىزى ەلباسىنىڭ «قامقورلىق» باستاماسىنىڭ ىسكە اسىرىلۋ بارىسىمەن تانىستى.
ەلباسى نۇرسۇلتان نازارباەۆتىڭ «قامقورلىق» باستاماسىن ىسكە اسىرۋ ماقساتىندا جامبىل وڭىرىندە ءتيىستى جۇمىستار جۇرگىزىلۋدە. ناتيجەسىندە, ەرەكشە قاجەتتىلىگى بار بالالارعا كوڭىل ءبولىنىپ, قولداۋ كورسەتىلۋدە.
تاراز قالاسىندا داريعا نۇرسۇلتانقىزى وبلىس اكىمى بەردىبەك ساپارباەۆپەن بىرگە وبلىستىق كوپسالالى بالالار اۋرۋحاناسىنداعى «قامقورلىق» وڭالتۋ ورتالىعىنىڭ جانە تاراز قالاسىنداعى №9 بەن ا.گايدار اتىنداعى №35 ورتا مەكتەپتتەگى ينكليۋزيانى قولداۋ كابينەتتەرىنىڭ جۇمىسىمەن تانىستى. اتالعان كابينەتتەردىڭ اشىلۋى ناتيجەسىندە بۇگىندە ەرەكشە ءبىلىم الۋعا قاجەتتىلىگى بار 22 بالا ءوز قاتارلارىمەن بىرگە مەكتەپتە وقۋعا مۇمكىندىك العان. بۇرىن بۇل بالالار ۇيدە وقىعاندىقتان, ولار لوگوپەد, دەفەكتولوگ پەن پسيحولوگ سياقتى مامانداردىڭ جاردەمىن تۇراقتى تۇردە الا الماعان.
د.نازارباەۆا ورتالىقتاعى كابينەتتەردى ارالاپ, اتا-انالارمەن جانە بالالارمەن اڭگىمەلەستى. مۇندا بۇگىندە نەيرو-ورتوپەديالىق اۋرۋلارى بار 80 بالا وڭالتۋدان وتۋدە. ال مەكەمە اشىلعان ساتتەن باستاپ وڭىردەن ەرەكشە قاجەتتىلىكتەرى بار 200-گە جۋىق بالا كومەك العان. اتالعان ورتالىقتىڭ كولەمى 1500 شارشى مەتردى قۇرايدى. ونىڭ ىشىندە 2 باسسەين بار. باسقا دا مۇمكىندىكتەر قاراستىرىلعان.
تاراز قالاسىنداعى «قامقورلىق» وڭالتۋ ورتالىعىنىڭ ديرەكتورى رايسا قوجامجاروۆا داريعا نۇرسۇلتانقىزىنا كەشەندى وڭالتۋ تۇجىرىمداماسى مەن كورسەتىلەتىن وڭالتۋ ءىس-شارالارىنىڭ تۇرلەرى تۋرالى مالىمەت بەردى. مۇندا دارىگەرلەردىڭ كونسۋلتاتسيالارى, مەحانوتەراپيا, ەمدىك دەنە شىنىقتىرۋ, سەنسورلىق جانە ينتەراكتيۆتى بولمەلەردە لوگوپەد, دەفەكتولوگ, پسيحولوگ, ەرگوتەراپەۆت ماماندارىنىڭ ساباقتارى, سونداي-اق مينەرالدى سۋمەن ەمدەۋ, فيزيوەمدەۋ جانە باسقا دا ەم تۇرلەرى بار. قالاداعى «قامقورلىق» ورتالىقتارىندا ءتيىستى وقىتۋدان وتكەن بىلىكتى ماماندار جۇمىس ىستەيدى.
بىلتىر وبلىستىق بالالار اۋرۋحاناسى جانىنداعى ورتالىقتىڭ 24 مامانى بىلىكتىلىكتى ارتتىرۋ جانە قايتا دايارلاۋ كۋرستارىنان وتكەن بولسا, بيىل كوشپەلى سەمينارعا 32 قىزمەتكەر قاتىسقان. جىل سوڭىنا دەيىن رەابيليتولوگيا سالاسىنداعى وزەكتى ماسەلەلەر بويىنشا شەتەلدىك مەنتورلاردىڭ قىزمەتكەرلەرىن وقىتۋ جوسپارلانۋدا. وسى رەتتە «قامقورلىق» قورى ديرەكتورىنىڭ مىندەتىن اتقارۋشى ارايلىم ەركىنوۆا بالالاردى قولجەتىمدى جەردە ساپالى وڭالتۋدان وتكىزۋ ماقساتىندا اتالعان قور وڭالتۋ ورتالىعىنا جەتەكشىلىك ەتۋدى جالعاستىرۋعا نيەتتى ەكەنىن جەتكىزدى. ورتالىق جىل سايىن 600-دەن استام نەيرو-ورتوپەديالىق, ونىڭ ىشىندە تسەرەبرالدى سال اۋرۋى بار بالالاردى تەگىن قابىلدايتىن بولادى. مۇنداي ورتالىقتار ەلىمىزدىڭ الماتى, اتىراۋ, باتىس قازاقستان, شىعىس قازاقستان, تۇركىستان, قوستاناي وبلىستارىندا جانە نۇر-سۇلتان قالاسىندا اشىلعان. جالپى, ەلباسىنىڭ بۇل باستاماسى جىلىنا 5 مىڭ بالانى وڭالتۋعا مۇمكىندىك بەرەدى. جاڭا ورتالىقتاردىڭ جۇمىسى ناتيجەسىندە تسەرەبرالدى سال اۋرۋى بار بالالاردى وڭالتۋ كورسەتكىشى 20 پايىزعا وسكەن.
كەزەكتى ساپارىندا داريعا نۇرسۇلتانقىزى شىمكەنتتەگى جاسوسپىرىمدەرگە ارنالعان «قامقورلىق» وڭالتۋ ورتالىعىنىڭ جۇمىسىمەن تانىستى. سونداي-اق اتالعان ورتالىقتاعى پەداگوگتەردىڭ تۇزەتۋ كۋرستارىنا, ەمدىك دەنە شىنىقتىرۋ جانە مەحانوتەراپيانىڭ جەكە ساباقتارىنا قاتىستى. بۇل ورتالىق وتكەن جىلدىڭ جەلتوقسان ايىندا ەلباسىنىڭ «قامقورلىق» باستاماسى اياسىندا اشىلىپ, شىمكەنت قالاسىنداعى وبلىستىق بالالار اۋرۋحاناسىنىڭ عيماراتىنا ورنالاسقان ەدى. كىشكەنتايلارعا ەم-دوم جاسايتىن نىساننىڭ جالپى اۋدانى – 250 شارشى مەتر. مۇندا دامۋىندا اۋىتقۋى بار ەرتە جاستاعى بالالار 21 كۇننەن استام كۋرستان ءوتىپ, امبۋلاتوريالىق جانە ستاتسيونارلىق ەمدى تەگىن الا الادى. ءار بالا ساراپتامالىق سىنىپتاعى ەلەكتروەنتسەفالوگرافتا جانە كەشەندى اۋديومەتردە دياگنوستيكالىق تەكسەرۋدەن ءوتىپ تۇرادى.
ەلباسىنىڭ اتالىق قامقورلىعىنا العىس ايتقان ورتالىق ديرەكتورى ءلاززات كۋچكاروۆا مۇنداي زاماناۋي جابدىقتار وسى ۋاقىتقا دەيىن تۇركىستان وبلىسىندا تەك جەكەمەنشىك ورتالىقتاردا عانا بولعانىن ايتتى.
«ماماندار توبىنىڭ از بولعانىنا قاراماستان, ءار بالاعا 70-كە دەيىن وڭالتۋ قىزمەتىن ۇسىنىپ كەلەمىز. ءۇش وڭالتۋ كۋرسىنان كەيىن بالالاردىڭ دەنساۋلىعى قالپىنا كەلە باستايدى. كەشەندى ەمدەۋ-ساۋىقتىرۋدىڭ ناتيجەسى بۇل ءادىستىڭ تيىمدىلىگىن تاعى دا دالەلدەپ بەردى. قازىرگى تاڭدا ءار بالادا وڭ ديناميكا بايقالادى. بەس ءسابيىمىز وڭالتۋ ساباقتارىنان كەيىن العاشقى قادامدارىن جاسادى», دەدى ل.كۋچكاروۆا.
جۇمىسى جۇيەلى, باعىتى ايقىن ورتالىقتىڭ الداعى جوسپارى – جىل سوڭىنا دەيىن 400 بالانى ەمدەۋ. قۋانتارلىعى, نۇرسۇلتان نازارباەۆ قورى بۇل جوبانىڭ تيىمدىلىگى مەن قاجەتتىلىگىن ەسكەرە وتىرىپ, ەلباسىنىڭ «قامقورلىق» باستاماسىنىڭ ەكىنشى كەزەڭى اياسىندا وسىنداي ورتالىقتاردىڭ اشىلۋىن جالعاستىرۋدى كوزدەپ وتىر.
تۇركىستان وبلىسىنداعى جۇمىس ساپارى بارىسىندا داريعا نازارباەۆا اتالعان باستاما اياسىندا اشىلعان ينكليۋزيانى قولداۋ كابينەتتەرىن دە ارالاپ كوردى. كابينەتتەر №1 ا.بايتۇرسىنوۆ اتىنداعى جالپى ورتا مەكتەپتە جانە وبلىس ورتالىعىنداعى №21 جالپى ورتا مەكتەبىندە ورنالاسقان. ولار ارنايى جيھازدارمەن جانە تەحنيكالىق جابدىقتارمەن, ينتەراكتيۆتى تاقتامەن, مونتەسسوري ماتەريالدارىمەن, ديداكتيكالىق قۇرالدارمەن جابدىقتالعان.
ينكليۋزيانى قولداۋ كابينەتتەرىندە داريعا نۇرسۇلتانقىزى بالالارمەن تانىسىپ, ولاردىڭ جەكە اسسيستەنتتەرىمەن (تيۋتورلارىمەن) اڭگىمەلەستى. تيۋتور سۇيەمەلدەۋىمەن اۋتيستىك سپەكترى بۇزىلعان ءاربىر وقۋشى ادەتتەگى سىنىپتاعى ساباق كەزىندە دە, ينكليۋزيانى قولداۋ كابينەتىندە دە ءبىلىم الا الادى. ال ونداعى اسسيستەنتتىڭ نەگىزگى مىندەتى – بالاعا مۇمكىندىگىنشە ءوز بەتىنشە ءومىر سۇرۋگە كومەكتەسۋ.
قور ديرەكتورى مەكتەپ ساباقتارىنا قاتىسىپ, ەرەكشە وقۋشىلاردىڭ سىنىپتىڭ جالپى جۇمىسىنا قالاي بەيىمدەلەتىنىن تەكسەرىپ كوردى.
ساپار سوڭىندا داريعا نازارباەۆا ەلباسىنىڭ قامورلىعىمەن جۇزەگە اسقان جوبا اياسىندا ءالى تالاي يگى جۇمىس جۇزەگە اساتىنىن تىلگە تيەك ەتتى.
حاميت ەسامان,نۇرشات توكەن,«Egemen Qazaqstan»